Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Paulus vermaentse tot saechtmoedicheyt, ende vrede, dat si de gauen die Godt wtdeylt, malcanderen ghemeyn maken souden, ende alsoo opwassen in alle gherechticheyt.

1

⁺ SO vermaen ick v nv, ick gheuangen inden Heere^* dat ghy wandelt, ghelijck uwer roepinghe toe behoort, daer ghy in gheroepen zijt,

+ A vers 1

* Gene. 17.a.1. 1.Cor. 7.b.20. Phili. 1.d.27. Collo. 1.a.10. 1.Tess. 4.a.1.

2

Met alder ootmoedicheyt ende saechtmoedicheyt, ende met verduldicheyt, ende verdraecht de een den anderen, inder liefden,

3

^† Ende zijt neerstich om te houden de eenicheyt inden geest, door den bant des vredes.

† Rom. 12.b.10.

4

^‡ Een lichaem ende een^* geest ghelijck ghy oock gheroepen zijt, op eenderley hope uwer beroepinghe.

‡ Rom. 12.a.5.

* 1.cor. 12.a.4

5

Een Heere, een Ghelooue, een Doopsel,

6

^† Een Godt ende Vader (onser) aller, die daer is ouer v allen, ende door v allen, ende in v allen.

† Deut. 4.f.35.

7

^‡ Eenen yeghelijcken onder ons, is ghegheuen de ghenade, nae der mate der gaue Christi.

‡ Roma. 12.a.3. 1.Cor. 12.a.11.

8

Daerom spreeckt hy:^* Hy is opgeuaren inde Hoochte, ende heeft de geuanc-kenisse gheuanghen gheuoert, ende heeft den menschen gauen ghegheuen.

* Psa. 68.c.19 Esa. 45.a.13. Ioan. 3.e.34.

9

Dat^* hy opgheuaren is, wat is dat? Dan dat hy te voren hier neder gheuaren is, inde onderste plaetsen der Aerden.

* Ioan. 16.d.28

10

^† Die hier neder gheuaren is, dat is de selue, die opgheuaren is, bouen alle Hemelen, op dat hy alle dinck veruulde.

† Ioan. 3.b.13. 6.g.62.

11

^‡ Ende hy heeft sommighe tot Apostelen gheset, sommighe tot Propheten, sommighe tot Euangelisten, sommighe tot Herderen ende Leeraers,

‡ 1.Cor. 12.c.28.

12

Op dat de Heylighen^† toegherichtet worden, tot den wercke des Ampts daer door dat^* Lichaem Christi gesticht worde,

† Bereydet.

* Rom. 12.a.5.

13

Tot dat wy alle aen comen tot eenderley ghelooue ende bekennisse des Soons Gods ende een volcomen Man worden, die daer sy inder mate des volcomen Ouderdoms Christi.

14

^† Op dat wy niet meer kinderen en zijn^‡ ende ons beweghen, ende^* waeyen laten, van alderley wint der leere, door schalckheyt der menschen, ende bedriegerie, daer sy ons heymelijcke mede aencomen om te verleyden.

† 1.Cor. 14.c.20

‡ Colo. 2.a.4

* mat. 11.a.7. Luce. 7.c.24.

15

⁺ Maer laet ons oprecht zijn inder liefden, ende wassen in allen stucken, aen dien^* die dat hooft is, Christus,

+ B vers 15

* Ephe. 1.c.22. 5.c.23.

16

Wt welcken dat gantsche^† lichaem te samen gheuoecht, ende een lidt aenden anderen hangt, door alle leden, daer door een den anderen hantreyckinghe doet, nae den wercke eens yeghelijcken lidts, in zijnder mate, ende maect, dat dat Lichaem wast tot zijnder eyghen beteringhe, ende dat alle inder liefden.

† Rom. 12.a.5 1.Cor. 12.b.27

17

Soo seg ick nv,^‡ ende betuyghe inden Heere, dat ghy niet meer en wandelt,^* gelijck de andere Heydenen, wandelen, inder ydelheyt haers sins,

‡ Roma. 1.a.9.

* 1.Pet. 4.a.3

18

Welcker verstant verduystert is, ende zijn ontvreemt vanden leuen dat wt Gode is, door de onwetenheyt, die in haer is, door de blintheyt haers herten,

19

Die roeckeloos zijn, ende ouergheuen haer seluen der dertelheyt, ende bedrijuen alderley onreynicheyt, met der giericheyt.

20

Maer ghy en hebt Christum niet alsoo gheleert,

21

⁺ In dien ghy anders van hem ghehoort hebt, ende in hem gheleert zijt, hoe in Iesu een oprecht wesen is.

+ C vers 21

22

^† Soo legt nv van v af, nader voorleden wandelinghe, den Ouden mensche, die hemseluen door lust tot dwalinghe verderft.

† Roma. 6.a.4 Coloss. 3.a.8. Hebre. 12.a.1.

23

^‡ Ende vernieut v inden gheest uwes ghemoets,

‡ Rom. 6.a.4

24

Ende treckt den nieuwen mensche aen, die nae Gode gheschapen is, in oprechter gherechticheyt ende heylicheyt.

25

^* Daerom legt de lueghen af^† ende spreeckt de waerheyt, een yeghelijck met zijnen naesten. Nademael wy onder malcanderen Leden zijn.

* 1.Petri. 2.a.1.

† Sac. 8.c.16. Matt. 5.d.37.

26

^‡ Wort toornich, ende en sondicht niet. En laet de Sonne ouer uwe toornicheyt niet ondergaen.

‡ Psal. 4.a.5.

27

^* En geeft oock geen ruymte den Lasteraer.

* Iaco. 4.a.7.

28

Wie ghestolen heeft, die en stele niet meer:^† Maer arbeyde, ende wercke met den handen wat redelijcx, op dat hy hebbe te gheuen den behoeftighen.

† 2.Tess. 3.a.8. b.12.

29

^‡ En laet geen boose Redene wt uwen

‡ Mat. 12.d.36 Ephesi. 5.a.3.

[p. 81r]

mont gaen: Maer wat nutte is ter beteringhe, daert noot doet, dattet aenghenaem sy te hooren.

30

Ende en bedroeft den heylighen geest Gods niet, daer ghy mede^* beseghelt zijt, op den dach der verlossinghe.

* Rom. 8.c.16. 2.Cor. 1.c.22. 5.a.5. Ephe. 1.b.13.

31

Alle bitterheyt ende gramschap, ende toornicheyt, ende gheroep, ende lasteringe, sy verre van v, tsamen met alder boosheyt.

32

^† Maer zijt onder malcanderen vriendelijck, hertgrondelijc^‡ ende vergeeft een den anderen, ghelijck als v Godt vergheuen heeft, in Christo.

† Col. 3.b.12.

‡ Eccli. 28.a.8 Mat. 6.b.14