Den Bibel, Inhoudende dat Oude ende Nieuwe Testament (Biestkensbijbel)

¶ De eerste Epistel S. Peters.

¶ Dat .I. Capittel.

¶ In dit Capittel schrijft Petrus aen de wtuercoren verstroyden vreemdelinghen, hy verhaelt haer vande wedergheboorte, ende van de beproeuinghe des gheloofs, ende wattet eynde daer af is, ende noch vande liefde, ende wat de mensche is.

1

⁺ PEtrus een Apostel Iesu Christi. Den wtuercoren^‡ vreemdelinghen hier ende daer in Ponto, Galatia, Cappadocia, Asia ende Bithijnia,

+ A vers 1

‡ Acto. 8.a.4. Iacob. 1.a.1.

2

Nae de wtvoorsieninge Godts des Vaders, door de heyliginghe des geests, ter ghehoorsaemheyt, ende ter^* besprenginghe des bloets Iesu Christi.^† Godt geue v veel genade ende vrede.

* Hebre. 9.b.13 10.c.19.

† 2.Pet. 1.a.2.

3

^‡ Ghelouet sy God ende de Vader onses Heeren Iesu Christi, die ons na zijnder grooter barmherticheyt, weder ghebaert heeft tot een leuende hope,^* door de verrijsenisse Iesu Christi vanden dooden,

‡ 2.Cor. 1.a.3. Ephesi. 1.a.3.

* 1.Cor. 15.b.20

4

^† Tot een onuerganckelijcke ende onbeulecte, ende onuerwelcte erffenisse, die bewaert wort inden Hemel,

† Rom. 8.c.17 2.Tim. 1.b.10. Collos. 1.a.5.

5

V, ghy die wt Godts macht, door het ghelooue bewaert wort ter salicheydt, die daer bereydt is, dat sy geopenbaert worde, ter laetster tijt,

6

In welcken ghy v verblijden sult,^‡ ghy die nv eenen cleynen tijt^* (Ist dattet noodich is) truerich zijt in menigherley aenuechtinghe:

‡ Ioan. 16.c.20 1.Pet. 5.b.10. Hebr. 10.d.37

* 1.Pet. 3.c.17

7

^† Op dat uwe gelooue oprecht ende veel costelijcker beuonden worde, dan dat verganckelijcke gout (dat door dat vier gheproeft wordt) tot lof, prijs, ende eere,^‡ wanneer nv Iesus Christus gheopenbaert wort.

† Iob. 23.a.10. Eccli. 2.a.5. Iacob. 1.a.2.

‡ Mat. 25.c.31

8

⁺ Welcken ghy niet gesien, ende nochtans lief hebt:^* Ende nv aen hem ghelooft, hoe wel ghy hem niet en siet, So sult ghy v oock verblijden, met onwtsprekelijcker ende heerlijcker vruechden,

+ B vers 8

* Ioan. 20.d.29

9

Ende dat eynde uwes gelooues daer af brengen,

[p. 90v]

te weten, der sielen salicheyt.

10

Na welcker salicheyt, hebben ghesocht ende gheuraecht de^* Propheten, die vander toecomender ghenade op v, ghepropheteert hebben,

* Gen. 49.b.10 Dan. 2.g.44 Hagge. 2.b.8. Sach. 6.b.13.

11

^† Ende hebben ondersocht op welcke ende welckerley tijt, de gheest Christi, die in haer was, bediedde, ende heeft te voren betuycht,^‡ de lijdens die in Christo zijn, ende de heerlijcheyt daer na, dien het gheopenbaert is.

† Dan. 9.f.24

‡ Psal. 21.b.7. Esaie 53.a.5.

12

Want si en hebben niet haer seluen, maer ons daer in ghedient, welck v nv vercondicht is, door die, die v dat Euangelium vercondicht hebben,^* door den heyligen gheest vanden Hemel ghesonden,^† twelck oock de Enghelen ghelust te sien.

* Acto. 1.a.2. 2.a.4.

† Luce. 2.b.9.

13

⁺ Daerom so^‡ begordet de lendenen uwes gemoets, weest nuchteren, ende settet uwen hope gantschelijck op de ghenade, die v aengeboden wort, door de openbaringhe Iesu Christi,

+ C vers 13

‡ Luc. 12.d.35. Ephe. 6.c.14

14

Als ghehoorsame kinderen. Ende en stelt v niet, ghelijc als te voren, doen ghy in onwetenheyt nae den lusten leefdet:

15

Maer nae dien, die v gheroepen heeft, ende heylich is,^* weest oock ghy heylich, in alle uwe wandelinghe.

* Luce. 1.f.70.

16

Want daer staet gheschreuen:^† Ghy sult heylich zijn, wandt ick ben heylich.

† Leu. 11.g.44 19.a.2.

17

Ende nademael ghy dien tot eenen Vader aenroept,^† die sonder aensien der Persoonen ordeelt, na eens yeghelijcken werck, soo leydet uwe wandelinghe, soo langhe als ghy hier wandelt, met vreesen.

† Deut. 10.d.17 2.Par. 19.b.7 Iob. 34.b.19. Sapi. 6.b.8.

18

^‡ Ende weet, dat ghy niet met verganckelijc siluer oft gout, verlost en zijt, van uwe ydele wandelinghe, na der Vaderlijcker wijse:

‡ 1.Cor. 6.c.20 7.c.23.

19

Maer^* met den dierbaren bloede Christi, als eens ontschuldighen ende onbeulecten Lams.

* Acto. 20.d.28. 1.Ioan. 1.b.7 Hebr. 9.b.12. Apoca. 1.a.5.

20

Die^† wel te voren wtuoorsien is, eer der werelt gront gheleyt werdt, maer gheopenbaert tot den laetsten tijden, om uwen wille,

† Ro. 16.c.24 Ephesi. 1.b.9.

21

⁺ Ghy die door hem ghelooft aen Godt, die hem op verwect heeft vanden dooden,^‡ ende hem de heerlijckheyt ghegheuen, op dat ghy een ghelooue ende hope tot Godt, hebben mochtet.

+ D vers 21

‡ Acto. 2.c.33. Philip. 2.a.9.

22

Ende maect^* cuysch uwe sielen, in der ghehoorsaemheyt der waerheyt, door den gheest,^† tot ongheueynsder Broederlijcker liefden, ende hebt v onder malcanderen vierichlijck lief, wt reyner herte,

* Acto. 15.b.9.

† Rom. 12.b.10. 1.Pet. 4.b.8. Hebre. 13.a.1.

23

^‡ Als ghy die daer wederom gheboren zijt, niet wt verganclijcken, maer wt onuerganclijcken Sade, te weten, wt dat leuende woort Gods, dat daer eewelijck blijft.

‡ Iaco. 1.b.18.

24

^* Wandt alle het vleesch is als gras, ende alle heerlijcheyt des menscen, als de bloeme des gras. Dat gras is verdorret, ende de bloeme is afgheuallen,

* Esai. 40.a.6. Eccli. 14.b.16 Iacob. 1.b.10. 4.b.14.

25

^† Maer des Heeren woort blijft in eewicheydt.^‡ Ende dat is dat woort, dat onder v vercondicht is.

† mat. 24.d.35

‡ Deu. 30.c.14