Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ De Apostel leert hoe de kinderen haren Ouders behooren onderdanich te zijn, ende onderwijst die van Ephesen van allen duechden.

1

⁺ GHy^* kinderen weest ghehoorsaem uwen Ouderen inden Heere, want dat is billicx.

+ A vers 1

* Colos. 3.c.20.

2

^† Eert Vader ende Moeder, dat is dat eerste gebot, dat een belofte heeft,

† Exo. 20.b.12. Deut. 5.b.16. 27.c.16. Eccli. 3.b.12. Mat. 15.a.4.

3

Op dattet v wel ga, ende lange leuet op Aerden.

4

Ende ghy Vaderen, en verwect uwe kinderen niet tot toornicheyt, maer voetse op inder onderwijsinghe, ende vermaninghe tot den Heere.

5

^‡ Ghy knechten weest gehoorsaem uwen lijflijcken heeren, met vreese ende beuen, in eenuoudicheyt uwes herten, als Christo,

‡ Collos. 3.d.22 Titum. 2.b.9 1.Petr. 2.c.18.

6

Niet met dienst alleen voor oogen, als den menschen te behagen, maer als de knechten Christi, dat ghy sulcken wille Gods doet van herten met goetwillicheyt,

7

Laet v duncken dat ghy den Heere dient, ende niet den menschen:

8

Ende weet, so wat eenen yegelijcken goets doen sal, dat sal hi ontfangen vanden Heere, hy si knecht oft Vrije.

9

^* Ende ghy heeren, doet ooc dat selue teghen haer, ende verlaet dat dreygen, ende weet, dat oock uwe Heere inden Hemel is^† ende dat by hem gheen aensien der Persoonen en is.

* Eccli. 33.d.31. Colos. 3.c.26.

† Acto. 10.d.34 Rom. 2.b.11. Colos. 3.c.25.

10

Ten laetsten, mijn Broeders, weset

[p. 81v]

sterck inden Heere, ende inder macht zijnder sterckheyt:

11

^+* Treckt aen dat harnasch Gods, op dat ghy bestaen moecht teghen den listighen aenloop des Duyuels.

+ B vers 11

* 2.Cor. 10.a.4

12

Want wy en hebben niet te vechten met vleesch ende bloet, maer met Vorsten ende Gheweldighen, namelijck, met den heeren der werelt, die inder duysternisse deser werelt heerschappen, met den boosen geesten onder den Hemel.

13

Om des wille so grijpt dat harnasch Godts aen, op dat ghy moecht wederstaen aenden boosen daghe, ende alle dinghen wel wtrichten, ende dat velt behouden moecht.

14

^* So staet nv, omgegort uwe lenden met waerheyt, ende aenghetoghen met den^† Kreeft der gerechticheyt,

* Exo. 28.a.4. Psal. 132.c.16. Esaie. 11.a.5.

† Esa. 59.c.17 Sap. 5.c.19. 1.Tess. 5.a.8.

15

Ende geleerst aenden beenen, als veerdich^‡ te drijuen dat Euangelium des vredes, daer ghy mede bereydet zijt:

‡ Esa. 52.b.7. Rom. 10.c.15.

16

Maer voor allen dinghen, aengrijpt den Schilt des geloofs, met welcken ghi connet wtblusschen, alle vyerighe Pijlen des Booswichts.

17

Ende neemt den^* Helm des Heyls, ende dat sweert des geestes, welc is dat woort Gods.

* Esaie. 59.c.17

18

^+† Ende bidt ghestadelijcken in alder noot, met bidden ende smeecken inden gheest, ende waket daer toe met allen aenhouden ende smeecken, voor alle Heylighen,

+ C vers 18

† Luce. 18.a.1. Colos. 4.a.2. 1.Thes. 5.c.17 2.Thess. 3.a.1.

19

Ende voor my.^‡ Op dat my ghegeuen worde dat woort, met vrijmoedigen opdoen mijns monts, dat ick mach kenlijck maken, de verholentheyt des Euangeliums,

‡ Acto. 4.c.29.

20

Welcks Bode ick ben, inder keten, op dat ick daer vrijmoedich in handelen mach, ende spreken alst behoort.

21

Ende op dat ghy oock wetet, hoe dattet met my staet, ende wat ick doe, salt v Tychicus, mijn lieue Broeder, ende ghetrouwe dienaer inden Heere, al te kennen gheuen,

22

Dien ick tot v ghesonden heb, om des seluen wille, dat ghy vernaemt, hoe dattet met my staet, ende dat hy uwe herten trooste.

23

Vrede sy den Broederen, ende liefde met ghelooue, van Gode den Vader, ende den Heere Iesu Christo.

24

Ghenade si met allen die daer lief hebben onsen Heere Iesum Christum louterlijcken, Amen.

¶ Gheschreuen van Romen tot den Ephesen, door Tychicum.