Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ De Apostel vermaent de knechten die onder dat Iock zijn, hoe sy met haer heeren omgaen sullen, ende dat wy ons met voetsel ende decksel souden laten ghenoeghen, om dat de ghene die rijck willen zijn, in veel becoringhen vallen.

1

⁺ DE^* knechten, die onder dat Iock zijn, sullen haer heeren alder eeren weerdich achten, op dat de Naem Godts, ende de leeringhe niet ghelastert en worde.

+ A vers 1

* 1.Cor. 7.c.21. Ephe. 6.a.5. Coloss. 3.d.22. 1.Petr. 2.c.18.

2

Maer die gheloouighe heeren hebben, die en sullen de seluen niet verachten (met den schijne) dat sy Broederen zijn, maer sullen veel meer dienstbaer zijn, dewijle dat sy gheloouich ende bemint, ende der weldaet deelachtich zijn. Sulcx leert ende vermaent.

3

^† Ist dat yemant anders leert, ende niet en blijft byden heylsamen woorden onses Heeren Iesu Christi, ende byder leere vander Godtsalicheyt,

† Galat. 1.b.9.

4

Die is verduystert, ende en weet niet, maer is suchtich in vraghen ende woortcrijgen,^‡ wt welcken ontspringt, nijdt, twist, lasteringhe, quade vermoeden,

‡ 1.Ttm. 1.a.4. 2.Tim. 2.c.23. Titum. 3.b.9.

5

Scoelghekijf, sulcker menschen, die verdoruen sinnen hebben, ende der waerheyt berooft zijn, die daer meynen, de Godtsalicheyt sy een handel. Hout v van sulcken.

6

^+* Maer het is een groot gewin, wie Godtsalich is, ende laet hem ghenoeghen.

+ B vers 6

* Pro. 15.b.16. Hebr. 13.a.5.

7

Want^† wy en hebben niet inder werelt ghebracht, daerom ist openbaer, wy en sullen daer oock niet wt brenghen.

† Iob. 1.c.21.

8

^‡ Maer wanneer wy cost ende cleedinghe hebben, soo latet ons ghenoeghen.

‡ Eccli. 29.d.28

9

^* Want die daer rijck willen worden, die vallen in becoringhe, ende stricken, ende veel dwase ende schandelijcke lusten, die de menschen versincken int verderuen ende verdoemenis.

* Prou. 11.c.14 23.a.4. Matt. 13.c.22. Iacobi. 5.a.1.

10

^† Want de giericheyt is een wortel van alle quaet, welcke heeft sommighen ghelust, ende zijn vanden ghelooue verdwaelt, ende maken haer seluen veel smerten.

† Exod. 23.a.8. Prou. 15.c.27

11

⁺ Maer ghy mensche Godts, vliet sulcx.^‡ Maer iaecht nader gherechticheyt, der Godtsalicheyt, den ghelooue, der liefden, der verduldicheydt, der saechtmoedicheyt.

+ C vers 11

‡ 2.Tim. 2.c.22.

12

^* Strijdet eenen goeden strijt des ghelooues, aengrijpt dat eewich leuen, daer toe ghy oock gheroepen zijt, ende bekent hebt een goede bekennisse voor veel ghetuyghen.

* 1.Tim. 1.c.18.

13

^* Ick ghebiede v voor Gode,^† die alle dinck leuendich maeckt, ende voor Christo Iesu, die onder^‡ Pontio Pilato betuycht heeft, een goede bekennisse,

* 1.Tim. 5.c.21.

† 2.Reg. 2.b.6

‡ mat. 27.b.11. Ioan. 18.e.33.

14

Dat ghy dat ghebot hout sonder beuleckinghe, onstraffelijck, tot op de verschijninghe onses Heeren Iesu Christi,

15

Welcke tot zijnder tijt vertoonen sal, die salighe, ende alleen gheweldighe, de^* Coninck alder Coninghen, ende Heere alder Heeren,

* Apo. 17.c.14. 19.c.16.

16

Die alleen onsterf-

[p. 88r]

lijckheyt heeft, Die daer woont in een Licht, daer niemant toecomen en can,^* welcken gheen mensche gesien en heeft, noch sien en can, Dien sy eere ende het eewich Rijck, Amen.

* Exod. 33.d.20 Ioan. 1.b.18. 1.Ioan. 4.b.12

17

⁺ Den rijcken van deser werelt, gebiet, dat si niet stout en zijn,^† oock niet en hopen op den onsekeren rijckdom, maer op den leuenden Godt, die ons gheeft rijckelijck alderley te ghenieten,

+ D vers 17

† Mar. 4.b.18. Luce. 12.b.15.

18

Dat sy wat goets doen, rijck worden aen goeden wercken, gheerne geuen, behulpelijc zijn,

19

^‡ Schatten vergaderen, haer seluen eenen goeden grondt op dat toecomende, op dat si vercrijghen dat eewige leuen.

‡ Mat. 6.c.20. 19.c.21. Luce. 12.d.33. 16.b.9.

20

O Timothee, bewaert dat v toe betrout is, ende^* vermijdet dat ongheestelijcke onnutte geclap, ende den twist, der valscher beroemder Const,

* 1.Timot. 1.a.4. 4.b.7. 2.Tim. 2.b.17 Titum. 1.c.14 3.b.9.

21

Welcke sommighe voorgheuen, ende missen des gheloofs. De ghenade sy met v. Amen.

Gheschreuen van Laodicea, die daer is een Hooftstadt des Lants Phrygia Pacatiana.