Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel leert die van Philippis vander eenicheyt des gheloofs, van waerachtighe ootmoedicheyt, ende van waerachtighe heylicheyt, Ende om haerlieden noch meer te leeren, so seynt hy haerlieden boden.

1

⁺ ISser nv by v vermaninghe in Christo, Isser troost der liefden, Isser ghemeynschap des gheests, Isser hertgrondelijcke liefde ende barmherticheyt soo veruult mijn blijschap,

+ A vers 1

2

Dat ghy^* eens sins zijt, ghelijcke liefde hebt,

* Rom. 12.c.16. 15.a.5.

3

Eendrachtich ende eens zijt: Niet en doet door^† twist ofte ydel eere,^‡ Maer door ootmoedicheyt, achtet v onder malcanderen, deen den anderen hooger, dan hemseluen:

† 1.Cor. 3.a.3.

‡ Ro. 12.b.10. 1.Pet. 5.a.5.

4

^* Ende een yeghelijck en sie niet op dat zijne, maer op dat, dat des anders is.

* 1.Cor. 10.c.24. 13.b.5.

5

^* Een yeghelijck sy ghesinnet, als Iesus Christus oock was,

* 1.Pet. 2.c.21.

6

Welcke (hoe wel hy^† in godlijcke ghedaente was) en hielt hijt niet voor eenen roof, Gode gelijck te zijn,

† 2.Cor. 4.a.4 Colloss. 1.b.15

7

^‡ Maer vercleynde hemseluen^* ende nam de gedaente eens knechts aen,^† wert gelijck als een ander mensche ende inden ghelate als een mensche beuonden,

‡ Psal. 8.b.6.

* mat. 20.d.28

† Heb. 5.a.2.

8

^‡ Vernederde hemseluen, ende wert ghehoorsaem tot inde doot toe, Ia tot den doot aent Cruyce.

‡ Hebr. 2.b.9.

9

^* Daerom heeft hem oock Godt verhoocht, ende heeft hem eenen Naem ghegheuen, die bouen alle namen is,

* Mat. 28.c.18. Hebre. 2.b.9.

10

Dat inden Naem Iesu^† haer buygen sullen alle dier knyen, die inden Hemel ende op Aerden, ende onder der Aerden zijn,

† Esa. 45.c.23. Dan. 7.c.14. Rom. 14.b.11

11

Ende alle tonghen bekennen sullen^‡ dat Iesus Christus de Heere sy, ter eere Gods des Vaders.

‡ Acto. 2.d.36. Rom. 14.b.9

12

⁺ Also mijn liefste, ghelijck als ghy gehoorsaem zijt geweest, niet alleen in mijn teghenwoordicheyt, maer ooc nv veel meer in mijn afwesen, Maeckt, dat ghy salich wordet met vreesen ende beuen.

+ B vers 12

13

^* Want Godt ist die in v werckt beyde dat willen ende dat doen, nae zijn welbehaghen.

* Deut. 8.d.18. Acto. 16.b.14 2.Cor. 3.a.5. Hebr. 13.d.21.

14

^† Doet alle dinc sonder murmureren, ende sonder twijfel,

† 1.Pe. 4.b.9

15

Op dat ghy zijt sonder schult ende louter, ende Gods kinderen, onstraflijck^‡ midden onder dat onaerdighe ende verkeerde gheslacht^* onder welcken ghy schijnt als lichten inder werelt,

‡ 1.Pet. 2.b.12.

* Mat. 5.b.16

16

Daermede, dat ghy blijuet byden woorde des leuens, my tot eenen^† Roem inden dach Christi, ick als die niet te vergeefs gheloopen, noch te vergeefs gearbeyt en hebbe.

† 2.Cor. 1.c.14. 1.Thess. 2.c.19

17

^* Ende of ick geoffert worde, ouer dat offer ende Gods dienst ws gheloofs,^† soo verblije ick my, ende verblije my met v allen:

* Collos. 1.c.24

† Rom. 12.b.12.

18

Des seluen sult ghy v oock verblijden, ende sult v met my verblijden.

19

Ick hope inden Heere Iesu, dat ick^‡ Timotheum cortelijc sal tot v seynden, op dat ick oock verquickt worde, als ick verneme hoe dattet met v staet.

‡ Actor. 16.a.1. 1.Tess. 3.a.2.

20

Want ick en heb niemant, die soo geheel mijns sins sy, die so van herten voor v sorghet.

21

^+* Want sy soecken al dat hare, niet dat Christi Iesu is.

+ C vers 21

* 1.Corin. 13.a.5

22

Maer ghy weet, dat hy oprecht is. Want ghelijck als een kint den Vader, heeft hy met my gedient aenden Euangelio:

23

Den seluen hope ick, sal ick van stonden aen seynden, wanneer ick vernomen heb, hoe dattet met my staet.

24

^* Ende ick betrou inden Heere, dat ick oock selue schier comen sal.

* Phili. 1.d.26

25

Maer ick heb voor noodich aenghesien, den Broeder Epaphroditum tot v te seynden, die mijn Hulper ende Medestrijder, ende uwe Apostel, ende mijnder nootdruft dienaer is:

26

Nademael hy nae v allen een verlanghen hadde, ende was hooch becommert, daerom dat ghy ghehoort hadt, dat hy sieck was gheweest.

27

Ende hy was, tis waer, doot sieck, Maer Godt heeft hem ouer hem ontfermt: Ende niet alleen ouer hem, maer oock ouer my,

[p. 82v]

op dat ick niet de een truericheyt op de ander en legghe.

28

Maer ick heb hem dies te haestelijcker ghesonden, op dat ghy hem siet, ende weder vrolijck wordet, ende ick oock der truericheyt wat weyniger hebbe.

29

So neemt hem nv aen inden Heere, met alder vruechde^* ende hout sulcke in eeren.

* Rom. 15.d.27 1.Tim. 5.c.17. 1.Tess. 5.b.12 Hebr. 13.c.17.

30

Want om des wercx Christi wille, is hy den doode so na ghecomen, dat hi zijn leuen weynich achtede, op dat hy my diende in uwer stede.