Den Bibel, Inhoudende dat Oude ende Nieuwe Testament (Biestkensbijbel)

De Epistel S. Pauli tot den Philippensen.

¶ Dat .I. Capittel.

¶ De Apostel danckt Godt vanden goede dat den Philippensen ghedaen is, ontdeckende zijnen staet, ende onderschiet de Predicanten, die welcke hy vermaent tot verduldicheyt in tribulatie.

1

⁺ PAulus ende Timotheus, knechten Iesu Christi. Allen Heyligen in Christo Iesu tot^* Philippen, met den Bisschoppen ende^† Dienaren.

+ A vers 1

* Acto. 16.b.12.

† Actorum. 6.a.3.

2

^‡ Ghenade sy met v, ende vrede van Godt onsen Vader, ende den Heere Iesu Christo.

‡ 2.Cor. 1.a.2. Galat. 1.a.2. Ephesi. 1.a.2.

3

^* Ick dancke mijnen Gode, soo dickwils als ic uwer ghedencke,

* Ephesi. 1.c.15 Coloss. 1.a.3. 2.Tessa. 1.a.3.

4

(Welcke ick altijt doe in allen mijnen gebede voor v allen, ende doe dat ghebet met vruechden)

5

Ouer uwe ghemeynschap aenden Euangelio, vanden eersten dach aen tot nv toe.

6

Ende ben des seluen in goeden betrouwen, dat, die in v begonnen heeft dat^† goede werck, die salt oock volbrenghen, tot aenden dach Iesu Christi,

† Ioan. 6.d.29. Colloss. 1.a.7.

7

Gelijck alst my behoorlijck is, dat ick in dier maten van v allen houde: Daerom, dat ick v in mijn herte hebbe, in deser mijnder gheuanckenisse, daer ick dat Euangelium in verantwoorde ende becrachtighe, als die ghy alle met my, der ghenaden deelachtich zijt.

8

^+* Want Godt is mijn getuyge, hoe my na v allen verlangt, van gront des herten in Iesu Christo,

+ B vers 8

* Roma. 1.a.9. 1.Tess. 2.a.5.

9

Ende om dat selue bid ick^* dat uwe liefde ymmer meer ende meer rijc worde, in alderley bekennisse, ende in alderley ondersoeckinghe,

* Ephe. 1.c.15. Coloss. 1.a.3.

10

Dat ghy proeuen moecht, wat dat beste sy: Op dat ghy louter ende sonder aenstoot zijt, tot op den dach Christi,

11

Veruult met vruchten der gherechticheyt, die door Iesum Christum (in v) gheschien ter eere ende loue Godts.

12

Maer ick laet v weten lieue Broeders, dat, hoet met my staet, dat is slechs meer tot voorderinge des Euangelij gecomen.

13

Also, dat mijne banden in Christo, ruchtbaer gheworden zijn, inden geheelen Rechthuyse, ende by den anderen alle:

14

^* Ende veel Broederen inden Heere, wt mijnen banden betrouwen ghecreghen, dies te coener gheworden zijn, dat woort te spreken sonder vreese.

* Ephesi. 3.b.13 1.Tessa. 3.a.3

15

Sommighe, tis waer, prediken Christum, om haets ende twists wille: Maer sommige wt goeder meyninge.

16

Ghene vercondighen Christum wt twistinghe,

[p. 82r]

ende niet louterlijck, Want sy meynen, si willen mijne banden een droeffenisse toeuoegen.

17

Maer dese wt liefden, want sy weten, dat ick tot verantwoordinghe des Euangelij hier ligghe.

18

⁺ Maer wat ist dan, op dat alleen Christus vercondicht worde alderley wijse, Het gheschiede toeuallich oft rechter wijse, so verblije ick my doch daer in, ende wil my oock verblijden.

+ C vers 18

19

Want ic weet dat my dat selue ghedijet ter salicheyt, door^* uwe gebet, ende door hantreyckinghe des gheests Iesu Christi: Ghelijc ick eyndelijcke verwachte ende hope,

* 2.Cor. 1.b.11.

20

Dat ick in gheenen stucke te schanden en worde, maer dat Christus met alder vrijmoedicheyt, gelijck als sus altijt, also ooc nv hooch gepresen worde aen mijn lichaem, het sy door dat leuen, oft door den doot.

21

Want Christus is mijn leuen, ende steruen is mijn ghewin.

22

Maer nademael int vleesch te leuen, meer dient om vrucht te doen, so en weet ick niet, welc ick verkiesen sal.

23

^* Want beyderley becommert my herde.^† Ic heb lust af te scheyden, ende by Christo te zijn, welcke oock veel beter waer,

* 2.Re. 24.c.14

† 2.Cor. 5.a.8.

24

Mer het is meer van nooden int vleesch te blijuen, om uwen wille.

25

⁺ Ende in goede betrouwen weet ick, dat ick blijuen, ende by v allen zijn sal, v tot voorderinghe ende tot vruechde, des gheloouens,

+ D vers 25

26

Op dat ghy v seer beroemen moghet in Christo Iesu, aen my, door mijn toecoemst weder tot v.

27

^* Wandelt slechs weerdelijck den Euangelio Christi, op dat, ist dat ick come ende v sie, ofte afwesende van v hooren mach dat ghy staet in eenen gheest, ende eender siele, ende met ons strijdet inden ghelooue des Euangelij.

* 1.Cor. 7.c.20. Ephe. 4.a.1. Collo. 1.a.10. 1.Tess. 4.a.1.

28

Ende v in gheenen weghe verschricken en laet van den Wederpartien, welcke is een bewijs haerder verdoemenis, maer v der salicheyt, ende dat selue van Godt.

29

Want v ist ghegheuen om Christus wille te doen, dat ghy niet alleen aen hem en ghelooft, maer oock om zijnen wille lijdet,

30

Ende hebt den seluen strijt, welcken ghy aen my ghesien hebt, ende nv van my hoort.