Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel bidt dat sy haer niet en

[p. 86r]

souden laten beweghen noch verleyden van haren sin, dat sy de gene niet gheloouen en souden, die daer seggen, den dach des Heeren sy nv hier, Mer dat si stantuastich blijuen sullen, int ghene dat si gheleert hebben.

1

⁺ MAer van der toecoemst wegen onses Heeren Iesu Christi, ende onser vergaderinghe tot hem, bidden wy v lieue broederen,

+ A vers 1

2

^* Dat ghy v niet haestelijck en laet beweghen van uwen sin, noch verschricken, noch door gheest, noch door woorden, noch door brieuen, als van ons gheseynt,^† dat de dach Christi voor handen sy.

* Iere. 29.b.8. Mat. 24.a.4 Ephe. 5.a.6.

† 2.Pet. 3.a.4.

3

Laet v niemant verleyden in gheenderley wijse. Wandt hy en coemt niet, het en sy dan, dat te voren de^‡ afual come, ende gheopenbaert worde de mensch der sonden, ende dat kint der verderuinghe,

‡ Dani. 9.c.27. 1.Tim. 4.a.1. 1.Ioan. 2.b.18

4

Die daer is een^* Wedersaker, ende hem seluen verheft bouen al dat God ofte Gods dienst heet, alsoo, dat hy hem seluen sedt in den^† tempel Gods als een God,^‡ ende geeft voor, hy sy Godt.

* Luc. 11.c.24

† 1.Cor. 3.b.16. 6.c.19. 2.Cor. 6.c.16.

‡ Dan. 11.c.31.

5

En ghedenckt ghy daer niet aen, dat ick v sulcx seyde, doen ick noch by v was?

6

Ende wat het noch ophout, weet ghy, dat hy gheopenbaert worde tot zijnder tijt.

7

^* Want de boosheyt ruert haer al reede heymelijcken, behaluen alleen dat die, diet nv ophoudt, moet wech ghenomen worden.

* 1.Ioan. 2.c.19

8

⁺ Ende als dan sal de boosachtige gheopenbaert worden,^† welcken de Heere sal verdoen met den gheest zijns monts, ende sal zijnder een eynde maken, door de verschijninghe zijnder toecoemst,

+ B vers 8

† Iob. 15.d.30. Esai. 11.a.4. Dani. 8.d.25.

9

Des, welcks toecoemst geschiet^‡ nae der werckinghe des Satans,^* met alderley lueghenachtighe crachten, ende teekenen ende wonderheden,

‡ Ioan. 8.d.41.

* Deut. 13.a.1. mat. 24.b.24 Apoca. 13.c.13.

10

Ende met alderley verleydinghe ter ongerechticheyt onder den ghenen die verloren worden: Daer voor, dat si de liefde ter waerheyt niet en hebben aenghenomen, dat si salich werden.

11

^† Daerom sal haer Godt crachtighe dwalinghe seynden, dat si gheloouen der lueghene,

† Sacha. 5.a.3. Rom. 1.d.26.

12

Op dat gheordeelt worden alle, die der waerheyt niet en gheloouen,^‡ maer hebben lust aen der ongherechticheyt.

‡ Ozee. 7.a.1.

13

Maer wy sullen Gode dancken altijt om v, beminde broederen van den Heere, dat v Godt vercoren heeft van aenbeghin ter Salicheyt, inder^‡ heylichmakinge des gheests, ende in den ghelooue der waerheyt,

‡ 1.Petri. 1.a.2.

14

Daer hy v in geroepen heeft, door onse Euangelium, tot den heerlijcken Eyghendom onses Heeren Iesu Christi.

15

So staet nv lieue Broeders, ende houdet de settinghen, die v gheleert zijn, het sy door onse woort ofte Epistel.

16

Ende hy, onse Heere Iesus Christus, ende Godt ende onse Vader, die ons lief heeft ghehadt, ende ghegheuen eenen eewighen troost, ende een goede hope, door ghenade,

17

Die trooste uwe herten, ende stercke v in alderley leere ende goeden wercken.