Den Bibel, Inhoudende dat Oude ende Nieuwe Testament (Biestkensbijbel)

De tweede Epistel S. Pauli, tot den Thessalonicensen.

¶ Dat .I. Capittel.

¶ De Apostel danckt Godt vander goede verkeeringhe der Thessalonicensen, ende verhaelt hoe dattet haer gaen sal die den Euangelium niet ghehoorsaem en zijn geweest, Hoe hy hem in zijn Heylighen verclaren sal.

1

⁺ PAulus ende Siluanus ende Timotheus. Der ghemeynte te Thessalonien, in Godt onsen Vader ende den Heere Iesu Christo.

+ A vers 1

2

^* Ghenade si met v ende vrede, van Godt onsen Vader, ende den Heere Iesu Christo.

* 2.Cor. 1.a.2. Ephesi. 1.a.2.

3

^† Wy sullen Gode altijt dancken om v, lieue broederen, gelijct behoorlijck is. Want uwe ghelooue wast seer, ende de liefde eens yeghelijcken onder v allen, neempt toe teghen malcanderen,

† Ephe. 1.b.15. Philip. 1.a.3. Coloss. 1.a.3. 1.Tess. 1.a.2.

4

Also, dat wy ons uwer beroemen onder de ghemeynten Gods, van nwe verduldicheyt ende ghelooue, in allen uwen veruolgingen ende droeffenissen, die ghy verdraecht,

5

Welck bewijst dat Godt recht richten sal, ende ghy weerdich wort tot den rijcke Godts, om welcken ghy oock lijdt.

6

⁺ Nae^† dien het recht is by Gode, te verghelden de droeffenisse, den ghenen, die v droeffenisse aendoen:

+ B vers 6

† Sach. 2.c.19.

7

Maer v, ghy die droeffenis lijdt, ruste met ons,^‡ wanneer nv de Heere Iesus sal gheopenbaert worden van den Hemel, met den Engelen zijnder cracht,

‡ Mat. 24.c.30 25.c.31.

8

^* Ende met vyervlammen wrake te gheuen, ouer die, die Godt niet en bekennen, ende ouer die^† die niet ghehoorsaem en zijn den Euangelio onses Heeren Iesu Christi:

* 2.Pet. 3.a.7.

† Roma. 2.a.8.

9

^‡ Welcke sullen pijne lijden, dat eewighe verderuen,^* van den aenghesichte des Heeren, ende van zijnder heerlijcker macht,

‡ Sapi. 5.c.14.

* Esai. 2.b.10.

10

^† Wanneer hy comen sal, ende dat hy heerlijck verschijne met zijnen Heylighen, ende wonderlijck met allen gheloouighen. Want onse ghetuychenisse aen v, vanden seluen daghe, hebt ghy ghelooft.

† Actor. 1.b.11. Apoc. 1.b.7.

11

^‡ Ende daerom bidden wy oock altijt voor v, dat onse Godt v weerdich make des beroepens, ende veruulle alle welbehaghen der ghenaden, ende dat werck des gheloofs inder cracht,

‡ Coloss. 1.a.3.

12

Op dat aen v ghepresen worde, de Naem onses Heeren Iesu Christi, ende ghy aen hem, na der ghenade onses Godts, ende des Heeren Iesu Christi.