Den Bibel, Inhoudende dat Oude ende Nieuwe Testament (Biestkensbijbel)

[p. 95r]

De Epistel aen de Hebreen.

¶ Dat .I. Capittel.

¶ Hier wort ghestelt de excellentheyt van Christo, de welcke ons die nieuwe Wet ghegheuen heeft. Verhaelt haer vande Soon Godts.

1

⁺ NA dien in voortijden, God menichmael ende menigerley wijse, gesproken heeft, tot den Vaderen^* door de Propheten,

+ A vers 1

* Esaie. 6.b.8. Ierem. 1.a.5. Ezech. 2.a.3.

2

So heeft hy ten laetsten in desen daghen, tot ons gesproken, door den Soon^† welcken hy gheset heeft, tot eenen^‡ Erfgenaem ouer alle dinc^* door den welcken hy ooc de werelt ghemaect heeft.

† Mat. 28.c.18.

‡ mat. 21.d.37

* Gene. 1.a.1. Psal. 33.a.6. Ioan. 1.a.3. Ephe. 3.b.9.

3

^† Welcken, nademael hy is dat schijnsel zijnder heerlijcheyt, ende dat Euenbeelt zijns wesens, ende draecht alle dingen met zijnen crachtigen woorde^‡ ende heeft gemaect de reyninge onser sonden, door hemseluen^* soo heeft hy hemseluen gheset tot der rechter hant des Maiesteyts, inder Hoochte,

† sapi. 7.d.26. 2.Cor. 4.a.4 Colos. 1.b.15.

‡ Ephe. 1.a.7

* Psal. 110.a.1 Mar. 16.c.19.

4

So veel beter geworden dan de Enghelen, so gheheel veel hy eenen hoogheren^† Naem voor haer beeruet heeft.

† Philip. 2.a.9. Matt. 1.c.21. Luce. 2.c.21.

5

⁺ Want tot welcken Enghel heeft hy oyt geseyt:^‡ Ghy zijt mijn soon, heden heb ick v ghebaert? Ende wederom:^* Ick sal zijn Vader zijn, ende hy sal mijn soon zijn.

+ B vers 5

‡ Psal. 2.a.7. Luce. 3.c.22. Acto. 13.d.33. Hebre. 5.b.8.

* 2.Re. 7.c.14

6

Ende wederom, als hy den eerste geboren inleydet inder werelt, spreect hy^† ende hem sullen alle Engelen Gods aenbidden.

† Psal. 97.a.7

7

Vanden Enghelen spreect hy wel:^‡ Hy maeckt zijn Engelen gheesten, ende zijn dienaers vyer vlammen.

‡ Ps. 104.a.4

8

Maer vanden Soon:^* Godt, dijn Stoel duert van eewicheyt tot eewicheyt: De Scepter dijns Rijcx, is een oprecht Scepter.

* Psal. 45.b.7

9

Ghy hebt lief ghehadt de gherechticheyt, ende ghehaet de ongherechticheyt: Daerom heeft v, O Godt ghesalft uwe Godt, met den Olie der vruechden, bouen uwe medeghenooten.

10

^* Ende ghy Heere hebt van aenbegin de Aerde ghegront, ende de Hemelen zijn uwer handen werck.

* Psa. 102.d.26

11

^† Die selue sullen vergaen, maer ghy sult blijuen: Ende sy sullen alle verouden, als een Cleedt,

† Esai. 51.b.13. 2.Pet. 3.b.7.c.10.

12

Ende als een ghewaet sult ghijse veranderen, ende sy sullen haer veranderen. Maer ghy zijt die selue, ende uwe Iaren en sullen niet ophouden:

13

Tot welcken Engel heeft hy oyt geseyt:^‡ Settet v tot mijnder rechter hant, tot dat ick uwe Vianden legghe tot een voetbanck uwer voeten?

‡ Psal. 110.a.1. Acto. 2.e.34. 1.Cor. 15.c.25. Ephe. 1.c.20. Hebr. 10.b.12

14

En zijn sy niet altemael dienstbare gheesten, wtghesonden ten dienste om dier willen, die daer beeruen sullen de salicheyt.