Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel vermaent Titum dat hijse onderwijse die oudt ende Ionck zijn, hoe dat sy haer houden sullen, ende dat hy haer in allen dinghen een Exempel ende Voorbeelt der goeder wercken zijn sal. Ende verhaelt voort de heylsame ghenade ende goedertierenheyt Gods, alle menschen verschenen door Iesum Christum.

1

⁺ MAer spreeckt ghy, ghelijck alst betaemt, nae der heylsamer leere.

+ A vers 1

2

Den Ouden, dat sy nuchteren zijn, eerlijck, tuchtich, gesont int ghelooue, inder liefde, inder lijdtsaemheyt.

3

^* Den Ouden Vrouwen des seluen ghelijcx, dat sy haer stellen als den Heylighen betaemt,^† gheen Lasterschen en zijn, gheen Wijnsuypsters, goede Leererschen:

* 1.Tim. 2.b.9. 1.Petr. 3.a.3.

† 1.Tim. 3.b.11

4

Dat sy den Ionghen vroomen leeren tuchtich zijn, haer Mannen lief te hebben, kinderen lief te hebben,

5

Sedich zijn, cuysch, huyslijck, goedertieren,^‡ haer Mannen onderdanich, op dat dat Woordt Godts niet ghelastert en worde.

‡ Genes. 3.c.16. Ephe. 5.c.22. Coloss. 3.c.18. 1.Petri. 3.a.1.

6

Des ghelijcx vermaent oock de Ionghe Mannen, dat si tuchtich zijn.

7

^* Maer ouer al, settet v seluen tot een voorbeelt der goeder wercken, met onuerualschter leeringhe, met eerlijckheyt, met heylsamen ende onstraffelijcken woorde,

* 1.Timot. 4.b.12. 1.Petr. 5.b.3.

8

^† Op dat de Wederstrijder hem schame, ende niet en hebbe, dat hy quaets van ons mach segghen.

† 1.Pet. 2.b.12. 3.b.16.

9

^+‡ Den knechten dat si haren heeren onderdanich zijn, in allen dinghen te wille zijn, niet wederbassen,

+ B vers 9

‡ Ephe. 6.a.5. Coloss. 3.c.22. 1.Tim. 6.a.1. 1.Pet. 2.c.18.

10

Niet ontrou en zijn, maer alle goede trou bewijsen, op dat sy de leere Godts onses Salichmakers vercieren, in allen stucken.

11

Want de heylsame ghenade Gods, is verschenen allen menschen,

12

Ende onderwijst ons, dat wy sullen versaken dat ongodlijcke wesen, ende de^* wereltlijcke lusten,^† ende soberlijck, gherechtelijck, ende Godtsalichlijck leuen in deser werelt,

* 1.Ioan. 2.c.15.

† Eph. 1.a.4.

13

Ende verwachten op de^‡ salighe hopinghe, ende verschijninge der heerlijcheyt des grooten Gods ende onses Salichmakers Iesu Christi,

‡ Mat. 25.c.34 1.Cor. 1.a.6.

14

Die^* hemseluen voor ons ghegheuen heeft, op dat hy ons verloste van alder ongherechticheyt, ende hemseluen^† reynichde een volck tot een Eygendom, dat neerstich ware^‡ tot goeden wercken.

* Roma. 8.a.3. Galat. 1.a.4. 2.d.21. Hebr. 9.c.14.

† Acto. 15.b.8 Ephe. 5.c.26.

‡ Ephe. 2.b.9

15

Sulcx segt ende vermaent, ende straft met ganschen ernste.^* En laet v niemant verachten.

* 1.Timot. 4.b.12.