Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ De Apostel betoont de ydelheyt der Wetten, ende dat door zijn Exempel, hemseluen daer in verantwoordende, ende bidt de Philippensen dat si hem volghen wilden, ende haer wachten voor de valsche Leeraers.

1

⁺ VOort aen lieue Broeders, verblijt v in den Heere. Dat ic v altijt eenderley scrijue, en verdriet my niet, ende maeckt v des te ghewisser.

+ A vers 1

2

Siet op de^* honden, siet op de boose arbeyders siet op de besnijdinghe.

* Esaie. 56.c.11.

3

^† Want wy zijn de besnijdinghe, wy die Gode inden^‡ gheest dienen, ende beroemen ons van Christo Iesu, ende en verlaten ons niet op dat vleesch,

† Rom. 2.c.29 Collo. 2.b.11.

‡ Ioan. 4.c.23 Roma. 1.a.9.

4

Hoe wel ick oock hebbe, dat ick my des vleeschs beroemen mochte.^* Ist dat hem een ander laet duncken, hy moge hemseluen des vlees beroemen, ick veel meer,

* 2.Cor. 12.a.9.

5

Ick die op den achsten dach besneden ben, een wt den volcke van Israel, des geslachts^† BenIamin, een Ebreer wt den Ebreen, ende na der Wet een^‡ Phariseus,

† Ge. 49.d.27.

‡ Acto. 23.a.6. 26.a.5.

6

Na den ijuer^* een veruolgher der ghemeynte, nae der gherechticheyt inder Wet, gheweest onstraflijck.

* Actor. 8.a.3. Galat. 1.b.13.

7

^† Maer wat my ghewin was, dat heb ick om Christus wille, voor schade gheacht.

† mat. 13.f.46

8

Want ick acht alle dinc voor schade, teghen de oueruloedige^‡ kennisse Christi Iesu mijns Heeren: Om welckes wille ick alle dinck heb voor schade gherekent, ende houde het voor dreck, op dat ick Christum ghewinne,⁺

‡ Esa. 53.c.14. Ierem. 9.d.23 Ioan. 17.a.3. Collos. 2.a.2.

+ B vers 8

9

Ende in hem geuonden worde, dat ick niet en hebbe mijne gerechticheyt, die wt de Wet, maer die door den ghelooue aen Christum coemt te weten^* de gerechticheyt die van Gode den ghelooue toegherekent wort,

* Rom. 1.b.17. 3.c.28.

10

Om hem te bekennen, ende de cracht zijnder verrijsenis, ende de ghemeynschap zijns lijdens^† dat ick zijnder doot gelijck worde,

† Roma. 6.a.4

11

Daermede ick te gemoet come tot der verrijsenis der dooden.

12

Niet dat ickt alreede gegrepen hebbe, oft alreede volcomen sy: Maer ick iaghe hem na, oft ickt oock grijpen mochte, na dien ick van Christo Iesu gegrepen ben.

13

Mijn broeders, ick en houde my seluen noch niet daer voor, dat ickt ghegrepen hebbe: Maer eenderley seg ick: Ick vergete wat te rugge is, ende strecke my tot dien dat daer voor is,

14

Ende iaghe na dat voorghesette mercteecken, na den Cleynodie, welcke voor hout de Hemelsche beroepinghe Gods in Christo Iesu.

15

⁺ Soo veel nv onser volcomen zijn, die laet ons also gesinnet zijn. Ende sult ghy anders wat houden, dat laet v Godt openbaren.

+ C vers 15

16

Doch so verre, dat wy nae eender Reghel, daer wy in ghecomen zijn, voortgaen^* ende ghelijck ghesinnet zijn.

* Rom. 12.c.16. 15.a.5. 1.Cor. 1.b.9. Philip. 2.a.2.

17

^† Volghet my, lieue Broeders, ende siet op die, die also wandelen, ghelijck ghy ons hebt tot een voorbeelde.

† 1.cor. 4.c.16 10.d.34. 1.Tess. 1.b.6. 2.Tess. 3.b.9.

18

Want veel wandelen, van welcken ick v dickwils gheseyt heb, maer nv seg ick v oock weenende, de Vianden des Cruys Christi,

19

Welcker eynde is de verdoemenis^‡ welcker Godt de buyck is, ende haer eere tot schanden wort, dier, die^* Aertsch gesint zijn.

‡ Rom. 16.b.17

* 1.Cor. 1.a.6. Colloss. 3.a.2.

20

Maer onse wesen is inden Hemel^† van waer wy oock verwachten den Salichmaker Iesum Christum den Heere:

† 1.Cor. 15.f.51 Titum. 2.c.13.

21

^‡ Die onse nietighe Lijf verclaren sal, dattet ghelijck worde zijnen verclaerden Lijue, na der werckinge, daer hy hem ooc alle dinghen mede onderdanich can maken.

‡ mat. 13.e.43 1.Ioan. 3.a.2.