Den Bibel, Inhoudende dat Oude ende Nieuwe Testament (Biestkensbijbel)

[p. 86v]

¶ De eerste Epistel S. Pauli, aen Timotheum.

¶ Dat .I. Capittel.

¶ De Apostel vermaent Timotheum dat hy de gheboden der Wet niet houden en sal, ende danckt Godt, dat hy hem totter Apostelschap geroepen heeft, Ende ghebiet hem dat hy hem in de Scrift oeffenen soude. Verhaelt van Hymeneus ende Alexander, die hy ghebannen hadde, op dat sy haer beteren souden.

1

⁺ PAulus een Apostel Iesu Christi,^* nae den beuele Gods onses Salichmakers, ende des Heeren Iesu Christi,^† die onse hope is.

+ A vers 1

* Actor. 9.b.10.

† Collos. 1.d.27 1.Tessa. 1.a.3.

2

^‡ Timotheo, mijnen oprechten sone in den ghelooue.^* Ghenade, bermherticheyt, vrede, van Gode onsen Vader, ende onsen Heere Iesu Christo.

‡ Acto. 16.a.1.

* 1.Corin. 1.a.2. Galat. 1.a.3.

3

Als ick v vermaent hebbe, dat ghy tot Epheso bleeft,^† doen ick in Macedonien tooch, ende ghebodet sommighen: Dat sy niet anders en leerden,

† Actor. 19.c.21. 20.a.1.

4

Oock gheen^‡ acht en hadden op de Fabulen, ende der gheslacht Register, die gheen eynde en hebben, en brenghen meer vraghen op, dan beteringhe tot Godt in den ghelooue.

‡ 2.Ti. 2.c.16. Titum. 3.b.9.

5

^* Want de Hooftsumme des gebots is: Liefde van^† reynen herte, ende van goeder conscientie, ende van onbeueynsden gelooue.

* Rom. 13.b.8. Gala. 5.b.14.

† Act. 15.b.9.

6

Van welcke hebben sommighe ghemist, ende zijn omghekeert tot onnutten clappen:

7

Willen der Schrift meesters zijn, ende en verstaen niet, wat si segghen, ofte wat si setten.

8

^+‡ Maer wy weten, dat de Wet goet is, ist dat die yemant recht ghebruyckt:

+ B vers 8

‡ Roma. 7.b.12

9

^* Ende weet sulcx, Namelijc, dat den Rechtueerdighen gheen Wet gegeuen en is, maer den onrechtueerdigen ende ongehoorsamen, den godtloosen ende sondaren, den onheylighen ende ongeestelijcken, den vadermoorders, ende moedermoorders, den dootslaghers,

* Galat. 5.c.23.

10

Den Hoereniagers, den^† Ionghenscheynders, den menschdieuen, den Lueghenaers, den meyneedighen, ende ist datter wat meer der saligher leere tegen is,

† Rom. 1.d.27. 1.Cor. 6.b.10.

11

Na den heerlijcken Euangelio des salighen Godts, dat my toe betrout is.

12

Ende ick dancke onsen Heere Christo Iesu, die my sterck ghemaect, ende trouwe gheacht heeft, ende gheset in dat Ampt,

13

Ick die te voren was een Lasteraer,^‡ ende een Veruolgher, ende een Versmader: Maer my is bermherticheyt gheschiet, want ick hebt^* onwetende gedaen inden onghelooue.

‡ Actor. 8.a.3. 9.a.1. 22.a.4. Galat. 1.b.13.

* Ioan. 9.d.39. Actor. 3.c.17.

14

Maer de ghenade onses Heeren is dies te rijcker gheweest, tsamen met den gelooue ende der liefde, die in Christo Iesu is.

15

⁺ Want dat is ymmer ghewislijck waer, ende een dierbaer weerdich woort,^† Dat Christus Iesus gecomen is in de Werelt, de Sondaren salich te maken, onder welcken ic de voornaemste ben.

+ C vers 15

† Math. 9.b.13 Ioan. 3.c.17.

16

Maer daerom is my bermherticheyt geschiet, op dat aen my voornamelijck Iesus Christus bewijsde alle verduldicheit, dien tot een Exempel, die aen hem geloouen souden, ten eewighen leuen.

17

Maer Gode den eewigen^‡ Coninck, den onuergancklijcken ende^* onsichtbaren, ende alleen Wijsen, sy Eere ende prijs, in eewicheyt, Amen.

‡ Ierem. 23.a.5.

* Coll. 1.b.15.

18

Dit ghebodt beueel ick v, mijn soon Timothee, nae de voorgaende Prophetien ouer v,^† dat ghy in den seluen een goede Ridderschap oeffent,

† 1.Tim. 6.b.12

19

Ende hebt den gelooue, ende een goede conscientie, welcke sommighe van haer ghestooten, ende aen den ghelooue schipbrekinge geleden hebben:

20

Onder welcken is^* Hymeneus ende^† Alexander,^‡ die ick den Satana ghegheuen hebbe, op dat si gheleert worden, niet meer te lasteren.

* 2.Tim. 2.b.17

† 2.Tim. 4.b.14.

‡ 1.Cor. 5.a.3.