Den Bibel, Inhoudende dat Oude ende Nieuwe Testament (Biestkensbijbel)

De tweede Epistel S. Pauli aen Timotheum.

¶ Dat .I. Capittel.

¶ De Apostel vermaent Timotheum dat hy sterckelijck Christum preken sal, midts datter luttel Predicanten zijn, ende vertelt hoe die in Asia hem af ghekeert zijn.

1

⁺ PAulus een Apostel Iesu Christi, door den wille Godts, na der beloftenisse des leuens, in Christo Iesu.

+ A vers 1

2

Mijnen lieuen Sone Timotheo.^* Ghenade, bermherticheyt, vrede van Gode den Vader, ende Christo Iesu onsen Heere.

* 2.Corin. 1.a.2. Galat. 1.a.3. 1.Petri. 1.a.2.

3

Ick dancke Gode,^† dien ick diene van mijnen Voorouderen aen in reynder conscientien,^‡ dat ic dijner sonder ophouden ghedencke in mijn gebet, dach ende nacht:

† Acto. 22.a.3. Philip. 3.a.5.

‡ Rom. 1.a.9.

4

^* Ende my verlangt v te sien (wanneer ick ghedachtich ben uwer tranen) op dat ick met blijschap veruult werde,

* 1.Tess. 3.b.10.

5

Ende vermane my des ongeueynsden geloofs in v, welcke te voren ghewoont heeft in dijner Grootmoeder Loide, ende in dijner Moeder Eunike: Ende ick ben seker, dat oock in v.

6

Om welcker saken wille, ick v vermaen, dat ghy verweckt de gaue Gods, die in v is,^† door de oplegginghe mijnder handen.

† Acto. 6.a.6. 8.b.16. 13.a.3. 19.a.6.

7

^‡ Wandt Godt en heeft ons niet ghegheuen den gheest der vreesen, maer der cracht ende der liefden, ende der^* tucht.

‡ Rom. 8.b.15

* Maticheyt.

8

^+† Daerom so en schaemt v niet, des ghetuychnis onses Heeren, noch mijnder,^‡ ick die zijn ghebonden ben: Maer lijdt v met den Euangelio, als ick, na der cracht Godts.

+ B vers 8

† Eccli. 42.b.24. Rom. 1.b.16.

‡ Ephes. 3.a.1.

9

^* Die ons heeft salich ghemaect, ende geroepen met een heylighe roepinghe. Niet nae onsen wercken, maer na zijn opset ende ghenade, die ons ghegheuen is in Christo Iesu, voor der tijt der werelt.

* Eph. 1.a.4. Titum. 3.a.4.

10

^† Maer nv gheopenbaert door der verschijninghe onses Salichmakers Iesu Christi:^‡ Die den doot de macht heeft benomen, ende dat leuen ende een onuerganckelijck wesen int Licht ghebracht, door dat Euangelium:

† Ro. 16.d.24. Ephe. 1.b.9. 3.b.9. Collo. 1.d.26.

‡ Esai. 25.b.8. 1.Cor. 15.f.54 Hebr. 2.c.14.

11

^* Tot welcken ick gheset ben een Prediker ende Apostel, ende Leeraer der Heydenen:

* Act. 9.b.15. 13.a.2. 22.d.21 Roma. 1.a.1. 1.Tim. 2.a.7.

12

Om welcker saken wille, ick sulcx lijde, Maer ick en schame my dies niet. Want ic weet, aen welcken ick ghelooue, ende ben seker, dat hy my mijn^† bylegsel can bewaren, tot ghenen dach toe.

† Oft schadt.

13

^+‡ Hout v nae den voorbeelde der heylsamer woorden, die ghy van my gehoort hebt, vanden ghelooue, ende vander liefden in Christo Iesu.

+ C vers 13

‡ 2.Ti. 3.b.14

14

Dit goede^† bylegsel bewaert door den Heylighen Gheest, die in ons woont.

† Oft schadt.

15

Dat weet ghy, dat haer van my gheweynt hebben, alle die in^* Asia woonen, onder welcken is Phygellus ende Hermogenes.

* Acto. 19.a.10.

16

De Heere gheue barmherticheyt den huyse^† Onesiphori, want hy heeft my dickwils vermaect, ende en heeft hem mijnder Ketenen niet gheschaemt:

† 2.Tim. 4.c.19

17

Maer doen hy te Romen was,^‡ socht hy my opt alder neerstichste, ende vant my.

‡ Mat. 25.e.37

18

De Heere gheue hem, dat hy vinde barmherticheyt byden Heere, aen genen dach. Ende hoe veel hy my tot Epheso ghedient heeft, weet ghy alder best.