Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel vermaent haer dat sy haer niet en souden laten bedrieghen met schoone woorden, maer vast aen Christo houden.

1

⁺ MAer ick laet v weten, welcken strijt ick hebbe om v, ende om die tot Laodicea, ende alle die mijn persoon in den vleesche niet ghesien en hebben,

+ A vers 1

2

Op dat haer herten vermaent ende te samen gheuatet worden in der liefden, tot allen rijckdommen des ghewissen verstants, om te^* bekennen de verholentheyt Gods des Vaders ende Christi, in welcken ligghen verborghen alle schatten^† der wijsheyt, ende der kennisse.

* Ioan. 17.a.3.

† 1.Cor. 1.c.22.

3

^‡ Maer ick segghe daer af, dat v niemant en bedrieghe met vernuftige reden.

‡ Ephe. 5.a.6.

4

^* Want hoe wel ick na den vleesche daer niet en ben, so ben ick nochtans inden gheest by v:

* 1.Cor. 5.a.3.

5

Ick verblij my ende sie uwe ordeninge, ende uwen vasten gelooue aen Christum.

6

^† Gelijck als ghy nv aenghenomen hebt, den Heere Christum Iesum, so wandelt in hem,

† Gala. 3.d.27.

7

Ende zijt ghewortelt ende ghetimmert in hem, ende weest vast int ghelooue, ghelijck ghy gheleert zijt, ende weest inden seluen rijckelijck danckbaer.

8

^+‡ Siet toe, dat v niemant en berooue door de Philosophie, ende loose verleydinghe, nader menschen leere, ende na der werelt insettinghe, ende niet na Christo.

+ B vers 8

‡ Ro. 16.b.16. Hebr. 13.b.9.

9

^* Want in hem woont de gantsche volheyt der Godtheyt lichamelijck,

* Ioan. 1.b.14. 2.Cor. 5.c.19. Colos. 1.c.19.

10

Ende ghy zijt volcomen in hem, die daer is dat hooft aller Vorstendommen ende Ouerheyt:

11

^† In welcken ghy oock besneden zijt, met der besnijdinghe sonder handen, door aflegginge des sondighen lichaems inden vleesche, te weten, met der besnijdinghe Christi,

† Deu. 10.d.16. Iere. 4.a.4. Roma. 2.e.29 Philip. 3.a.3.

12

^‡ In dat, dat ghy met hem begrauen zijt, door dat doopsel. In welcken ghy oock zijt verresen^* door dat ghelooue, dat Godt werckt, die hem op gheweckt heeft van den dooden.

‡ Rom. 6.a.4

* Ephesi. 1.c.19 3.b.7.

13

^† Ende heeft v oock met hem leuendich ghemaeckt, doen ghy doot waert inden sonden, ende in de voorhuyt uwes vleeschs. Ende heeft ons quijt gheschouden alle sonden,

† Rom. 5.a.6. Ephesi. 2.a.1. Colos. 1.b.21.

14

Ende wtghedaen dat Hantschrift dat teghen ons was, welck door insettinghe ontstont, ende ons tegen was ende heeft het wt den middel ghenomen, ende aen dat Cruys ghehechtet.

15

^* Ende heeft wt ghetoghen de Vorstendommen ende de Gheweldighen, ende haer ten thoone ghedraghen opentlijck, ende een triumphe van haer ghemaeckt, door hem seluen.

* Gene. 3.c.17. Luce. 11.c.22. Ioan. 12.d.31. 16.b.11.

16

⁺ So en laet v nv niemant een conscientie maken, ouer^† spijse, oft ouer dranc, oft ouer sonderlijcke^‡ vierdaghen, oft nieuwe maenden, oft Sabbathen,

+ C vers 16

† Leuiti. 11.a.2.

‡ Leui. 23.a.4

17

Welck is de^* schaduwe van dien, dat toecomende was. Maer dat lichaem selue is in Christo.

* Hebre. 8.a.5. 9.b.10. 10.a.1.

18

^† En laet v niemant den prijs ontrucken, die na eyghen verkiesinge henen gaet, in ootmoedicheyt ende^‡ gheestelijckheyt der Engelen, dier hy noyt geen gesien en heeft, ende is sonder oorsake op gheblasen in zijnen vleeschlijcken sin,

† Iere. 29.b.8 Mat. 24.a.4

‡ mat. 22.c.16.

19

Ende en hout hem niet aen dat hooft, wt welcken dat gansche lichaem door leden ende tsamen voeginge, hantreykinge ontfangt, ende aen een ander hem onthout, ende also wast ter godlijcker grootheyt.

20

^* Ist dat ghy dan nv met Christo af gestoruen zijt den wereltlijcken insettingen, waerom laet ghy v dan met insettinghen vangen? Als oft ghy noch leefde inder wereldt?

* Gala. 4.a.9.

21

(Die daer segghen) Ghy en sult dat niet aengrijpen. Ghy en sult dat niet proeuen. Ghy en sult dat niet aenroeren.

22

Welcke hem doch alle onder de handen verteert^† ende zijn menschen gheboden ende leeringen,

† Esa. 29.c.13. Mat. 15.a.9.

23

Welcke hebben eenen schijn der wijsheyt, door eygen vercoren gheestelijcheyt ende ootmoedicheyt.^* Ende door dat, dat sy dat lichaem niet en sparen, ende den vleesche zijn eere niet en doen, tot zijnder nootdruft.

* 1.Tim. 4.b.8