Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ De Apostel voorseyt veel quaets, datter gheschieden sal, ende begheert dat Timotheus tot hem come, ende groet de vrienden.

1

⁺ SOo^* betuyghe ick nv voor Gode, ende den Heere Iesu Christo, die daer toecomende is,^† te ordeelen, de leuenden ende de dooden, met zijnder verschijninghe, ende met sinen Rijcke:

+ A vers 1

* Roma. 1.a.9. 9.a.1. 1.Tim. 5.c.21. 6.c.13.

† Act. 10.e.42 1.Pet. 4.a.5.

2

Predict dat woordt, hout aen, het sy ter rechter tijt, oft ter ontijt, straft, dreycht, vermaent, met alder verduldicheyt ende leere.

3

Wandt daer sal een tijt zijn, dat sy de heylsame leere niet lijden en sullen, maer nae haren eyghen lusten, sullen sy haer seluen Leeraers opladen,

4

Nae welcken haer de ooren iuecken: Ende sullen de ooren vander waerheyt weynden, ende haer tot den Fabulen keeren.

5

Maer weest ghy nuchteren ouer al, lijdt v, Doet dat werck eens Euangelischen Predikers, richt dijn Ampt redelijck wt.

6

^‡ Wandt ick worde alreede geoffert, ende de tijt mijns verscheydens is voorhanden.

‡ 2.Pet. 1.c.14.

[p. 89r]

7

Ick heb eenen goeden strijt ghestreden, Ick heb den loop voleyndt, ick heb ghelooue ghehouden.

8

⁺ Nv voort aen is my bygheleyt de^* Croon der gherechticheyt, welcke my de Heere in ghenen dach, de rechtueerdighe Richter, gheuen sal. Ende niet my alleen, maer oock allen, die zijne verschijninghe liefhebben.

+ B vers 8

* 1.Cor. 9.d.25. 1.Petr. 5.a.4

9

Weest neerstich, dat ghy haest tot my coemt.

10

Want^† Demas heeft my verlaten, ende dese werelt lief ghecreghen, ende is na Tessalonien ghetoghen, Crescens in Galatien, Titus in Dalmacien.

† Colos. 4.b.13 Philem. c.23.

11

^‡ Lucas is alleen by my: Marcum neemt tot v, ende brengt hem met v, Want hy is my nuttelijck tot den dienst.

‡ Colos. 4.a.13

12

^* Tychicum heb ick na Epheso gesonden.

* Acto. 20.a.4. Colos. 4.a.6.

13

Den Mantel dien ick te Troada liet by Carpo, brengt mede wanneer ghy coemt, ende de Boecken, maer sonderlinghe dat Pergament.

14

^† Alexander de Smit, heeft my veel quaets bewesen, de Heere betale hem na zijnen wercken,

† 1.Tim. 1.c.20.

15

Voor welcken wacht v oock. Want hy heeft onsen woorden seer wederstaen.

16

⁺ In mijn eerste verantwoordinghe, en stont niemant by my, maer sy verlieten my alle. Het en sy haer niet toegerekent.

+ C vers 16

17

Maer de Heere stont by my, ende stercte my, op dat de prekinghe, door my beuesticht werde, ende alle Heydenen het hoorden.

18

Ende ick ben verlost vander kelen des Leeus. Ende de Heere sal my verlossen van allen quade, ende wt helpen, tot zijnen Hemelschen Rijcke, Welcken si eere, van eewicheyt tot eewicheyt, Amen.

19

Groet Priscam ende^* Aquilam, ende dat huys Onesiphori.

* Actor. 18.a.2. Rom. 16.a.3.

20

^† Erastus bleef te Corinthen. Ende Trophinum liet ick te Mileto cranc.

† Act. 20.a.4. 21.d.29. Rom. 16.c.22.

21

Doet neersticheyt dat ghy voor den winter coemt. V groet Eubulus ende Pudens ende Linus, ende Claudia, ende alle Broederen.

22

De Heere Iesus Christus^‡ sy met dijnen gheeste. De ghenade sy met v. Amen.

‡ Philem. c.24

¶ Aen Timotheum de tweede Epistel. Gheschreuen van Rome, doen Paulus ten anderen mael, voor den Keyser Nero ghebracht wert.