Den Bibel, Inhoudende dat Oude ende Nieuwe Testament (Biestkensbijbel)

De Epistel S. Pauli tot den Colossensen.

¶ Dat .I. Capittel.

¶ De Apostel aengesien hebbende de goetwillicheyt der Colossensen, trectse totter macht der Euangelien. Ende wil dat zijt sterckelijck gheloouen sullen.

1

⁺ vPAulus een Apostel Iesu Christi, door den wille Gods, ende de Broeder Timotheus.

+ A vers 1

2

Den Heylighen te Colossen, ende den gheloouighen Broederen in Christo.^* Ghenade si met v, ende vrede van Gode onsen Vader, ende den Heere Iesu Christo.

* Galat. 1.a.3. Ephesi. 1.a.2. 1.Petri. 1.a.2.

3

Wy^† dancken Gode ende den Vader onses Heeren Iesu Christi, ende bidden altijt voor v,

† Phili. 1.a.3. 1.Tessa. 1.a.3. 2.Tessa. 1.a.3.

4

Nae dien wy ghehoort hebben van uwen ghelooue aen Christum Iesum, ende vander liefden tot allen Heylighen,

5

Om der^‡ hopinghe wille^* die v by gheleyt is inden Hemel: Van welcken ghy te voren ghehoort hebt, door dat woort der waerheyt inden Euangelio,

‡ Roma. 5.a.2.

* 1.Pet. 1.a.4

6

Dat tot v gecomen is, ghelijck oock inde gansche werelt^* ende is vruchtbaer, ghelijck als oock in v, van dien daghe aen, doen ghijt ghehoort hebt, ende bekent de genade Gods inder waerheyt.

* Marc. 4.a.8. Ioan. 15.b.16

7

Soo ghy dan gheleert hebt van^† Epaphra onsen lieuen mede dienaer, die daer is een trouwe dienaer Christi voor v,

† Colo. 4.b.12. Philem. d.23.

8

Die ons ooc gheopenbaert heeft uwe liefde inden geest.

9

^‡ Daerom ooc wy, van dien dach aen, doen wijt ghehoort hebben, en houden wy niet op voor v te bidden, ende begeeren, dat ghy veruult wordet met kennisse zijns wils, in alderley gheestelijcker wijsheyt ende verstant,

‡ Ephes. 1.c.15. Philip. 1.b.9. 2.Tess. 1.a.3.

10

^* Dat ghy weerdelijck wandelt den Heere, tot allen welbehaghen,^† ende vruchtbaer zijt in allen goeden wercken,^‡ ende wasset inder kennisse Gods,

* Phili. 1.d.27.

† Ioan. 15.b.16

‡ Eph. 4.b.15 1.Pet. 2.a.2.

11

Ende ghesterckt wordet met alder cracht, nae zijnder heerlijcker macht, in alder verduldicheyt ende lancmoedicheyt, met vruechden:

12

Ende danc segget den Vader, die ons bequaem ghemaect heeft, tot de erffenisse der Heylighen inden lichte.

13

⁺ Die ons verlost heeft, vander Ouerheyt der duysternisse ende heeft ons omgheset in dat Rijcke^* zijns lieuen Soons,

+ B vers 13

* Matt. 3.b.17.

14

^† Aen welcken wy hebben de verlossinge door zijn bloet, te weten, de vergheuinghe der sonden.

† Ephe. 1.a.7. 1.Pet. 1.d.18.

15

^‡ Die daer is dat Euenbeelde des onsichtbaerlijcken Gods, de eerste geboren voor alle Creatueren.

‡ 2.cor. 4.a.4. Hebre. 1.a.3.

16

^* Want door hem is alle dinck gheschapen, dat inden Hemel ende op Aerden is, dat sichtbaer ende onsichtbaer, beyde de Throonen, ende Heerschappien, ende de Vorstendommen, ende Ouerheden.

* Psal. 33.a.6 Ioan. 1.a.3. Ephe. 3.b.9. Hebre. 1.a.2.

17

Het is altemael door hem ende tot hem gheschapen, ende hy is voor allen, ende alle dinck bestaet in hem.

18

^† Ende hy is dat Hooft des Lichaems, te weten, der Ghemeynte, die daer is dat beghinsel, ende^‡ de eerste gheboren vanden dooden, op dat hy in allen dinghen den voorganck hebbe.

† Ephes. 1.c.22. 4.b.15.

‡ 1.cor. 15.c.20. Apoca. 1.a.5.

19

Want het is dat welbehagen geweest^* dat in hem alle volheyt woonen soude. Ende alle dinc door hem^‡ versoent werde, tot hem seluen,

* Ioan. 1.b.14. Coloss. 2.b.9.

‡ Rom. 3.c.25 2.Cor. 5.c.18. 1.Ioan. 4.b.10

20

Het sy op Aerden of in den Hemel, daer mede^† dat hy vrede maecte door dat bloet aen zijnen cruyce, door hem seluen.

† Esaie. 9.a.5

21

^‡ Ende v, ghy die voortijden vreemt ende Vianden waert, door dat vernuft in boosen wercken,

‡ Rom. 5.a.6. Ephesi. 2.a.1. Coloss. 2.b.13.

22

Maer nv heeft hy v versoent, met den lichaem zijns vlees door den doot,⁺ op dat hi v stelde^* heylich ende onstraffelijck, ende sonder schult voor hem seluen.

+ C vers 22

* Luce. 1.g.70. Ephe. 5.c.27.

23

Ist dat ghy anders blijft inden ghelooue,^† ghegront, ende vast, ende onbeweghelijck, vander hopinghe des Euangelij, dat ghy ghehoort hebt, welcke ghepredickt is onder alle Creatuere, die onder den Hemel is, welcks dienaer ick Paulus gheworden ben.

† Mat. 16.c.18. 1.Cor. 3.b.11.

24

^‡ Nv verblijde ick my in mijnen lijden, dat ick voor v lijde, ende veruulle aen mijnen vleesche wat daer noch ont-

‡ Ephe. 3.b.13. Phili. 2.b.17. 2.Tim. 2.a.10

[p. 83v]

breeckt aen de droeffenissen in Christo,^* voor zijn lichaem, welcke is de gemeynte:

* Rom. 12.a.5. 1.Cor. 12.d.27

25

Welcker dienaer ick geworden ben, na den godlijcken predick Ampt, dat my ghegeuen is onder v, dat ick dat woordt Gods rijckelijck prediken sal,

26

Te weten^† de verholentheyt, die verborgen geweest is van der werelt aen, ende van den tijden aen:^‡ Maer nv gheopenbaert is zijnen Heyligen,

† Ro. 16.d.24. Ephesi. 3.b.9.

‡ Mat. 11.c.25 Ioan. 6.e.44 2.Cor. 2.c.14 Ephe. 1.b.11.

27

Dien Godt heeft willen te kennen gheuen, welcke daer sy de heerlijcke rijcdom deser verholentheyt, onder den Heydenen (welcke is Christus in v) die daer is de^* hope der heerlijcheyt welcken wy vercondigen,

* 1.Tim. 1.a.1.

28

Ende vermanen alle menschen, ende leeren alle menschen met alder wijsheyt, op dat wy stellen eenen yeghelijcken mensche, volcomen in Christo Iesu.

29

Daer ick aen arbeyde, ende worstele na der werckinghe, des gheens die in my crachtelijck werckt.