Den Bibel, Inhoudende dat Oude ende Nieuwe Testament (Biestkensbijbel)

De Epistel S. Pauli, aen Titum.

¶ Dat .I. Capittel.

¶ De Apostel leert Titum hoe hy Ouders ordineren sal, ende hoe si onstraffelijck ende eender vrouwen Man moeten zijn, ende hoemen de quade straffen sal.

1

⁺ PAulus een Knecht Godts, maer een^* apostel Iesu Christi, Nae den gelooue der wtuercoren Gods, ende de kennisse der waerheyt tot Godtsalicheyt, inder hope des eewighen leuens,

+ A vers 1

* 2.Tim. 1.b.11.

2

Welck beloeft heeft,^† die niet en liecht, Godt,^‡ voor den tijden der werelt,

† Rom. 3.a.4.

‡ Ro. 16.d.24 Ephesi. 1.b.9. 3.b.9. Colos. 1.d.26.

3

Maer heeft gheopenbaert, tot zijnder tijt, zijn woort, door de prekinghe, die my toe betrout is, na den beueel Godts onses Salichmakers.

4

^* Tito mijnen oprechten sone, nae onser beyder ghelooue.^† Ghenade, barmherticheydt, vrede, van Gode den Vader, ende den Heere Iesu Christo, onsen Salichmaker.

* 2.Corint. 8.b.16.

† Rom. 1.a.7. Ephesi. 1.a.2. Philip. 1.a.2.

5

⁺ Om dies wille liet ick v in Creta, dat ghijt voort sout volbrenghen, daer ickt gelaten hebbe,^‡ ende besetten de Steden hier ende daer met Outsten, als ick v beuolen hebbe.

+ B vers 5

‡ 2.Tim. 2.a.2.

6

^* Ist dat yemant is onstraffelijck, eens Wijfs Man, die gheloouighe kinderen heeft, niet beruchtet, dat sy Swelghers, oft onghehoorsaem zijn.

* 1.Tim. 3.a.2.

7

Want een Bisschop moet onstraffelijck zijn, als een^† Huyshouder Godts, niet eyghensinnich, niet toornich, gheen^‡ Wijnsuyper, niet bijtich, gheen oneerlijcke hanteringhe drijuen,

† Matth. 24.d.45.

‡ Leui. 10.b.9 Ephe. 5.b.18.

8

Maer herbergich, goedertieren,^† tuchtich, rechtueerdich, heylich, cuysch,

† Matich.

9

Ende houde vast ouer den woorde, dat ghewis is, ende leeren can:^‡ Op dat hy machtich si, te vermanen door de heylsame leere, ende te straffen de Wedersprekers.

‡ 2.Esd. 4.c.17

10

⁺ Want^* daer zijn veel wederspannighe ende onnutte Clappers, ende Verleyders sonderlinghe die wt der besnijdinghe,

+ C vers 10

* Actor. 15.a.1.

11

Welcke men moet den mont stoppen,^† die daer gantsche huysen verkeeren, ende leeren dat niet en dooch, om schandelijcx ghewins wille.

† Mat. 23.b.13. 2.Tim. 3.a.6.

12

Een van haer, haer eyghen Propheet, heeft geseyt:^‡ De Creten zijn altijt lueghenaers, boose dieren, ende luye buycken.

‡ Epimenides.

13

Dit ghetuychnis is waer. Om der oorsaken wille, straftse scherpelijck, op dat sy ghesont zijn int gelooue,

14

Ende niet en achten op de Iootsche Fabulen,^‡ ende menschen geboden, die vander waerheyt afweynden.

‡ Esaie. 29.c.13. Matt. 15.a.9. Colos. 2.d.22.

[p. 89v]

15

^* Den reynen is alle dinc reyn:^† Maer den onreynen ende ongheloouigen en is niet reyn: Maer onreyn is beyde, haer sin ende conscientie.

* Rom. 14.c.20

† mat. 23.c.24

16

Sy segghen: Sy bekennen Godt: Maer met den wercken verloochenen zijt, Nademael sy die zijn, aen welcken Godt eenen grouwel heeft, ende en hooren niet, ende zijn tot allen goeden wercke onnutte.