Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hier waerschout de Apostel voor de valsche Propheten ende Leeraers, die haer fenijn neffens dat goede woort inbrenghen sullen, Ende seyt hoe sy den Heere die haer ghecocht heeft versaken sullen, Verhaelt hoe Godt de Enghelen die ghesondicht hadden, niet en spaerde.

1

⁺ MAer daer waren oock valsche Propheten onder den volcke,^* ghelijck als oock onder v zijn sullen, valsche Leeraers, Die beneuen in voeren sullen schadelijcke Secten, ende versaken den Heere, die haer ghecocht heeft, ende sullen ouer haer seluen brenghen een snelle verdoemenis.

+ A vers 1

* Mat. 24.a.11 Acto. 20.d.29. 1.Tim. 4.a.1.

2

^† Ende veel sullen nae volghen haer verderffenisse: Door welcken de wech der waerheyt sal ghelastert worden,

† Matt. 7.b.13.

3

Ende door ghiericheyt met versierde woorden, sullen sy aen v hanteren, ouer welcken dat ordeel van lange tijt af niet versuymelijck en is, ende haer verdoemenis en slaept niet.

4

⁺ Want ist dat Godt der^‡ Enghelen, die gesondicht hebben, niet verschoont en heeft, maer heeftse met ketenen der duysternis ter Hellen verstooten, ende ouer ghegheuen dat sy tot den ordeel bewaert worden.

+ B vers 4

‡ Iob. 4.b.9. Iude. b.6. Apoc. 20.a.2.

5

^* Ende en heeft niet ghespaert de voorleden wereldt, maer bewaerde Noe, den Prediker der gherechticheyt, zijnder achte, ende bracht de wateruloet ouer de werelt der Godloosen.

* Gene. 7.a.21.

6

^† Ende heeft de Steden Sodoma ende Gomorrha tot asschen gemaect, omghekeert ende verdoemt: Daermede een Exempel geset den Godloosen, die namaels comen sullen:

† Gen. 19.c.24 Deut. 29.d.23 Esai. 13.b.19. Iere. 50.f.40

7

^‡ Ende heeft verlost den Rechtueerdighen Lot, dien de schandelijcke Lieden alle leet deden met haren ontuchtighen wesen.

‡ Gen. 19.c.16 Sapi. 6.a.7.

8

Want dewijle dat hy rechtueerdich was, ende onder haer woonde, dat hijt sien ende hooren moeste, quelden si de rechtueerdighe siele van daghe tot daghe, met haren onrechtueerdigen wercken.

9

^+* De Heere weet de Godsalighen, wt de becoringe te verlossen: Maer de onrechtueerdighen te bewaren tot den dach des ordeels, te pijnighen.

+ C vers 9

* 1.Cor. 10.b.13.

10

Maer aldermeest die, die daer wandelen na den vleessche, in der onreyne lust, ende de heerschappien verachten, coene, eygensinnich, haer niet en ontsien de Maiesteyten te lasteren:

11

^† Daer doch de Enghelen, die grooter macht ende sterckheyt hebben, niet en verdraghen dat lasterlijcke ordeel, teghen haer seluen vanden Heere.

† Iude. c.9.

12

^‡ Maer sy zijn ghelijck de onuernuftighe dieren, die van natuere daer toe gheboren zijn, dat si gheuanghen ende gheslaghen worden.^* Lasteren daer sy niet af en weten, ende sullen in haren verderffelijcken wesen vergaen, ende dat loon der ongherechticheyt daer af brenghen.

‡ Ierem. 12.a.3.

* Iude. b.10.

13

Sy achtent voor wellust, dat tijtlijck

[p. 92v]

welleuen. Sy zijn schande ende laster, pralen van uwe Aelmoessen, brassen vanden uwen,

14

Hebben ooghen vol ouerspeels, en laten haer, haer sonde niet keeren, locken aen haer de lichtueerdighe sielen, hebben een doordreuen herdt met giericheyt, veruloeckte Lieden,

15

Verlaten den rechten wech, ende gaen dwalende^* Ende volgen na, den wech Balaam, des soons Bosor, welcken beliefde dat loon der ongherechticheyt:

* Num. 22.b.5. 23. 24.

16

^† Maer hy hadde een straffe zijnder ouertredinghe, Namelijck, dat stomme lastbaer Dier, sprack met Menschen stemme, ende keerde des Propheten dwaesheyt.

† Nu. 22.d.22. 31.b.8.

17

⁺ Dat zijn Fonteynen sonder water,^‡ ende wolcken vanden stormwinde omghedreuen, den welcken behouden is een doncker duysternisse in eewicheyt.

+ D vers 17

‡ Iude. c.12.

18

Want sy spreken stoute woorden, daer niet na en volcht, ende locken door ontucht tot vleeschelijcke lust, die ghene, die recht ontcomen waren, ende nv in dwalinghe wandelen:

19

Ende belouen haer vrijheyt, daer sy selue knechten der verderfnisse zijn.^* Want waer yemant af ouerwonnen is, diens knecht is hy gheworden.

* Ioan. 8.c.34. Rom. 6.b.16.

20

^† Want ist dat sy ontuloden zijn der onsuyuerheyt des werelts, door de kennisse des Heeren ende Salichmakers Iesu Christi, ende worden wederom in die seluen gheulochten, ende ouerwonnen, so is met haer dat laetste erger gheworden, dan dat eerste.

† Mat. 12.d.42 Luce. 9.f.62. Hebre. 6.a.5. 10.c.26.

21

Want het ware haer beter, dat sy den wech der gherechticheyt niet bekent en hadden, dan dat sy hem bekennen^* ende haer keeren van den Heylighen ghebode, dat haer ghegheuen is.

* Actor. 5a.3.

22

Haer is ouercomen dat waerachtich Spreeckwoort:^† De hont sloct weder op, dat hy ghespogen heeft. Ende: De suege wentelt haer na tswemmen weder in den dreck.

† Pro. 26.b.11. Eccli. 34.d.30