Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ De Apostel sterct de Philippensen haerlieden verweckende tot gheestelijcke blijschap ende volstandicheyt der goeder wercken, ende verblijt hem in haerlieder vrijheyt, achter na haerlieden groetende.

1

⁺ ALsoo, mijn lieue ende gewenschte Broeders, mijn vruechde ende mijn Croon, bestaet also inden Heere, ghy beminden.

+ A vers 1

2

De Euodian vermaen ick, ende de Syntijchen vermaen ick, dat sy eens sinnes zijn inden Heere.

3

Ia ick bidde oock v, mijn ghetrouwe gheselle, staet haer by, die met my ouer den Euangelio ghestreden hebben, met Clemens, ende den anderen mijnen Hulperen^* welcker namen zijn in dat Boec des leuens.

* Exod. 32.g.32 Luce. 10.b.20. Apoc. 17.b.8. 20.c.15. 21.d.27.

4

^† Verblijt v inden Heere altijt ende wederom segghe ick: Verblijt v.

† 1.Tes. 5.c.16

5

Laet uwe vriendelijcheyt allen menschen kenlijck zijn. De Heere is na by:

6

^‡ En sorget niet, maer in allen dingen laet uwe bidden inden ghebede ende smeecken, met dancksegginghe voor Gode kenlijck worden.

‡ psal. 54.d.22 Matt. 6.c.25. 1.Pet. 5.b.7.

7

Ende de^* vrede Gods die hoogher is dan alle vernuft, beware uwe herten ende sinnen, in Christo Iesu.

* Ioan. 14.c.27 Roma. 5.a.1. Ephe. 2.b.13.

8

⁺ Voortaen lieue Broeders, wat waerachtich is, wat eerlijck is, wat recht, wat cuysch, wat lieflijck, wat wel luyt, Isser eenighe duecht, isser eenich Lof, daer denckt na,

+ B vers 8

9

Welck ghy ooc geleert, ende ontfanghen, ende ghehoort, ende ghesien hebt, aen my, dat doet^* so sal de Heere des vredes met v zijn.

* Esaie. 9.b.5.

10

Maer ick ben hoochlijck verblijt inden Heere, dat ghy weder wacker gheworden zijt, voor my te sorgen, hoe wel ghy altoos ghesorcht hebt. Maer de tijt en heuet niet willen lijden.

11

Niet en segge ick dat, van gebrecx weghen, want ick heb gheleert^† by dien ick ben, my te laten genoeghen.

† 1.Tim. 6.b.8.

12

Ick can leech zijn, ende can hoogh zijn. Ick ben in allen dinghen ende by allen gheschickt, beyde sat te zijn ende te hongheren, beyde veel te

[p. 83r]

hebben, ende ghebreck te lijden.

13

Ick vermach alle dinc, door dien, die my machtich maeckt, Christus.

14

Doch ghy hebt wel ghedaen, dat ghy v mijnder droeffenisse aenghenomen hebt.

15

⁺ Maer ghy van Philippen wetet, dat van beghin des Euangelij, doen ick wt tooch wt Macedonia, gheen ghemeynte met my ghedeylt en heeft, nae der rekenschap des wtgheuens ende opnemens, dan ghy alleen.

+ C vers 15

16

Want tot Thessalonien seyndet ghy wat tot mijnder noodtdruft eenmael, ende daer na noch eenmael.

17

Niet dat ick dat gheschencke soecke, maer ick soecke de vrucht dat sy oueruloedich in uwer rekenschap sy.

18

Want ick heb alle dinck, ende heb oueruloedich, ick ben veruult, doen ick ontfinck door Epaphroditum dat van v quam, een soete rueck, een aenghenaem^* offer, Gode behaghelijck.

* Roma. 12.a.1. Hebr. 13.c.16.

19

Mijn Godt veruulle alle uwe nootdruft, na zijnen rijckdom, inder heerlijckheyt, in Christo Iesu.

20

Maer den Gode ende onsen Vader, sy eere van eewicheyt, Amen.

21

Groetet alle Heylighen in Christo Iesu. V groeten de Broeders, die by my zijn.

22

V groeten alle Heyligen, ende sonderlinghe die van des Keysers huyse:

23

De ghenade onses Heeren Iesu Christi, sy met v allen, Amen.

Gheschreuen van Romen, door Epaphroditum.