Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel is sorchuuldich om Timotheum te brenghen totter Officien der prekinghen, ende vermaent hem dat hy die begheerte der Ionckheydt schouwen soude.

1

⁺ SOo weest nv sterck mijn sone, door de ghenade in Christo Iesu.

+ A vers 1

2

Ende wat ghy van my gehoort hebt, door veel ghetuyghen,^* dat beueelt ghetrouwen menschen die daer toe dueghen, ooc anderen te leeren.

* Titum. 1.b.6.

3

Lijdt v, als een goet Strijder Iesu Christi.

4

^† Gheen Crijchsman en menghet hem in handelinghe der neeringhe, op dat hy behage dien, die hem aengenomen heeft.

† 1.Cor. 9.d.25.

5

Ende al ist dat oock yemant vechtet, soo en wordt hy doch niet ghecroont, hy en vechte dan recht.

6

^‡ Maer den Ackerman, die den Acker bouwet, behoort der vruchten ten alder eersten te ghenieten.

‡ 1.Cor. 9.b.10.

7

Merct, wat ick seg. De Heere sal v in allen dinghen verstant gheuen.

8

Hout in ghedachtenisse Iesum Christum, die weder opghestaen is vanden dooden, wt den^* Sade Dauids, na mijnen Euangelio,

* Esaie. 11.a.1. Actor. 13.d.23. Roma. 1.a.3.

9

Ouer welcken ick my lijde tot aen de banden, als een Misdader, mer Gods woort en is niet gebonden.

10

^* Daerom lijde ickt altemael, om der

* Act. 20.c.24 Ephe. 3.b.13. Collo. 1.c.24.

[p. 88v]

wtuercoren wille, op dat si oock de salicheyt vercrijgen in Christo Iesu, met der eewigher heerlijcheyt.

11

⁺ Dat is ymmer ghewisselijc waer.^* Steruen wy mede, soo sullen wy mede leuen:

+ B vers 11

* Rom. 6.b.8.

12

^† Verdragen wy, soo sullen wy mede heerschappen:^‡ Versaken wy, soo sal hy ons oock versaken.

† Ro. 8.b.17.

‡ Luce. 12.a.9.

13

^* En gheloouen wy niet, soo blijft hy ghetrou, hy en can hemseluen niet versaken.

* Nu. 23.c.19. Roma. 3.a.6.

14

Sulcx vermaent haer, ende betuyghet voor den Heere, dat sy niet om woorden en twisten, welck niet nut en is, dan af te weynden, die daer toe hooren.

15

Sijt neerstich v seluen Gode te bewijsen eenen oprechten ende onstraflijcken^† Arbeyder, die daer recht deyle dat woordt der waerheyt.

† mat. 24.d.45

16

^‡ Des ongheestlijcken onnutten gheclaps ontslaet v. Want het helpt veel tot een ongodlijc wesen,

‡ 1.tim. 1.a.4 4.a.7. 6.d.20 2.Tim. 2.c.23. Titum. 1.b.14. 3.b.9.

17

Ende haer woort eet om hem als de Kancker: Onder welcken is^* Hymeneus ende Philetus,

* 1.tim. 1.c.20

18

Die der waerheyt ghemist hebben, ende segghen:^† De verrijsenisse sy alreede gheschiet, ende hebben sommigher ghelooue verkeert.

† 1.cor. 15.b.12

19

Maer de vaste gront Godts bestaet, ende heeft desen Segel:^‡ De Heere kent de zijnen: Ende van ongherechticheydt trede af, wie den Naem Christi noemt.

‡ Ioan. 10.b.14

20

^+* Maer in een groot huys en zijn niet alleen Gulden en Silueren Vaten, maer oock houtene ende Aerdene. Ende sommighe ter eeren, maer sommige ter oneeren.

+ C vers 20

* Roma. 9.c.21

21

Ist dat hem nv yemant reynicht van sulcken Lieden, die sal een geheylicht Vat zijn, tot der eeren, den Huysheere orbaerlijck, ende tot allen goeden wercke bereydt.

22

Vliet de lusten der Iuecht,^† maer iaecht nae der gherechticheyt, den ghelooue, der liefden, den vrede,^‡ met allen die den Heere aenroepen, van reynen herte.

† 1.Tim. 6.b.11

‡ 1.Cor. 1.a.2.

23

^* Maer der sotachtighen ende onnutten vragen, ontslaet v. Want ghy weet, dat si alleen twist maken.

* 1.Tim. 1.a.4. 4.a.7. 6.a.4. 2.Tim. 2.b.16 Titum. 3.b.9.

24

Maer een knecht des Heeren en moet niet twistich zijn, maer vriendelijck teghen alleman,^† leerachtich, die de boosen verdraghen can,

† 1.Tim. 3.a.2.

25

Met^‡ saechtmoedicheyt, ende straffe de wederspannighen, oft haer Godt eenmael boete gaue, de waerheydt te bekennen,

‡ Gala. 6.a.1.

26

Ende weder nuchteren werden wt des Duyuels strick, van dien si gheuanghen zijn, nae sinen wille.