Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ De Apostel leert de Herders dat si voor de schapen sorghen souden, niet onwillich oft om profijt, ende set haren loon daer by. Leert dat de Ionghers den Ouders onderdanich sullen zijn in alder ootmoedicheydt, ende hoemen behoort te waken, wandt de duyuel gaet om als een grimmende Leeuwe.

1

⁺ DE Outsten, die onder v zijn, vermane ick, de mede Outste,^* ende ghetuyghe der lijden, die in Christo zijn, ende deelachtich der heerlijcheyt, die geopenbaert sal worden:

+ A vers 1

* Acto. 5.d.33.

2

^‡ Weydet de Cudde Christi, die v beuolen is, ende siet op haer, Niet ghedwonghen, maer ghewillichlijck: Niet om schandelijck ghewins wille, maer van gront des herten,

‡ Ioan. 21.c.15. Acto. 20.d.28.

3

^† Niet als die ouer dat volc heerschen, ^* Maer wordet voorbeelden der Cudden:

† Eze. 34.a.4 Luce. 22.b.26

* Titum. 2.a.7.

4

So sult ghy (als de Eertsherder verscijnen sal)^† de onuerwelclijcke croon der Eeren ontfanghen.

† 1.Cor. 9.d.25. 2.Tim. 4.b.8 Iacob. 1.b.12.

5

Des seluen ghelijcken, ghy Ionghers, weest onderdanich den Outsten. Al te samen, weset onder malcanderen onderdanich, ende houdet vast aen de ootmoedicheyt.^‡ Wandt God wederstaet den hooueerdigen, mer den ootmoedighen gheeft hy ghenade.

‡ Prou. 11.a.2. Mat. 11.e.29. Iaco. 4.a.6.

6

^* So verootmoedicht v nv, onder de gheweldighe handt Godts, op dat hy v verhooge tot siner tijt.

* Iob. 22.d.29

7

^† Alle uwe sorghe werpt op hem, want hy sorcht voor v.

† Psal. 55.c.23. Mat. 6.c.25. Luce. 12.c.22.

8

⁺ Weest nuchteren ende waket,^‡ want uwe Wederpartije de duyuel gaet rontom, als een grimmende Leeuwe, ende soect, wien hy verslinde:

+ B vers 8

‡ Iob. 1.b.7. 2.a.2. Ephe. 6.b.11.

9

Dien^* wederstaet vast int gelooue, ende wetet, dat uwe Broeders in der Werelt, euen dat selue lijden hebben.

* Iaco. 4.a.7

10

Maer de God alder ghenaden, die ons gheroepen heeft, tot zijnder eewiger heerlijcheyt, in Christo Iesu, die selue sal v^* (ghy die een cleyne tijt lijdet) volbereyden, stercken, crachtich maken, gronden.

* Roma. 8.c.18 1.Pet. 1.a.6. Hebr. 10.d.37

11

Den seluen sy Eere, ende Macht, van eewicheydt tot eewicheyt. Amen.

12

Door uwen getrouwen broeder Siluanum (als ick vermoede) heb ick v een weynich geschreuen, om te vermanen, ende te betuyghen, dat dat de rechte ghenade Godts is, daer ghy in staet.

13

V gruet, die tsamen met v wtuercoren zijn te Babylonia, ende mijn Soon Marcus.

14

Gruet v onder malcanderen,^† met den Cus der Liefden. Vrede sy met allen die in Christo Iesu zijn. Amen.

† Rom. 16.c.15. 1.Cor. 16.c.20. 2.Cor. 13.c.12. 1.Tess. 5.c.26.