Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel vertroost die van Tessalonica, in alle haren teghenspoet, Ende verhaelt op wat maniere dat hy haer Deuangelium gepredickt heeft, Ende hoe sy veruolcht geweest zijn.

1

⁺ VVant ghy weet oock lieue Broeders, van onsen inganc tot v, dat hy niet te vergeefs geweest en is,

+ A vers 1

2

Maer als wy te voren gheleden hadden^* ende versmaet gheweest waren te Philippen (als ghy weet) soo waren wy doen noch euenwel vrijmoedich in onsen Gode,^† by v te segghen dat Euangelium Gods, met grooten strijt.

* Acto. 16.c.19.

† Actor. 17.a.1.

3

Want onse vermaninghe en is niet gheweest tot dwalinghe, noch tot onreynicheyt, noch met list,

4

Maer gelijc als wy van Godt beproeft zijn, dat ons dat Euangelium toe betrout is te prediken, alsoo spreken wy.^‡ Niet als oft wy den menschen wouden behaghen, maer Gode, die onse herten proeft.

‡ Galat. 1.b.10.

5

Want wy en hebben noyt met smeeckende woorden omgegaen (als ghi weet) noch na der ghiericheyt ghestelt^* Godt is des een ghetuyge.

* Roma. 1.b.9. Philip. 1.b.8.

6

^‡ Wy en hebben oock gheen eere gesocht van den Lieden, noch van v, noch van den anderen.

‡ Gala. 1.b.10

7

Wy hadden^† v oock moghen lastich wesen, als Christi Apostelen,⁺ maer wy zijn moederlijck gheweest by v. Ghelijck als een Voester haer kinderen op voet,

† 1.Cor. 9.a.4. 2.Tess. 3.b.9.

+ B vers 7

8

Alsoo hadden wy lust van herten aen v, ende waren willich v mede te deylen, niet alleen dat Euangelium Gods, maer oock onse leuen, daerom, dat wy v hebben lief ghecreghen.

9

Ghy zijt wel gedachtich, lieue Broeders^* onses arbeyts, ende onser moeyten Want dach ende nacht arbeyden wy, dat wy niemant onder v beswaerlijc en waren, ende predicten by v dat Euangelium Gods.

* Acto. 20.e.34 1.Cor. 4.b.12 2.Cor. 11.b.11. 2.Tessa. 3.a.8

10

Dies zijt ghy getuygen ende Godt, hoe heylich, ende rechtueerdich ende onstraflijck, wy by v (ghy die geloouich waert) geweest zijn.

11

Ghelijc ghy oock weet, dat wy eenen yegelijcken van v, ghelijc als een vader zijn kinderen, vermaent,

12

Ende ghetroost, ende betuycht hebben^* dat ghy weerdelijc wandelen soudet voor Godt, die v geroepen heeft tot zijn Rijck, ende tot zijnder heerlijckheyt.

* Gene. 17.a.1. Philip. 1.d.27 Collos. 1.b.10. 1.Thes. 4.a.1

13

Daer om wy oock sonder ophouden Gode dancken, dat ghy, doen ghy van ons ontfingt dat woordt der godlijcker prekinge, ghy het aennaemt, niet als menschen woort, maer (ghelijct oock waerachtich is) als Gods woort, die oock werckt in v, ghy die ghelooft.

14

⁺ Want ghy zijt nauolghers gheworden, lieue Broeders der Ghemeynte Gods in Iudea, in Christo Iesu,^* dat ghy effen dat selue gheleden hebt van uwen bloet vrienden, dat de ghene van den Ioden,

+ C vers 14

* Heb. 10.d.34.

15

^† Die oock den Heere Iesum ghedoot hebben, ende haer eygen Propheten, ende hebben ons veruolcht, ende en behaghen Gode niet, ende zijn alle menschen teghen:

† Mat. 23.d.33. Luce. 13.e.32.

16

^‡ Beletten ons te segghen den Heydenen, daer door sy salich werden, op dat sy haer sonden veruullen altijt. Want de toorn is nv eyndelijck ouer haer ghecomen.

‡ Actor. 17.b.13

17

Maer wy, lieue broeders, na dien wy uwer een wijle berooft zijn geweest, na den aenghesicht, niet na der herten, hebben wy ons dies te meer ghehaest uwe

[p. 85r]

aengesicht te sien, met groot verlangen.

18

^* Daerom hebben wy willen tot v comen (ick Paulus) twee mael, ende^† Satanas heeft ons verhindert.

* Rom. 1.b.13.

† Dani. 10.b.13.

19

Want wie is onse hope, ofte vruechde, ofte croone des^‡ Roems? Sijt ghijt oock niet voor onsen Heere Iesu Christo, tot zijnder toecoemst?

‡ 2.Cor. 1.c.14. Phili. 2.b.16.

20

Ghy zijt immers onse Eere ende vruechde.