Den Bibel, Inhoudende dat Oude ende Nieuwe Testament (Biestkensbijbel)

[p. 84v]

¶ De eerste Epistel S. Pauli, tot den Thessalonicensen.

¶ Dat .I. Capittel.

¶ De Apostel danct Godt van haerlieden goeden beginne, Ende vander verspreyinghe haerder goeder wercken, Ende vertelt hoe sy vanden Afgoden tot den leuenden Godt bekeert zijn, Ende zijnen Sone van den Hemel verwachten.

1

⁺ PAulus ende Siluanus ende Timotheus. Der ghemeynte tot Thessalonien, in God den Vader, ende den Heere Iesu Christo.^* Genade sy met v, ende vrede, van Gode onsen Vader, ende den Heere Iesu Christo.

+ A vers 1

* 2.Corin. 1.a.2. Galat. 1.a.3. Ephesi. 1.a.2.

2

Wy^† dancken Gode altijt voor v alle, ende ghedencken uwer in onsen gebede,

† Ephe. 1.b.15. Philip. 1.a.3. Coloss. 1.a.3.

3

Sonder ophouden, ende ghedencken aen uwe wercken in den gelooue, ende aen uwen arbeyt inder^‡ Liefde, ende aen uwe verduldicheyt in de Hope, welcke is onse Heere Iesus Christus,

‡ 1.Thes. 4.b.9

4

Voor Godt onsen Vader. Want, lieue Broederen, van Godt bemint, wy weten, hoe ghy wtuercoren zijt,

5

^* Dat onse Euangelium by v gheweest is, niet alleen inden woorde, maer beyde in der Cracht ende inden heylighen Gheest, ende in grooter ghewisheyt.^† Als ghy weet, hoe wy ons by v gehouden hebben, om uwen wille.

* 1.Cor. 2.a.4. 4.c.20. 2.Pet. 1.b.16

† 1.Thess. 2.a.1.

6

^+‡ Ende ghy zijt onse Nauolgers gheworden, ende des Heeren, ende hebt dat woort aengenomen, onder veel droeffenissen, met vruechden in den heylighen Gheest,

+ B vers 6

‡ 1.Cor. 4.c.16 10.d.34. Phili. 3.c.17.

7

Also, dat ghi zijt geworden een voorbeelt allen geloouighen, in Macedonia ende Achaia.

8

Want van v is dat woort des Heeren luydtbaer geworden, niet alleen in Macedonia ende Achaia, maer aen allen plaetsen, is ooc uwe ghelooue aen Godt wt ghebroken: Also, dattet niet van nooden en is, v yet te segghen.

9

Want die vercondighen selue van v, wat inganck dat wy tot v ghehadt hebben, ende hoe ghy bekeert zijt tot Godt, van den Afgoden, te dienen den leuenden ende waerachtighen Gode,

10

Ende te verwachten zijnen Soon^* van den Hemel, welcken hi op verwect heeft van den dooden, Iesum, die ons van den toecomenden^‡ toorn verlost heeft.

* Actor. 1.b.11. 2.Tess. 1.b.10.

‡ Ioan. 3.e.36