Den Bibel, Inhoudende dat Oude ende Nieuwe Testament (Biestkensbijbel)

De tweede Epistel S. Peters.

¶ Dat .I. Capittel.

¶ De Apostel vermaent den gheloouighen dat si haer duecht wt souden bewijsen met bescheydenheydt. Hy achtet profijt te zijn haer altijt (so lange als hy int vleesch is) te vermanen, ende seydt haer dat hy cortelijck zijn lichaem af legghen sal. Ende hoe hy de stemme op den heylighen Berch ghehoort heeft, vertelt hy haer.

1

⁺ SImon Petrus, een knecht ende Apostel Iesu Christi. Den genen, die met ons euen den seluen dierbaren gelooue vercreghen hebben, in der gherechticheyt, die ons God geeft, ende de Salichmaker Iesus Christus.

+ A vers 1

[p. 92r]

2

^* Godt gheue v vele genade ende vrede, door de kennisse Godts, ende Iesu Christi onses Heeren.

* Roma. 1.a.2. 1.Petri. 1.a.2.

3

Na dat ons alderley siner godlijcker cracht^† (wat tot den leuen, ende godlijcke wandelinghe dient) gheschoncken is, door de kennisse des gheens, die ons geroepen heeft, door zijn heerlijcheyt ende duecht,

† Acto. 20.d.20. 1.Cor. 1.a.6.

4

Door welcke ons de dierbare ende alder grootste Beloften, gheschoncken zijn, Te weten,^‡ dat ghy door dat selue deelachtich wordet der Godtlijcker natuere, ist dat ghy vliet de vergancklijcke lust der Werelt.

‡ Ioan. 1.a.12. Collos. 2.b.10 Galat. 3.d.26.

5

⁺ Soo weyndet alle uwe neersticheydt daer aen, ende bewijst in uwen ghelooue duecht, ende inder duecht bescheydenheyt,

+ B vers 5

6

Ende in der bescheydenheyt maticheyt, ende in der maticheyt verduldicheydt, in der verduldicheyt Godtsalicheyt,

7

Ende in der Godtsalicheydt^‡ broederlijcke Liefde, ende in der broederlijcke Liefde ghemeyne Liefde.

‡ Ioan. 13.d.34 15.c.17.

8

Wandt als sulcks rijckelijck by v is, so en salt v niet ledich ende onuruchtbaer laten zijn, in der kennisse onses Heeren Iesu Christi:

9

Maer die sulcks niet en heeft, die is^* blint, ende tast met der handt nae den wech, ende vergheet der reyninghe zijnder voorgaender sonden.

* Esai. 59.b.10. Ioan. 12.e.35.

10

Daerom lieue Broederen, doet dies te meer neersticheyts, om uwe roepinghe ende verkiesinghe vast te maken. Want ist dat ghy dat doet, soo en sult ghy niet struyckelen:

11

Ende alsoo sal v rijckelijck ghegeuen worden, de inganck tot den eewighen Rijcke onses Heeren ende Salichmakers Iesu Christi.

12

⁺ Daerom en wil ict niet laten,^† v altijt sulcks te vermanen, hoe wel dat ghijt weet, ende ghesterckt zijt, in der teghenwoordighe waerheyt.

+ C vers 12

† Luce. 22.c.32.

13

Want ick achtet recht te zijn, soo langhe als ick in deser^‡ Hutte ben, v te verwecken ende te vermanen.

‡ 1.Cor. 5.a.1.

14

^* Want ick weet, dat ick mijn Hutte haest af legghen moet, als my dan oock onse Heere Iesus gheopenbaert heeft.

* Ioan. 21.d.18. 2.Tim. 4.a.6

15

Maer ick wil neersticheyt doen, dat ghy van allen desen hebt nae mijnen afscheyde, sulcx in ghedachtenis te houden.

16

^† Wandt wy en hebben den cloecken Fabulen niet gheuolcht, doen wy v vercondicht hebben de cracht ende toecoemst onses Heeren Iesu Christi:^‡ Maer wy hebben sine heerlijckheydt selue ghesien,

† 1.Cor. 1.c.15. 2.a.4. 4.d.20 1.Tess. 1.b.5.

‡ Mat. 17.a.2 Ioan. 1.b.14. 1.Ioan. 1.a.1.

17

⁺ Doen hy ontfinck van Gode den Vader, Eere ende prijs, door een stemme, die tot hem gheschiede vander grooter heerlijcheyt, in deser manieren:^* Dit is mijn lieue Sone, aen dien ick een welbehagen heb.

+ D vers 17

* Matt. 17.a.5. Marc. 9.a.7. Luce. 9.d.35.

18

Ende dese stemme hebben wy ghehoort vanden Hemel gebracht, doen wy met hem waren, op den heyligen Berch.

19

Wy hebben een vast Prophetisch woort, ende ghy doet wel, dat ghy daer acht op hebbet, als op een licht,^‡ dat daer schijnt in een doncker plaetse, tot dat de dach aenbreke, ende de morghen Sterre op gae in uwen herten.

‡ 2.Cor. 4.b.6.

20

Ende dat sult ghy voort eerste weten, dat gheen Prophecije in der Schrift en gheschiet, wt eyghen wtlegghinghe.

21

^* Want daer en is noch noyt gheen Prophecije wt menscelijcken wille voort ghebracht: Maer de heylighe menschen Godts hebbent ghesproken, ghedreuen vanden Heylighen Gheest.

* Dani. 9.b.10. Sach. 7.b.12. 2.Tim. 3.b.16