Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ De Apostel vermaent haer dat sy na de geboden souden wandelen, die hy haer door den Heere Iesum ghegheuen heeft, dat sy haer vander oncuysheyt wachten souden, Ende hoe de wtuercoren den Heere te ghemoete comen sullen in der Locht, ende eewich by hem leuen.

1

⁺ VOorder lieue Broeders,^* bidden wy v, ende vermanen in den Heere Iesu, na dien ghy van ons ontfanghen hebt, hoe dat ghy sult^† wandelen ende Gode behaghen, dat ghy ymmer volcomender wordet.

+ A vers 1

* 1.Corin. 1.b.9

† Philip. 1.d.27 1.Tess. 2.b.12.

2

Want ghy weet, wat wy v voor gheboden ghegheuen hebben door den Heere Iesum.

3

Want dat is^† de wille Gods uwe heyliginghe, dat ghy mijdet de hoererije,

† Roma. 12.a.2. Ephe. 5.b.17.

4

^‡ Ende een yegelijck van v zijn vat wete te houden, in heyliginghe ende eere:

‡ Tob. 6.b.16 1.Cor. 7.a.2.

5

Niet in der Lustsieckte,^* als de Heydenen, die van Gode niet en weten.

* Rom. 1.c.28.

6

Ende dat niemant te wijt en grijpe, noch zijnen Broeder bedrieghe in der hanteringhe. Want de Heere is de Wreker ouer dat alle, ghelijck wy v te voren gheseyt ende betuycht hebben.

7

Want Godt en heeft ons niet gheroepen tot onreynicheyt, maer tot heyliginghe.

8

^† Wie nv veracht, die en veracht gheenen mensch, maer Godt,^‡ die zijnen heylighen Gheest in v ghegheuen heeft.

† Luce. 10.b.16.

‡ 1.Cor. 3.b.16 6.c.19.

9

^+* Maer van de broederlijcke Liefde, en is niet van nooden v te scrijuen, want ghy zijt selue van Gode gheleert, v onder malcanderen lief te hebben:

+ B vers 9

* Leu. 19.d.18 Ioan. 13.d.34 15.b.17. Ephesi. 5.a.2. 1.Tessa. 1.a.3. 1.Pet. 4.b.8. 1.Ioan. 3.c.23.

10

Ende dat doet ghy oock aen allen broederen, die in geheel Macedonia zijn. Maer wy vermanen v, lieue broeders, dat ghy noch volcomender wordet.

11

Ende worstelt daer nae, dat ghy stil zijt, ende dat uwe waerneemt,^† ende arbeyt met uwen eyghen handen, ghelijck wy v gheboden hebben:

† Acto. 20.c.34. Ephe. 4.d.28 2.Tess. 3.b.8.

12

Op dat ghy eerlijck wandelt teghen die, die daer buyten zijn, ende haerder gheen en behoeft.

13

Maer wy en willen v lieue Broeders niet onthouden, van den genen die daer slapen, op dat ghy niet^* truerich en zijt, ghelijck de anderen die^† gheen hope en hebben.

* Deut. 14.a.1. Eccli. 38.c.16.

† Sap. 2.d.22

14

⁺ Want ist dat wy gheloouen, dat Iesus ghestoruen, ende verresen is, soo sal oock Godt die daer ontslapen zijn door Iesum, met hem leyden.

+ C vers 14

15

Want dat seggen wy v, als een woort des Heeren:^‡ Dat wy, wy die leuen ende ouerblijuen, in die toecoemst des Heeren, dien niet en sullen voorcomen, die daer slapen.

‡ 1.Cor. 15.f.51.

16

^† Want hy de Heere, sal selue met een veltgheroep, ende stemme des Ertsengels, ende met der Basuynen Gods, af comen van den Hemel, ende de dooden in Christo sullen ten eersten weder opstaen,

† Mat. 24.c.31. Ioan. 5.c.28. Actorum. 1.b.11. 2.Tess. 1.b.7.

17

Daer nae wy, wy die leuen ende ouerblijuen, sullen te samen met den seluen wech gheruct worden inden wolcken, den Heere te ghemoet in der Locht, ende sullen alsoo by den Heere zijn altijt.

18

Soo troost v nv met desen woorden onder malcanderen.