Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ De Apostel beueelt den Colossensen, dat sy haer aent ghebet houden, ende daer in waken souden, betoonende hoese hen hebben sullen teghen de ongheloouighe, sluytende de Epistel ende confirmerende door groetenisse.

1

⁺ EN laet niet af vanden^* ghebede, ende waect in den seluen met dancksegghinge,

+ A vers 1

* Luce. 18.a.1. Rom. 12.b.12. Ephe. 6.c.18. 2.Thess. 3.a.1

2

^† Ende bidt oock mede voor ons, op dat ons Godt, de duere des woorts op doe, te spreken de verborgenheyt Christi: Daer om ick oock gebonden ben,

† Eph. 6.c.19. 2.Tess. 3.a.1.

3

Op dat ic dat selue openbare gelijck ick sal spreken.

4

^‡ Wandelt wijsselijck teghen die, die daer buyten zijn^* ende schickt v in de tijt.

‡ Eccli. 27.b.13 Ephe. 5.b.15.

* Ro. 12.b.11.

5

Vwe redene sy altijt lieffelijck, ende^† met sout ghecruyt, dat ghy wetet, hoe ghy eenen yeghelijcken antwoorden sult.

† Mat. 5.b.13. Mar. 9.e.50. Luc. 14.d.34

6

Hoe het met my staet, sal v altemael condt doen^‡ Tychicus, de lieue broeder, ende getrouwe dienaer, ende medeknecht in den Heere:

‡ Acto. 20.a.4. 2.Timo. 4.b.12.

7

Welcken ick heb tot v ghesonden, om des wille, op dat ick beuinde hoe het met v staet, ende dat hi uwe herten vermane,

8

Met^* Onesimo den ghetrouwen ende lieuen broeder, die van den uwen is. Alle hoe het hier staet, sullen sy v condt doen.

* Phile. 1.b.10.

9

V gruet^† Aristarchus mijn mede geuangen, ende^‡ Marcus de neue Barnabe, van welcken ghy sommich beuel ontfanghen hebt. Ist dat hy tot v coemt, so neemt hem aen.

† Acto. 27.a.2.

‡ Act. 15.e.37. 2.Tim. 4.b.11

10

Ende Iesus die daer heet Iust, die wt de besnijdinge zijn. Dese zijn alleen mijn Hulpers aen het Rijcke Gods: Die my een troost gheworden zijn.

11

^+* V gruet Epaphras die van den uwen is, een knecht Christi, ende altijt worstelt voor v met bidden, op dat ghy muecht staen volcomen, ende veruult, met allen wille Gods.

+ B vers 11

* Coloss. 1.a.7. Philem. d.23.

12

Ick gheue hem getuychenis, dat hy grooten vlijdt heeft om v, ende om die te Laodicea, ende te Hierapoli.

13

V gruet Lucas de Medecijnmeester, de beminde, ende^† Demas.

† 2.Tim. 4.b.10

14

Gruet de Broederen te Laodicea, ende den Nymphan, ende de ghemeynte in zijn huys.

15

Ende wanneer de Epistel by v ghelesen is, so beschict, dat sy oock in der ghemeynte te Laodicea, ghelesen worde, ende dat ghy die, aen die van Laodicea leset.

16

Ende segt den Archippo: Siet op dat Ampt, dat ghy ontfangen hebt in den Heere, dat ghy dat selue volbrengt.

17

^* Mijn gruet met mijnder hant Pauli.^† Ghedenckt mijnder banden. De genade sy met v, Amen.

* 2.Tess. 3.b.17

† Hebre. 13.a.3.

¶ Gheschreuen van Romen door Tychicum ende Onesimum.