Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ De Apostel seynt Timotheum om te vertroosten die van Thessalonica, ende van zijnder wedercoemst, biddende altijt voor haerlieden.

1

⁺ DAerom en hebben wy het niet langher willen verdragen, ende hebben ons laten welbehaghen,^* dat wy te Athenen alleen ghelaten werden:

+ A vers 1

* Acto. 17.c.16.

2

Ende hebben^† Timotheum ghesonden, onsen broeder ende dienaer Godts ende onsen Helper in den Euangelio Christi, v te stercken, ende te vermanen in uwen ghelooue,

† Actor. 16.a.1. Rom. 16.d.20 Phili. 2.c.19.

3

Dat^‡ daer niemant weeck en worde, in dese droeffenissen:^* Want ghy weet, dat wy daer toe gheset zijn.

‡ Ephe. 3.b.13.

* Ioan. 15.c.20. 2.Tim. 3.b.12.

4

Ende doen wy by v waren, seyden wy v te voren, wy souden droeffenissen moeten hebben: Als dan oock gheschiet is, ende ghy wetet.

5

Daerom en heb ict oock niet langher verdragen, heb wtghesonden, dat ick bekende uwe ghelooue: Op dat v misschien, de Tempteerder niet ghetemteert en hadde, ende onse arbeyt te vergheefs werde.

6

⁺ Maer nv, als Timotheus van v, tot ons ghecomen is, ende ons vercondicht heeft uwen ghelooue ende liefde, ende dat ghy onser ghedenct altijt ten besten, ende v na ons verlangt te sien, ghelijck ooc ons na v.

+ B vers 6

7

Doen zijn wy lieue broeders, ghetroost gheworden aen v, in allen onsen droeffenissen ende noot, door uwen ghelooue.

8

Want nv zijn wy leuendich, dewijle ghy staet inden Heere.

9

Want wat moghen wy Gode voor eenen danck verghelden om v, voor alle dese vruechde, die wy hebben van v, voor onsen Gode.

10

^† Wy bidden dach ende nacht gansch seer, dat wy sien moghen uwe aenghesichte, ende veruullen, so watter ghebreect aen uwen ghelooue.

† Roma. 1.a.11. 15.e.23.

11

Maer hy, Godt onse Vader, ende onse Heere Iesus Christus, schicke onsen wech tot v.

12

Ende v vermeerdere de Heere, ende laet de Liefde volcomen worden onder malcanderen, ende tot alle man (ghelijck dan oock wy zijn tegen v)

13

Dat uwe herten gesterct, ende onstraflijck zijn, in der heylicheyt voor Gode ende onsen Vader, op de toecoemst onses Heeren Iesu Christi, met alle zijnen Heylighen.