Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ De Apostel informeert hier de Colossencen in goede manieren, ende dat specialijck onder de gehoude, onder de Ouders, onder de kinderen, ende den knechten.

1

⁺ SIjt ghy nv met Christo weder^* opghestaen^† so soeckt wat daer bouen is, daer Christus is^‡ sittende tot der rechterhant Gods,

+ A vers 1

* Rom. 6.a.4. Ephe. 5.b.14

† Phil. 3.c.20.

‡ Ephe. 1.c.20 Hebre. 1.c.13.

2

Weset des ghesint wat daer bouen is, niet des dat op Aerden is.

3

Want ghy zijt ghestoruen ende uwe leuen is verborghen met Christo, in Gode.

4

^‡ Ende wanneer Christus uwe leuen hem seluen openbaren sal, dan sult ghy oock openbaer worden met hem, in der heerlijckheyt.

‡ Philip. 3.c.21. 1.Ioan. 3.a.2.

5

So^* doodet nv uwe ledematen die op Aerden zijn, hoererije^† onreynicheyt, schandelijcken brant, boose begheerte, ende de ghiericheyt (welcke is afgoderije,)

* 1.Cor. 6.b.10. Ephesi. 5.a.3.

† Deu. 27.c.10

6

Om^‡ welcker wil coemt de toorn Gods ouer de kinderen des ongelooues:

‡ Gene. 6.a.7. 1.Cor. 10.a.8.

7

In^* welcken ghy oock wel eer ghewandelt hebt, doen ghy daer in leefdet.

* Ephe. 2.a.2.

8

^† Maer nv legghet al van v af, den torn, grimmicheyt, boosheyt, lasteringe, schandighe woorden wt uwen monde,

† Rom. 6.a.12. Ephe. 4.c.22. Hebre. 12.a.1

[p. 84r]

9

En lieghet niet onder malcanderen,^* treckt den ouden Mensche met zijnen wercken wt,

* Rom. 6.a.4. 13.b.12.

10

Ende trect den nieuwen aen, die daer vernieuwet wort tot de kennisse, na den^† Euenbeelde des, die hem gheschapen heeft:

† Gene. 1.d.27. 5.a.1.

11

Daer geen Grieck, Iode^‡ besnijdinghe, voorhuyt, ongriecke Schijtha, knecht, vrije en is, maer alle dinck ende in allen Christus.

‡ Gala. 5.a.6. 6.c.17.

12

⁺ So treckt nv aen, als de wtuercoren Heylighen Gods, ende beminden, hertelijck ontfermen, vriendelijcheyt^* ootmoedicheyt, saechtmoedicheyt, verduldicheyt

+ B vers 12

* Ephe. 4.a.1.

13

Ende de een verdraghe den anderen,^† ende vergeeft v onder malcanderen, ist dat yemant clage heeft teghen den anderen, ghelijck als Christus v vergheuen heeft, als oock ghy.

† Eccli. 28.a.8. Mat. 6.b.14. Mar. 11.d.25.

14

Maer bouen dat alle^‡ treckt aen de liefde,^* die daer is de bant der volcomenheyt.

‡ Ioan. 13.d.34 15.b.12. Ephe. 5.a.2. 1.Tess. 4.b.9

* 1.Cor. 13.a.1

15

Ende de vrede Gods regere in uwe herten, tot welcken ghy oock geroepen zijt, in eenen lichhaem. Ende weset danckbaer.

16

Laet dat woort Christi rijckelijck onder v woonen, in alder wijsheyt.^† Leert ende vermaent v seluen, met^‡ Psalmen ende Lofsanghen, ende gheestelijcke lieffelijcke Lieden, ende singet den Heere in uwe herten.

† Ephe. 5.b.19.

‡ Iaco. 5.b.13.

17

^* Ende al wat ghy doet, met woorden oft met wercken, dat doet altemael in den Naem des Heeren Iesu^† ende danct Gode den Vader, door hem.

* 1.Cor. 10.d.31.

† Ephe. 5.b.20.

18

^+‡ Ghy vrouwen weest onderdanich uwen mannen, in den Heere, ghelijck dat behoort.

+ C vers 18

‡ Gen. 3.c.16. Ephe. 5.c.22. 1.Petri. 3.a.1.

19

^* Ghy mannen hebt lief uwe wijuen, ende en weest niet bitter teghen haer.

* Ephe. 5.c.25

20

^† Ghy kinderen weest ghehoorsaem den Ouderen in allen dingen: Want dat is den Heere behaechlijck.

† Ephe. 6.a.1.

21

Ghy vaderen en verbittert uwe kinderen niet, op dat sy niet schouwe en worden.

22

^‡ Ghy knechten weest ghehoorsaem in allen dingen uwen lijflijcken heeren, niet met dienst voor oogen, als den menschen te behagen, maer met eenuuldicheyt des herten, ende met de vreese Gods.

‡ Ephesi. 6.a.5. 1.Tim. 6.a.1. Titum. 2.b.9. 1.Pet. 2.e.18.

23

Al wat ghy doet, dat doet van herten, als den Heere, ende niet den menschen,

24

Ende wetet, dat ghy van den Heere ontfangen sult, de vergheldinghe des Erfs. Want ghy dient den Heere Christo.

25

Maer wie onrecht doet^* die sal ontfanghen, wat hy onrecht ghedaen heeft.^† Ende daer en ghelt gheen aensien der Personen.

* Roma. 2.a.6.

† Acto. 10.d.34 Rom. 2.b.11.

26

^‡ Ghy heeren, wat recht ende ghelijck is, dat bewijst den knechten: Ende wetet, dat ghy oock een Heere hebt in den Hemel.

‡ Ephe. 6.a.9