Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ De Apostel leert, hoe dat een Leeraer onstraffelijck, ende eender vrouwen man moet zijn, oock gheen nieuwelinck, maer hebbende een goet ghetuychenisse van die daer buyten zijn. Ende hoe de Dienaers ende vrouwen sullen wesen.

1

⁺ DAt is ghewislijck waer, ist dat yemant een Bisschops Ampt begeert die begheert een costelijck werck.

+ A vers 1

2

Maer een Bisschop moet ontstraflijc zijn,^* eender vrouwen man, nuchteren, matich, sedich, herbergich,^† leerachtich,

* Leuit. 21.b.13. Eze. 44.d.21 Titum. 1.b.6.

† 2.Tim. 2.c.24.

3

Gheen wijnsuyper, niet bijtich, gheen oneerlijcke hanteringhe drijuen, maer vriendelijck, niet kijfachtich, niet gierich,

4

Die zijn eyghen huys wel voorstae, die ghehoorsame kinderen hebbe met alder eerlijcheyt.

5

(Maer is dat yemant zijnen eyghen huyse niet en weet voor te staen, hoe sal hy dan de gemeynte Gods besorghen?)

6

Gheen nieuwelinck, op dat hy hem niet op en blase, ende den Lasteraer int oordeel valle.

7

^† Hy moet oock een goede ghetuychenis hebben, van den ghenen, die daer buyten zijn, op dat hy den Lasteraer niet inde versmaetheyt ende stricke en valle.

† Deut. 1.c.13. Acto. 1.d.21. 6.a.3. 16.a.2.

8

⁺ Des seluen ghelijcken, de^‡ Dienaers sullen wesen eerlijck, niet tweetonghich, gheen wijnsuypers, gheen oneerlijcke hanteringhe drijuen,

+ B vers 8

‡ Acto. 6.a.3.

9

Die de^* verborghenheyt des geloofs in reyner conscientie hebben.

* 1.Tim. 1.c.19.

10

Ende de selue latemen te voren besoecken: Daer na latemense dienen, wanneer sy onstraffelijck zijn.

11

Des ghelijcx haer wijuen sullen zijn eerlijck, gheene lastersen, nuchteren, trou in allen dinghen.

12

De Dienaers laet eenen yegelijcken zijn, eens wijfs Man, die haren kinderen wel voorstaen, ende haer eyghen huysen.

13

^† Die wel dienen, die vercrijghen haerseluen eenen goeden graet, ende een groote vrijmoedicheyt int ghelooue, in Christo Iesu.

† Mat. 25.b.21.

14

Sulcx scrijue ick v, ende hope opt alder eerst tot v te comen. Maer oft ickt vertoge, dat ghy wetet, hoe ghy sult wandelen in den huyse Gods, welcke is de Gemeynte des leuenden Gods, een^† Pilaern ende fondament der waerheyt.

† Mat. 16.c.18.

15

Ende onwedersprekelijck groot is de Godtsalige verholentheyt:^‡ Godt is gheopenbaert inden vleesche, gherechtueerdicht in den gheest,^* verschenen den Enghelen,^† ghepredict den Heydenen, ghelooft van der Wereldt,^‡ aenghenomen inder heerlijcheyt.

‡ Ioan. 1.b.14.

* Luce. 2.b.14.

† Ephe. 3.b.5.

‡ Phil. 2.a.9.