Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ De Apostel begheert dat sy voor hem bidden souden, op dat dat woort Godts mochte voort gaen ende ghepresen worden. Vermaent dat sy haer eyghen broot eten souden.

1

⁺ VVort, lieue Broederen,^* biddet voor ons, dat dat woordt des Heeren loope, ende ghepresen worde, ghelijck als by v,

+ A vers 1

* Mat. 9.d.38. Ephe. 6.c.19. Collos. 4.a.3.

2

Ende dat wy verlost worden vanden onaerdighen ende erghen menschen.^† Wandt dat ghelooue en is niet alle mans dinck.

† Ioan. 6.e.44.

3

Maer de Heere is ghetrou, die sal v stercken ende bewaren voor den quaden.

4

Maer wy betrouwen op v inden Heere, dat ghy doet ende doen sult, wat wy v ghebieden.

5

De Heere^‡ stuere uwe herten tot der Liefde Gods, ende tot der verduldicheyt Christi,

‡ Deu. 29.a.4. 30.b.6. Iere. 24.b.7.

6

^* Maer wy ghebieden v lieue Broederen, inden Naem onses Heeren Iesu Christi, dat ghy v ontrecket van allen broeder, die onordelijck wandelt, ende niet na der settinge, die hy van ons ontfanghen heeft.

* 1.Cor. 5.b.11 2.Tess. 3.c.14. Titum. 3.b.10

7

^† Want ghy weet, hoe ghy ons sult na volghen. Wandt wy en zijn niet onordelijck onder v gheweest,

† 1.Cor. 4.c.16. 10.d.34. 1.Tess. 1.b.6.

8

Wy en hebben oock niet dat broot van yemant om niet ghenomen:^‡ Maer met arbeyt ende moeyte, dach ende nacht hebben wy ghewracht, dat wy niemant onder v beswaerlijck en waren.

‡ Acto. 18.a.3. 20.e.34. 1.Cor. 4.b.12 Ephe. 4.c.28.

9

⁺ Niet daerom, dat wy des geen macht en hebben, maer om dat wy ons seluen v tot een voorbeelt gauen, ons na te volghen.

+ B vers 9

10

Ende doen wy by v waren, gheboden wy v sulcx, Dat, Ist dat yemandt niet en wil arbeyden, die en sal oock niet eten.

11

Want wy hooren, dat sommige onder v onordelijc wandelen, ende en arbeyden niet, maer drijuen onnutten handel.

12

^* Maer sulcken ghebieden wy, ende vermanen haer, door onsen Heere Iesum Christum, dat si met stillen wesen arbeyden, ende haer eygen broot eten.

* Ephe. 4.c.28. 1.Tessa. 4.b.14.

13

Maer ghy lieue Broeders,^† en wordet niet verdrietich wat goets te doen.

† Galat. 6.a.11.

14

Maer ist datter yemandt niet ghehoorsaem en is onsen woorde, dien teeckent aen door eenen Brief,^‡ ende en hebt niet met hem te doen, op dat hy beschaemt worde.

‡ Mat. 18.c.17. 1.Cor. 5.b.8. 2.Tess. 3.a.6.

15

Doch en hout hem niet als eenen Viant: Maer vermaent hem als eenen Broeder.

16

Ende hy, de Heere des vredes, gheue v vrede ouer al, ende op alderley wijse. De Heere sy met v allen.

17

^* De gruet met mijnder handt Pauli, dat is dat teecken in allen Brieuen, also schrijue ick:

* Collo. 4.b.18

18

De^* genade onses Heeren Iesu Christi sy met v allen, Amen.

* Phil. 4.c.23. 1.Tess. 5.c.28.

¶ Gheschreuen van Athenen.