Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel leert hoemen bidden sal voor alle menschen, voor de Coninghen, voor alle Ouerheyt, op datmen in alle Godtsalicheyt ende vrede leuen mach. Dat is voor Godt aenghenaem, die wil dat alle menschen tot de kennisse der waerheydt comen souden, int eynde hoe haer de vrouwen hebben sullen.

1

⁺ SOo vermaen ick nv, datmen voor alle dingen ten eersten doe, bidden, gebeden, voorbiddinghen, ende danckseggingen voor alle menschen,

+ A vers 1

2

^† Voor de Coningen, ende voor alle Ouerheyt, op dat wy een gherustelijck ende stil leuen leyden moghen, in alder Godtsalicheyt ende eerlijcheyt.

† Iere. 29.b.7. Baruc. 1.c.11.

3

Want sulcx is goet, daer toe ooc aenghenaem voor Godt onsen Salichmaker:

4

^* Die daer wil, dat allen menscen gheholpen worden, ende tot bekennisse der waerheyt comen.

* Ezech. 18.c.23 2.Pet. 3.b.9.

5

Want daer is^† een Godt,^‡ ende een Middelaer tusschen God ende de menschen, te weten, de mensche Iesus Christus,

† Ioan. 17.a.3.

‡ Galat. 3.c.20 Hebre. 9.c.15.

6

Die hem seluen ghegheuen heeft voor allen ter verlossinge, dat sulcx tot zijnder tijt ghepredickt werde:

7

Daer ick een Prediker ende Apostel toe gheset ben,^* (Ick seg de waerheyt in Christo, ende en lieghe niet) een Leeraer der Heydenen, in den ghelooue ende in der waerheyt.

* Roma. 1.a.9. 2.Tim. 1.b.3.

8

⁺ Soo wil ick nv, dat de mannen bidden aen^† allen plaetsen, ende opheffen^‡ heylighe handen, sonder toorn ende twijfel.

+ B vers 8

† Ioan. 4.c.21.

‡ Ps. 134.a.2. Esaie 1.b.15.

9

^* Des seluen ghelijcken de vrouwen, dat si haer in eenen cierlijcken cleede, met schamelheyt ende eerbaerheyt, vercieren, niet met vlechten, oft gout, oft peerlen, oft costelijcke ghewade:

* Titum. 2.a.3. 1.Petri. 3.a.3.

10

Maer ghelijc alst den vrouwen betaemt, die daer Godsalicheyt bewijsen, door goede wercken.

11

^† Een vrouwe leere swijghende, met

† Luce. 2.f.38. 1.cor. 14.e.34

[p. 87r]

alder onderdanicheyt.

12

Maer eender vrouwen en laet ick niet toe, dat sy leere,^* ooc niet, dat sy des mans heere sy, maer stil sy.

* Genes. 3.c.16. Ephe. 5.c.24.

13

Want Adam is ten eersten gemaect, daer na Heua:

14

Ende Adam en wert niet verleydt,^† maer de vrouwe wert verleydt, ende heeft de ouertredinghe ingheuoert.

† Genes. 3.a.6.

15

Maer sy sal salich worden door kinderbaren, ist dat sy blijuen int ghelooue, ende inder liefde, ende in der heylichmakinghe, met der eerbaerheyt.