Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel trect ons tot een onstraffelijck leuen, ende dat wy ons onthouden sullen van de vleesschelijcke lusten, die tegen de siele strijden. Datmen eerbiedich wesen sal tegen alle menschen. Lijden si om de waerheydt, Christus is haer Exempel ende voorbeelt.

1

⁺ SOo^* legt nv af alle boosheydt, ende alle bedriegherije, ende gheueynstheyt, ende haet, ende alle achterclappen,

+ A vers 1

* Ephe. 4.c.22. Collos. 3.a.8. Hebr. 12.a.2.

2

Ende weest begherich, Nae de vernuftighe louter melck,^† als de nieu gheboren kinderkens, op dat ghy door die selue^‡ toenemet,

† Math. 18.a.3.

‡ Ephe. 4.b.15

3

Ist dat ghy anders^* ghesmaect hebt, dat de Heere vriendelijck is.

* Ps. 34.a.9.

4

Tot welcken ghy ghecomen zijt,^† als tot den leuenden steen, die vanden menschen verworpen, maer by Gode vercoren ende costelijck is.

† Ephe. 2.c.19.

5

Ende oock ghy, als de leuende steenen, timmert v tot eenen gheestelijcken^‡ huyse, ende tot een heylich^* Priesterdom,^† te offeren gheestelijcke offerhanden, die Gode aenghenaem zijn, door Iesum Christum.

‡ Hebre. 3.a.6.

* Esa. 66.d.21

† Ro. 12.a.1. Hebre. 13.c.15

6

Daerom staet inder Schrift:^‡ Siet daer, ick legghe eenen wtuercoren costelijcken hoecksteen in Sion: Ende wie aen hem gelooft, die en sal niet te schanden worden.

‡ Esa. 28.c.16. Mat. 21.e.42 Acto. 4.a.11.

7

V nv, ghy die ghelooft, is hy costelijck: Maer den ongheloouighen,^* is die steen, welcken de Timmerlieden verworpen hebben, ende tot eenen hoecksteen gheworden is,

* Psal. 118.c.22. Mar. 12.a.10.

8

^† Een steen des aenstootens, ende een steenrootse der erghernisse,⁺ die haer stooten aen dat woort, ende en gheloouen daer niet aen, daer si op gheset zijn.

† Esai. 8.a.6.

+ B vers 8

9

^‡ Maer ghy zijt dat wtuercoren gheslacht, dat Conincklijcke Priesterdom,^* dat heylighe volck, dat volck des Eyghendoms,^† dat ghy vercondighen sult de duechden des gheens, die v geroepen heeft vander duysternis, tot sinen wonderbaerlijcken Lichte.

‡ Exod. 19.a.6.

* Deut. 7.b.16.

† Esa. 40.b.9 43.b.12.

10

^‡ Ghy die voortijden gheen volck en waert, maer nv Godts volck zijt: Ende voortijden niet in ghenade en waert, maer nv in genade zijt.

‡ Osee. 2.a.1. Rom. 9.c.26.

11

Lieue Broeders, ick vermaen v, als de vreemdelinghen ende Pelgrims,^* onthout v van vleesschelijcken lusten, welcke tegen de siele strijden.

* Ro. 13.b.14. Galat. 5.c.16.

12

^† Ende leydet een goede wandelinghe onder den Heydenen,^‡ op dat die, die van v achterclap doen, als van misdaders, uwe goede wercken sien, ende Godt prijsen, alst nv aenden dach comen sal.

† Mat. 5.b.16

‡ Titum. 2.b.8. 1.Petr. 3.b.16

13

^* Sijt onderdanich alder menschelijcker ordeninghe, om des Heeren wille: Het si den Coninck, als den Ouersten:

* Roma. 13.a.1. Titum. 3.a.1.

14

Oft den Hooftlieden, als den gesonden van hem, ter wrake ouer de Misdaders, ende tot Loue den vroomen.

15

Want dat is de wille Godts, dat ghy met weldoen toestopt de onwetenheyt der dwaser menschen.

16

Als de^‡ Vrijen, ende niet, als hadt ghy de vrijheyt tot een bedecsel der boosheyt, mer als de knechten Gods.

‡ Rom. 6.b.18. Galat. 5.a.1.

17

^† Doet alleman eere. Hebt de Broederen lief. Vreest God.^‡ Eert den Coninc.

† Rom. 12.b.10.

‡ Mat. 22.c.21

18

^+* Ghy huysknechten zijt onderdanich met alder vreesen den Heeren: Niet alleen den goeden ende vroomen, maer oock den wonderlijcken.

+ C vers 18

* Eph. 6.a.5. Collos. 3.c.23. Titum. 2.b.9.

19

^† Want dat is ghenade. Ist dat yemant om der consciencie willen tot Godt, dat quade verdraecht, ende lijdet dat onrecht.

† 2.cor. 7.b.10.

20

Want wat is dat voor een Roem, ist dat ghy om misdaets wille slaghen lijdet?

[p. 91r]

^* Maer als ghy om weldaets wille lijdet ende verdraecht, dat is genade by Gode.

* Math. 5.a.10 1.Pet. 3.c.14.

21

Want daer zijt ghy toe gheroepen, Nademael oock Christus geleden heeft voor ons, ende ons een^* voorbeelt ghelaten, dat ghy sult nauolghen zijn voetstappen:

* Ioan. 13.b.15. Philip. 2.a.5.

22

Die gheen sonde ghedaen en heeft, oock en isser geen bedroch in sinen mont geuonden:

23

^† Welcke niet weder en versprack, doen hy versproken werdt: Niet en dreychde, doen hy leedt: Maer hy gaft dien op, die daer recht oordeelt:

† Mat. 27.e.38. Ioan. 8.e.48

24

^‡ Die onse sonden selue geoffert heeft aen sinen lichame, op dat wy der sonden^* afghestoruen zijn, ende der gherechticheyt leuen: Door welcx wonden ghy zijt ghesont gheworden.

‡ Esaie. 53.a.8. 1.Ioan. 3.a.5.

* Ro. 6.b.10.

25

^† Wandt ghy waert, als de dwalende Schapen, maer ghy zijt nv bekeert, tot den Herder ende Bisschop uwer sielen.

† Esaie. 53.b.9. Ezec. 34.b.5. Luce. 15.a.4.