Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Paulus propheteert, hoe dat inde laetste tijden sommighe van den ghelooue wijcken sullen, ende aenhangen de valsche leeringhen. Ghebiet datmen de ionckheydt niet verachten en sal, maer haer een voorbeelt zijn.

1

⁺ MAer de Gheest seyt bediedelijck,^* dat inden laetsten tijden, sommighe sullen vanden ghelooue^† af treden, ende aen hanghen den verleyachtighen gheesten, ende leeringen der duyuelen,

+ A vers 1

* 2.Tim. 3.a.1. 2.Pet. 2.a.1. 3.a.3. Iude. 1.c.18.

† 2.Tes. 2.a.3.

2

Door die, die in gheueynstheyt Lueghensprekers zijn, ende branteeckenen in haer conscientie hebben,

3

Ende verbieden te houwelijcken, ende te schouwen de^‡ spijse, die Godt gheschapen heeft, te ontfanghen^* met dancksegghinghe, den gheloouigen, ende dien, die de waerheyt bekennen.

‡ Gene. 1.d.29. 9.a.3.

* mat. 26.c.25 Acto. 27.d.35.

4

^† Wandt alle Creatuere Gods is goet, ende niet verwerplijc, dat met dancksegghinghe ontfanghen wort,

† Gen. 1.d.29. Eccli. 39.c.30. Acto. 10.b.15. Ro. 14.b.14.

5

Want het wort gheheylicht, door dat woort Godts ende dat ghebet.

6

Wanneer ghy den broederen sulcks voorhout, soo sult ghy een goet dienaer Iesu Christi zijn, als die^‡ opgheuoedet zijt, in den woorden des gheloofs, ende der goeder leere, by welcker ghy ghestadelijc gheweest hebt.

‡ 2.tim. 3.b.14.

7

^* Der ongheestelijcken ende outwijfschen Fabulen, ontslaet v. Oeffent v seluen inder Godtsalicheydt,

* 1.Tim. 1.a.4. 6.d.20. 2.Tim. 2.b.16

8

^+† Want de lichamelijcke oeffeninghe is weynich nut: Maer de Godsdiensticheydt is tot alle dinck nut, ende heeft de Beloftenisse, deses, ende des toecomenden leuens.

+ B vers 8

† Col. 2.c.23.

9

Dat is ymmer ghewisselijck waer, ende een dierbaer weerdich woort.

10

Want daer toe arbeyden wy oock, ende worden beschimpt, dat wy op den leuenden Godt ghehoopt hebben, Die daer is de Salichmaker alder menschen, maer sonderlinghe der gheloouighen.

11

Sulcks ghebiet ende leert.

12

^‡ Niemandt en verachte uwe Ionckheydt,^* maer weest een voorbeelde den gheloouighen int woort, inden wandel, inder liefde, inden gheest, inden ghelooue, inder cuysheyt.

‡ Titum. 2.b.15

* Titum. 2.a.7. 1.Petri. 5.a.3.

13

Doet neersticheyt met lesen, met vermanen, met leeren, tot dat ick come.

14

En weest niet onachtsaem der gaue, die v ghegheuen is door de Prophetie, met^† hantoplegghinge der Outsten.

† Actor. 6.a.6. 8.b.16. 13.a.3. 1.Tim. 5.d.22. 2.Tim. 1.b.6.

15

Sulcx neemt waer, daer gaet mede om, op dat dijn toenemen in allen dinghen openbaer sy.

16

Hebt acht op v seluen, ende op de leeringhe, Blijft in dese stucken. Want doet ghy sulcx, soo sult ghy v seluen salich maken, ende die v hooren.