Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ De Apostel leert dat wy ons tot lijden schicken sullen, seyt hoe dattet de werelt vreemt gheuen sal, om datmen niet meer met haer in dat onbehoorlijcke leuen en is, ende hoe si ons verspreken sullen, Wortmen om Christus wille versmaet, so is men salich.

1

⁺ DEwijle^‡ nv Christus inden vleesch voor ons geleden heeft, so wapent v oock met den seluen sin.^* Want wie aent vleesch lijdt, die hout op vanden sonden,

+ A vers 1

‡ Hebr. 12.a.2.

* Rom. 6.a.7.

2

^† Dat hy voort aen, watter noch ouerblijuighen tijt int vleesch is, niet den lusten der menscen, maer den wille Godts leue.

† Rom. 14.a.7 2.Cor. 5.c.15. Eph. 4.c.24. 1.Ioan. 2.c.17

3

^‡ Want het is ghenoech, dat wy den voorgangen tijt des leuens, toe ghebracht hebben, na den Heydenschen wille, doen wy wandelden in dertelheyt, lusten, dronckenheydt, brasserije, swelgherije, ende grouwelijcke Afgoderijen.

‡ Ro. 13.b.12.

4

Dat gheeft haer vreemt, dat ghy niet met haer en loopt, in dat selue woeste ongheordineerde wesen, ende lasteren:

5

Welcke sullen rekenschap geuen, dien, die daer bereydt is, te ordeelen de leuenden ende de dooden.

6

^† Want daer toe is oock den dooden

† Ioan. 5.c.25. 1.Pet. 3.c.19.

[p. 91v]

dat Euangelium vercondicht, op dat sy gheordeelt worden na den mensche aent vleesch, maer in den gheest Gode leuen.

7

^+* Dat eynde alder dinghen, is na by ghecomen.^† Soo zijt nv matich ende nuchteren totten ghebede.

+ B vers 7

* 2.Pet. 3.b.8. 1.Ioan. 2.c.18

† Mat. 24.d.42.

8

Maer voor alle dingen, hebt onder malcanderen een vierighe liefde.^‡ Want de liefde bedeckt oock de veelheyt der sonden.

‡ Pro. 10.b.12

9

^* Weest herberghich onder malcanderen sonder murmureren.

* Heb. 13.a.2.

10

^* Ende dient deen den anderen, een yeghelijc met der gaue, die hy ontfanghen heeft,^† als de goede Huyshouders der menigerley genade Godts.

* Prou. 3.b.9. 2.Cor. 8.b.11.

† 1.cor. 4.a.2.

11

^† Ist dat yemant spreect, dat hijt spreke als Godts woorden. Ist dat yemant een^‡ Ampt heeft, dat hijt doe als wt den vermoghen, dat Godt geeft: Op dat in allen dinghen Godt ghepresen worde, door Iesum Christum. Welcken sy eere ende ghewelt, van eewicheyt tot eewicheyt. Amen.

† Iere. 23.c.28.

‡ Rom. 12.b.7.

12

Ghy beminden,^* en laet v de hitte, (die v ouercoemt) niet selsaem zijn, op dat ghy ondersocht wordt, als oft v yet selsaems ouer quame:

* Luc. 12.f.49. 1.Cor. 3.b.13. 1.Pet. 1.b.7.

13

^+† Maer verhuecht v, dat ghy met Christo lijdet, op dat ghy oock ter tijt der openbaringhe zijnder heerlijckheyt, vruechde ende ghenuechte hebben muecht.

+ C vers 13

† Mat. 5.a.10 2.Tim. 2.b.12

14

^‡ Salich zijt ghy, wanneer ghy versmaet werdt, om den Naem Christi. Want de gheest, die een gheest der heerlijcheyt ende Godts is, rust op v: By haer is hy ghelastert, maer by v is hy ghepresen.

‡ Math. 5.a.10. Luce. 6.c.22.

15

^* Maer niemant onder v en lijde, als een Moorder, oft Dief, oft Misdader, oft die in een vreemt Ampt grijpt.

* 1.Pet. 2.c.20. 3.c.17.

16

Maer lijdet hy als een Christen, so en schame hy hem niet, maer hy eere Godt in der saken.

17

^† Want het is tijt, dat dat ordeel beghinne^‡ aen den huyse Godts: Ende ist dattet ten eersten aen ons [beghint] wat wil daer dan voor een eynde worden met dien,^* die den Euangelio Godts niet en gheloouen:

† Iere. 25.d.29. Ezech. 9.b.6.

‡ Hebr. 3.a.6.

* Luce. 10.b.12.

18

^† Ende ist dat de Rechtueerdighe nauwelijc behouden en wort, waer wil de Godtloose ende Sondaer verschijnen?

† Pro. 11.d.31. Luce. 23.c.30.

19

Daerom, die daer lijden nae den wille Godts, die sullen hem haer sielen beuelen, als den getrouwen Schepper, in goeden wercken.