Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ De Apostel waerscout die van Tessalonica, vanden toecomenden daghe des doots, ende van dat ordeel Gods int generael, ende vermaentse dat sy haer wel hebben sullen teghen haren naesten ende haren Godt.

1

⁺ MAer vanden tijden ende stonden lieue broeders, en is niet van nooden v

+ A vers 1

[p. 85v]

te schrijuen.

2

Wandt ghy wetet selue ghewislijck, dat de dach des Heeren sal comen,^* ghelijck een Dief inder nacht.

* mat. 24.d.43 2.Pet. 3.b.10. Apocal. 3.a.3. 16.c.15.

3

Want wanneer si sullen segghen: Het is vrede, het en is gheen perijckel,^† soo sal haer dat verderuen snellijck oueruallen, ghelijck als de smerte een beuruchte vrouwe, ende en sullen niet ontulieden.

† Iere. 15.b.6. Luce. 21.d.32.

4

Maer ghy, lieue broeders, en weset niet inder duysternis, dat v de dach ghelijck een dief begrijpe:

5

Ghy zijt altemael kinderen^‡ des lichts, ende kinderen des daechs. Wy en zijn niet van der nacht, noch vander duysternis.

‡ Ephe. 5.a.8.

6

^* Soo en laet ons nv niet slapen, ghelijc de anderen, maer laet ons waken ende nuchteren zijn.

* Rom. 13.b.13. Ephe. 5.b.14

7

Wandt die daer slapen, die slapen des nachts, ende die daer droncken zijn, die zijn des nachts droncken.

8

Maer wy, wy die des daechs zijn, sullen nuchteren zijn, aenghedaen^† met den Kreeft des gheloofs, ende der Liefden, ende met den Helm des hopes ter salicheyt.

† Esai. 59.c.17. Sapien. 5.c.19 Ephe. 6.b.17.

9

⁺ Want Godt en heeft ons niet gheset tot toorn, maer de salicheyt te vercrijgen door onsen Heere Iesum Christum,

+ B vers 9

10

^‡ Die voor ons ghestoruen is, op dat,^* wy waken ofte slapen, te samen met hem leuen sullen.

‡ 2.Cor. 5.b.15.

* Ro. 14.b.7. Galat. 2.d.20

11

^† Daerom vermaent v onder malcanderen, ende stichtet een den anderen, ghelijck ghy oock doet.

† Ro. 15.b.14

12

Wy bidden v, lieue Broeders,^‡ dat ghy bekent die aen v arbeyden, ende v voorstaen in den Heere, ende v vermanen,

‡ Galat. 6.a.8. 1.Tim. 5.c.17. Phili. 2.d.29. Hebr. 13.b.7.

13

Hebt haer dies te lieuer, om haers wercx wille, ende weset vreedtsaem met haer.

14

Wy vermanen v, lieue broederen, vermaent de ongeordineerden, troost de cleynmoedighen, draecht de swacken, weset verduldich teghen alle man.

15

^* Siet toe datter niemant quaet met quaet en vergelde:⁺ Maer iaghet altijt na dat goede, beyde onder malcanderen, ende teghen alle man.

* Prou. 20.c.22. Matt. 5.e.39. Rom. 12.c.17.

+ C vers 15

16

^† Weset altijd vrolijck,

† Phi. 4.a.4

17

^‡ Biddet sonder ophouden,

‡ 1.Reg. 1.b.12 Luce. 18.a.1.

18

^* Weest dancbaer in allen dinghen. Want dat is den wille Gods in Christo Iesu, aen v.

* Eph. 5.b.20.

19

^† Den gheest en dempet niet,

† 1.Cor. 14.d.30.

20

De Prophetien en veracht niet.

21

Proeuet alle dinck, ende dat goede behout.

22

^‡ Mijdet allen boosen schijn.

‡ 2.mac. 6.d.14

23

Ende hy de Godt des vredes, heylighe v door ende door, ende uwe gansche gheest, tsamen met der siele, ende den Lijue, moeten bewaert worden onstraflijck, op de toecoemst onses Heeren Iesu Christi.

24

^* Ghetrouwe is hy, die v roept, die salt oock doen.

* 2.Cor. 1.a.7. 10.b.13.

25

Lieue Broeders, bidt voor ons.

26

^† Gruet alle broederen met den heylighen Cus.

† Ro. 16.b.15. 1.Cor. 16.c.20. 2.Cor. 13.b.12 1.Pet. 5.b.14

27

Ick besweere v by den Heere, dat ghy dese Epistel laet lesen allen heyligen Broederen.

28

De ghenade onses Heeren Iesu Christi si met v, Amen.

¶ Tot den Thessalonicensen de eerste. Ghescreuen van Athenen.