Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel ghebiet ons dat wy de nieuwe Wet obedieren sullen, de welcke ons Christus ghegeuen heeft, ende hoe hy zijne Broeders ghelijck is gheworden, ende den hooghen Priester is dien de sonden versoent heeft.

1

⁺ DAerom moeten wy des te meer waernemen des woorts, dat wy hooren, op dat wy niet verderuen en moeten.

+ A vers 1

2

Want ist dat dat woort vast gheworden is^* dat door de Enghelen ghesproken is, ende een yeghelijcke ouertredinghe, ende onghehoorsaemheyt heeft ontfanghen zijn rechte loon:

* Gen. 18.b.10. 19.c.13.

3

^† Hoe willen wy dan ontulien, ist dat wy sulcke eene salicheyt niet en achten.^‡ Welcke, nadien sy eerstelijck ghepredict is door den Heere, is sy op ons gecomen door die, diet ghehoort hebben.

† Heb. 12.d.25.

‡ Mar. 1.b.15.

4

^* Ende Godt heeft haer ghetuychenisse gegeuen, met Teeckenen, Wonderen, ende menigerley crachten, ende met wtdeylinghe des Heylighen Geests, na zijnen wille.

* Mar. 16.c.20. Actor. 4.a.3. 19.b.11.

5

⁺ Want hy en heeft den Enghelen niet onderworpen, de toecomende werelt daer wy af spreken.

+ B vers 5

6

Maer het betuycht een op een plaetse, ende spreeckt:^‡ Wat is de mensche, dat ghy zijnder gedenckt? Ende des menschen Soon, dat ghi hem besoect?

‡ Psalm. 8.a.5.

7

Ghy hebt hem een cleyne tijt der Enghelen laten ontberen, Met prijs ende eere hebt ghy hem ghecroont, ende hebt hem gheset, ouer de wercken uwer handen.

8

^* Alle dinck hebt ghy onderworpen zijnen voeten. In dien, dat hi hem alle dinck heeft onderworpen, so en heeft hy niet ghelaten, dat hem niet onderworpen en sy. Maer nv en sien wy noch niet dat hem alle dinck onderworpen sy.

* Psalm. 8.b.7 1.Cor. 15.c.27 Ephes. 1.c.22.

9

^† Maer den ghenen, die een cleyne tijt der Engelen ontbeert heeft^‡ sien wy, dattet Iesus is, door dat lijden des doots^* ghecroont met prijs ende eere, op dat hy van Godts ghenaden, voor allen den doot smaeckte.

† Mat. 11.b.11.

‡ Phil. 2.a.8.

* Actor. 2.d.33.

10

Want het betaemde dien, om wiens willen alle dinghen zijn, ende door welcken alle dinghen zijn, die daer veel kinderen heeft ter heerlijcheyt gebracht, dat hy den Hertoch haerder salicheyt, door lijden volcomen maecte.

11

Nademael sy alle van eenen comen, beyde die daer heylighet,⁺ ende die daer gheheylicht worden. Daerom en schaemt hy hem oock niet, haer^* Broeders te heeten,

+ C vers 11

* Mat. 12.f.50.

12

Ende spreect:^† Ick wil vercondighen uwen Naem mijnen Broederen, ende v midden inder gemeynte Lof singhen.

† Psal. 22.c.23

13

Ende wederom:^‡ Ick wil mijn betrouwen op hem setten. Ende wederom:^* Siet daer, ick ende de kinderen, welcke my God gegeuen heeft.

‡ Psalm. 18.a.2 Esaie. 12.a.2.

* Esa. 8.b.10.

14

Na dien nv de kinderen vleesch ende bloet hebben, so is hy des oock te ghelijcker mate deelachtich gheworden^† op dat hy door den doot de macht name, dien, die des doots macht hadde, dat is, den Duyuel:

† Osee. 13.c.14. 1.Cor. 15.f.54 Philip. 2.a.7 2.Tim. 1.b.10.

15

Ende dat hy die verloste, die door vreese des doots int gantsche leuen knechten zijn moesten.

[p. 95v]

16

Want hy en neemt nerghens de Enghelen aen hem, maer dat^* Saet Abrahe neemt hy aen hem.

* Rom. 9.a.9. Gala. 3.d.29.

17

Daerom moeste hy in allen dinghen zijnen Broederen^† ghelijck worden, op dat hy barmhertich werde, ende een ghetrouwe hooghe Priester voor Godt, om te versoenen de sonden des volcks.

† Phil. 2.a.7.

18

^‡ Want daer hy in gheleden heeft, ende ghetempteert is, daer can hy die in helpen, die daer ghetempteert worden.

‡ Hebre. 5.a.2.