Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Hier leert hy den Ephesen hoe sy Christum volghen sullen, ende hoe sy voorsichtelijck wandelen sullen, als de Wijse. Hy leert de Vrouwen haren Mans onderdanich zijn, om dat den Man het hooft is, ende ghelijct Christus ende de ghemeynte daer by.

1

⁺ SO zijt nv^* Gods nauolghers, als de lieue kinderen,

+ A vers 1

* Mat. 5.e.48. Ioan. 13.b.15.

2

Ende wandelt inder liefden^† gelijck als ons Christus lief ghehadt heeft^‡ ende hemseluen ouerghegheuen voor ons, tot een gaue ende offer, Gode tot eenen soeten ruecke.

† Gala. 2.c.21.

‡ Titum. 2.b.14

3

^* Maer hoererie, ende alle onreynicheyt, oft giericheyt^† en laet niet van v gheseyt worden, ghelijck den Heylighen toebehoort:

* Ephe. 4.c.29

† Exo. 23.b.13.

4

Oock schandelijcke woorden, ende dwase clappinghe, oft boerderije, die v niet en betamen, maer veel meer dancksegginghe.

5

^‡ Want dat sult ghy weten, dat gheen Hoereniagher, oft onreyne, oft gierighe (die daer is een Afgoden dienaer) erffenisse heeft in dat rijcke Christi ende Godts.

‡ 1.Cor. 6.b.10. Galat. 5.c.19. Coloss. 3.a.6.

6

^* En laet v niemant verleyden met onnutte woorden. Want om deser willen, coemt de toorn Gods, ouer de kinderen des ongeloofs.

* Iere. 29.b.8. Colos. 2.a.4. 2.Tess. 2.a.2.

7

Daerom en zijt haer medegenooten niet.

8

Want ghy waert wel eer duysternis^† maer nv zijt ghi een Licht inden Heere.

† 1.Tess. 5.a.4.

9

⁺ Wandelt ghelijck de kinderen des Lichts.^‡ De vrucht des gheests, is alderley goedertierenheyt, ende gherechticheyt, ende waerheyt.

+ B vers 9

‡ Galat. 5.c.22.

10

Ende proeuet wat daer sy welbehaghelijck den Heere.

11

^* Ende en hebt gheen ghemeynschap met den onvruchtbaren wercken der duysternis, maer straftse veel meer.

* Mat. 18.b.17 1.Cor. 5.b.8. 10.c.20.

12

Want wat heymelijck van haer gheschiet, dat is oock schandelijck te segghen.

13

^† Maer dat alle wort openbaer, wanneert vanden lichte gestraft wordt: Want al dat openbaer wort, dat is licht.

† Ioan. 3.c.21.

14

Daerom spreect hy:^‡ Waket op, ghy die slaept, ende staet op vanden dooden, so sal v Christus verlichten.

‡ Esaie. 60.a.1. Rom. 13.b.11.

15

^* So siet nv toe, hoe ghy voorsichtelijck wandelt, niet als de onwijsen, maer als de Wijsen,

* Eccli. 17.b.13. Coloss. 4.a.5

16

^† Ende schict v inde tijt, want het is boose tijt.

† Ro. 12.b.11.

17

Daerom en wordet niet onuerstandich^‡ maer verstandich, wat des Heeren wille sy.

‡ Rom. 12.a.2. 1.Tess. 4.a.3.

18

Ende en^* suypt v niet vol Wijns, daer een onordelijck wesen wt volcht, maer wordet vol gheestes,

* Eccli. 31.c.30

19

Ende^† spreect onder malcanderen van Psalmen ende Lofsangen,^‡ ende geestelijcke Lieden: Singet ende spelet den Heere in uwe herten,

† Coloss. 3.b.16

‡ Psal. 98.a.1.

20

^* Ende segghet danck alle tijt voor alle dinc, Gode ende den Vader, inden Naem onses Heeren Iesu Christi.

* 1.Tess. 5.c.18

21

⁺ Ende zijt malcanderen onderdanich inde vreese Gods.

+ C vers 21

22

De^* Vrouwen wesen onderdanich haren Mannen, als den Heere.

* Gene. 3.c.16. Coloss. 3.c.18. 1.Petri. 3.a.1.

23

^† Want de Man is des Wijfs hooft^‡ gelijck als oock Christus dat hooft der ghemeynte is, ende hy is zijns lichaems Heylant.

† 1.Cor. 11.a.3.

‡ Ephe. 1.d.22 4.b.15. Collo. 1.b.18.

24

Maer ghelijck als nv de ghemeynte, Christo onderdanich is, also ooc de Vrouwen haren Mannen in allen dinghen.

25

Ghy Mannen hebt lief uwe Wijuen^* gelijck als Christus lief heeft ghehadt de gemeynte, ende heeft hemseluen voor haer gegeuen,

* Galat. 2.c.22. Ephesi. 5.a.2

26

Op dat hyse heylichde.^† Ende heeftse ghereynicht door dat waterbadt, inden woorde,

† Psalm. 51.a.2 Titum. 3.a.5. 1.Petri. 3.c.21

27

Op dat hy hemseluen bereyde een ghemeynte, die daer heerlijck sy, die geen beuleckinge, oft rimpelen, oft der gelijcken hebbe^‡ maer dat si heylich sy ende onstraflijc.

‡ Collos. 1.c.22.

28

Also sullen oock de Mannen haer Wijuen lief hebben, als haer eyghen Lijuen. Wie zijn Wijf lief heeft, die heeft hemseluen lief.

29

Want niemant en heeft oyt zijn eygen vleesch gehaet, maer hy gheneert het ende besorget, ghelijck als ooc de Heere de gemeynte.

30

^* Want wy zijn leden zijns lichaems van zijnen vleesche, ende van zijnen gebeente.

* Rom. 12.a.5.

31

Om^† des willen, sal de mensche verlaten Vader ende Moeder, ende zijnen Wijue aenhangen^‡ ende twee sullen een vleesch zijn.

† Gene. 2.d.24

‡ 1.Cor. 6.c.16.

32

Die verborgentheyt is groot. Maer ick segghe van Christo ende der ghemeynte.

33

Doch oock ghy, een yeghelijck hebbe zijn Wijf lief als hemseluen. Maer dat Wijf vreese den Man.