Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ De Apostel leert ons dat inde laetste daghen seer periculues wesen sal, daer sullen zijn menscen, die veel van haer seluen sullen houden, altijt sullen sy leeren, maer en comen niet tot de waerheyt, maer si wederstaen die.

1

⁺ MAer dat sult ghy weten:^* Dat inden laetsten daghen, sullen grouwelijcke tijden comen.

+ A vers 1

* 1.Tim. 4.a.1. 2.Petri. 3.a.3. Iude. c.18.

2

Wandt daer sullen menschen zijn, die van haer seluen veel houden, ghierich, grootsprekers, hooueerdich, Lasteraers, den Ouderen onghehoorsaem, ondanckbaer, ongheestelijck,

3

Stuer, hartneckich, onuersoenlijck, schenders, oncuysch, wildt, ongoedertieren,

4

Verraders, vermeters, opgheblasen, die meer lief hebben den wellust, dan Godt,

5

Die daer hebben den schijn eens Godtsalighen wesens, maer zijn cracht versaken si.

6

^* Ende sulcken vermijdt.^† Vanden seluen zijn, die hier ende daer inde huysen sluypen, ende leyden de Wijfkens gheuanghen, die met sonden beladen, ende met menigherley lusten verstrict zijn,

* Mat. 18.b.18.

† Titum. 1.c.11.

7

Leeren altijt, ende en connen nemmermeer tot bekennisse der waerheydt comen.

8

^‡ Maer ghelijckerwijs, als Iannes ende Iambres, Mosy wederstonden, also wederstaen oock dese der waerheyt. Het zijn menschen van verdoruen sinnen, ongheschickt tot den ghelooue,

‡ Exod. 7.b.11. d.22.

9

Maer sy en sullens niet wtuoeren. Wandt haer dwaesheydt sal openbaer worden alleman, ghelijck als oock gener was.

10

⁺ Maer ghy hebt achteruolcht mijn leere, mijn wijse, mijn meyninghe, mijn ghelooue, mijn lanckmoedicheydt, mijn liefde, mijn verduldicheyt,

+ B vers 10

11

Mijn veruolghingen, mijn lijden, dier my gheschiet zijn te^* Antiochia, te Iconio, te Lystran, welcke veruolghingen ick daer leedt,^† ende van allen heeft my de Heere verlost.

* Acto. 13.e.50. 14.a.2.

† 2.Cor. 1.b.10

12

^‡ Ende alle, die Godsalichlijck willen leuen in Christo Iesu, die moeten veruolghinghe lijden.

‡ Eccli. 2.a.4. Psal. 34.c.20. Esai. 59.c.15.Luce. 24.d.25

13

Maer met den boosen menschen ende verleyders, wort het hoe langher hoe ergher, Sy verleyden, ende worden verleyt.

14

^* Maer blijft ghy int ghene, dat ghy gheleert hebt, ende v toebetrout is. Nademael ghy wetet, van wien ghy geleert hebt.

* 2.Tim. 1.c.13.

15

Ende dewijle dat ghy van kintsheydt op, de heylighe Schrift wetet, can v die selue onderwijsen ter salicheyt, door den ghelooue in Christum Iesum.

16

^† Want alle Schrift van Godt inghegheuen, is nutte ter leere, ter straffinghe, ter beteringhe, ter onderwijsinghe, in gherechticheyt,

† 2.Pet. 1.d.21.

17

Dat een mensche Godts, sy volcomen, tot alle goede werck gheschict.