Den Bibel, Inhoudende dat Oude ende Nieuwe Testament (Biestkensbijbel)

[p. 90r]

De Epistel S. Pauli aen Philemon.

¶ De Apostel bidt Philemonem, dat hy Onesimum weder ontfangen wilt, hem groetende.

1

PAulus de ghebonden Iesu Christi, ende Timotheus de Broeder. Philemoni den lieuen, ende onsen helper,

2

Ende Apphia der lieuer, ende Archippo onsen strijdt genoote, ende der ghemeynte in dijnen huyse.

3

^* Ghenade sy met v, ende vrede, van Gode onsen Vader, ende den Heere Iesu Christo.

* Roma. 1.a 7. 1.Cor. 1.a.3. 2.Cor. 1.a.2. Galat. 1.a.3.

4

^† Ick dancke mijnen Gode, ende ghedencke uwer altijt in mijnen ghebede,

† Collos. 1.a.3. 1.Tessa. 1.a.3. 2.Tessa. 1.a.3.

5

Nae dien ick hoore vander liefden ende den ghelooue, die ghy hebt aen den Heere Iesum, ende teghen allen Heylighen,

6

Dat dijn gelooue, dat wy met malcanderen hebben, in v crachtich worde, door kennisse alle des goeden, dat ghy hebt in Christo Iesu.

7

Ende wy hebben groote blijschap ende troost aen uwer liefden. Want de herten der Heylighen zijn vermaect door v lieue Broeder.

8

⁺ Daerom, hoe wel ick groote vrijmoedicheydt hebbe in Christo, v te ghebieden, wat v toebehoort,

+ B vers 8

9

So wil ick doch om der liefden wille, alleen vermanen, ick die een soodanich ben, te weten, een out Paulus, ende nv oock een ghebonden Iesu Christi.

10

Soo vermane ick v, om mijns soons willen^* Onesimi, dien ick^† gebaert heb in mijnen banden,

* Collos. 4.a.8.

† 1.Cor. 4.c.15 Gala. 4.b.19

11

Die v voortijts onnut, Maer nv v ende my wel nuttelijck is,

12

Dien heb ick v weder gesonden. Ende ghy, neemt hem doch, dat is mijn eyghen hert, aen.

13

Want ick wilde hem by my behouden, dat hy my in dijner stede diende, inden banden des Euangelij:

14

Maer sonder dijnen wille en wilde ickt niet doen, op dat dijn goet niet en ware ghedwonghen, maer vrijwillich.

15

⁺ Wandt misschien is hy daerom eenen tijt lanck van v ghecomen, op dat ghy hem eewelijck weder creecht:

+ C vers 15

16

Nv niet meer als eenen knecht, maer meer dan eenen knecht, eenen lieuen Broeder, sonderlinge my: Ende hoe veel meer v, beyde na den vleessche, ende inden Heere?

17

Ist dat ghy my nv hout voor uwen gheselle, so neemt hem, als my seluen, aen.

18

Ende heeft hy v erghens schade in ghedaen, oft is hy yet schuldich, dat rekent my toe.

19

Ic Paulus hebt gheschreuen met mijnder hant, ick wilt betalen, ick swijghe, dat ghy my v seluen schuldich zijt.

20

Ia lieue Broeder, gunt my, dat ick my aen v verquicke inden Heere: Vermaect mijn herte inden Heere.

21

Ick heb v, wt betrouwen uwer ghehoorsaemheyt, geschreuen, want ick wetet, ghy sult meer doen, dan ic segghe.

22

Daer beneuen bereyt my de Herberghe: Wandt ick hope, dat ick v door uwe ghebet, geschenct worde.

23

V groet^* Epaphras mijn mede gheuanghen in Christo Iesu,^† Marcus,^‡ Aristarchus,^* Demas, Lucas, mijn Helpers.

* Collos. 1.a.7. 4.b.12.

† Col. 4.a.9.

‡ Act. 27.a.2.

* Col. 4.b.13.

24

De ghenade onses Heeren Iesu Christi, sy met uwen gheeste, Amen.

¶ Gheschreuen van Rome, door Onesimon.