Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ De Apostel leert, welcke rechte Weduwen zijn, Ende hoe haer de ghemeynte tegen de Ouders hebben sal, die wel regieren oft die daer sondighen: Hy wil dattet neerstich onderhouden wort.

1

⁺ EEnen^† Ouden en schelt niet, maer vermaent hem als eenen Vader: De Ionghen als de Broederen:

+ A vers 1

† Leuit. 19.g.32

2

De Oude Vrouwen als de Moederen:

[p. 87v]

De Ionghen, als de Susteren met alder cuysheyt.

3

Eert de Weduwen, die daer rechte Weduwen zijn.

4

Maer ist dat eenighe kinderen oft kints kinderen heeft, sulcke laet te voren leeren, haer eygen huysen goddelijc regeren, ende den Ouderen gelijc vergelden.

5

Want dat is wel gedaen, ende aengenaem voor Godt.^* Maer dat is een rechte Weduwe, die eensaem is, die haer hope op Godt set, ende blijuet aenden gebede ende smeecken, dach ende nacht.

* Luce. 2.f.36. 1.Cor. 7.d.32.

6

Maer die in wellusten leeft, die is leuendich doot.

7

Sulcx ghebiet, op dat sy onstraflijck zijn.

8

^† Mer ist dat yemant de zijne, sonderlinge zijn Huysgenooten, niet en besorcht, die heeft dat gelooue versaect, ende is argher dan een Heyden.

† Galat. 6.b.12

9

⁺ En laet geen Weduwe vercoren worden onder tsestich Iaren, ende die daer gheweest sy, eens Mans Wijf,

+ B vers 9

10

Ende ghetuychnis hebbe der goeder wercken: Ist dat si kinderen opgeuoet heeft, Ist dat si^‡ herbergich gheweest is,^* Ist dat si der Heyligen voeten ghewasschen heeft, ist dat si den bedroefden hantreyckinge ghedaen heeft, ist dat si tot allen goeden wercke, ghestadelijck neerstich gheweest is.

‡ 1.Pet. 4.b.9.

* Gen. 18.a.4 19.a.2. Ioan. 13.b.14

11

Maer der Ionger Weduwen ontslaet v. Want wanneer si weeldich geworden zijn tegen Christum, so willen si trouwen,

12

Ende hebben haer ordeel, dat si dat eerste ghelooue ghebroken hebben,

13

Daer by zijn sy luy, ende leeren rontsom loopen door de huysen.^† Niet alleen en zijn sy luy, maer oock clappich ende nueswijs, ende spreken dat niet en behoort.

† Titum. 2.a.3.

14

^‡ So wil ic nv, dat de Ionge Weduwen houwelijcken, kinderen baren, huyshouden, den Wederseggher geen oorsaeck en gheuen te scelden.

‡ 1.Cor. 7.a.9.

15

Want daer zijn alreede sommighe omghekeert, na den Satana.

16

Maer ist dat een geloouich Man, oft een gheloouich Wijf, Weduwen heeft, die besorghe die selue, ende en late de ghemeynte niet beswaert worden, op dat die, die rechte Weduwen zijn, ghenoech mogen hebben.

17

^+* De Outsten, die wel voorstaen, die houdemen dubbelder eeren weerdich, sonderlinghe die daer arbeyden int woort, ende inder leere.

+ C vers 17

* 1.Tess. 5.b.12. Heb. 13.b.17.

18

Want de Scrift spreect:^† Ghy en sult den Ossche den mont niet toebinden, die daer dorschet.^‡ Ende een arbeyder is zijns loons weert.

† Deut. 25.a.4. 1.Cor. 9.b.9.

‡ Mat. 10.a.10

19

Tegen eenen Outsten en neemt gheen clacht aen,^* sonder twee oft drie ghetuyghen.

* Deut. 19.c.15. Mat. 18.b.16.

20

Die daer sondighen, die straft voor allen, op dat oock de anderen vreese hebben.

21

^† Ick betuyghe voor Gode, ende den Heere Iesu Christo, ende den wtuercoren Engelen,^‡ dat ghy sulcx hout sonder goetduncken, ende niet en doet na gunst.

† 1.Tim. 6.c.13.

‡ Deut. 17.a.2.

22

^† En legt niemant haest de handen op. En maect v oock niet deelachtich vreemder sonden. Hout v seluen cuysch.

† Actor. 6.a.6. 1.tim. 4.b.14 2.Tim. 1.b.6.

23

^† En drinct gheen water meer, maer ghebruycket een weynich Wijns, on uwer maghe willen, ende om dat ghy dicwils cranck zijt.

† Eccli. 31.d.32

24

Sommigher menschen sonden^‡ zijn openbaer, datmense te voren ordeelen can: Maer sommigher worden namaels openbaer.

‡ Galat. 5.c.19.

25

Des ghelijcken oock, sommigher goede wercken zijn te voren openbaer, ende de anderen en blijuen oock niet verborghen.