Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel vermaent die van Ephesen om Godt te dancken, aenghesien dat hijse van haren sonden verlost hadde, ende dat hijse wtghescheyden hadde vanden anderen volcke, ende wat sy te voren waren.

1

⁺ ENde oock v, doen ghy^* doot waert door ouertredinghen ende sonden,

+ A vers 1

* Collo. 1.b.21. 2.b.13.

2

^† In welcken ghy voormaels gewandelt hebt, na den loop deser werelt, ende na den Vorst, die inde Locht heerschapt, te weten, na den gheest, die tot deser tijdt zijn werck heeft, inde kinderen des ongheloofs,

† 1.Cor. 6.b.11 Colloss. 3.a.3. Titum. 3.a.3.

3

Onder welcken wy oock alle wel eer onse wandelinghe ghehadt hebben, inden lust onses vleeschs, ende deden den wille des vleeschs, ende des vernufts, ende waren oock kinderen des toorns van naturen, ghelijc als oock de anderen.

4

Maer Godt, die daer rijck is van barmherticheyt, door zijn groote liefde, daer hy ons mede lief heeft gehadt, doen wy doot waren inde sonden, heeft hy ons met Christo leuendich ghemaeckt^* (want wt ghenaden zijt ghy salich gheworden)

* Esaie. 25.b.9. Actor. 15.b.11. Titum. 3.a.5.

5

Ende heeft ons met hem op verwect, ende met hem in dat Hemelsche wesen geset, in Christo Iesu.

6

Op dat hy bewijsde inden toecomenden tijden, den oueruloedigen rijckdom zijnder ghenaden, door zijn goedertierentheyt ouer ons, in Christo Iesu.

7

Want wt genaden zijt ghy salich gheworden door den^† ghelooue, ende dat selue niet wt v, Het is Godts gaue,

† 2.Tessa. 3.a.2.

8

⁺ Niet wt den wercken, op dat hem niemant en beroeme.

+ B vers 8

9

Want wy zijn zijn werck, gheschapen in Christo Iesu, tot^‡ goeden wercken, tot welcken Godt ons te voren bereyt heeft, dat wy daer in wandelen sullen.

‡ Ephesi. 1.a.4 Titum. 2.b.14.

10

Daerom gedenckt daer aen, dat ghy, ghy die voortijden Heydenen gheweest zijt, na den vleesche, ende de voorhuyt genoemt werdet, vanden ghenen,^* die ghenoemt zijn de besnijdinge na den vleesche die met der hant geschiet,

* Philip. 3.a.3. Collos. 2.b.11.

11

Dat ghy tot der seluer tijt waert sonder Christo, vreemt, ende buyten der Borgherschap Israels, ende^† vreemt vanden Testamenten der Beloften, daerom ghy gheen hope en hadt, ende waert sonder Godt inder werelt.

† Roma. 9.a.4

12

Maer nv, ghy die in Christo Iesu zijt, ende voortijts verre gheweest zijt, zijt nv na by geworden, door dat bloet Christi.

13

⁺ Want hy is onse^‡ vrede, die wt beyden heeft Een ghemaeckt, ende heeft afghebroken den Tuyn, die daer tusschen was, in dat, dat hi door zijn vleesch wech nam de Viantschap,

+ C vers 13

‡ Esaie. 9.b.5. Ioan. 16.d.33. Collo. 1.b.20.

14

Namelijck, de Wet, die inden gheboden ghestelt was, op dat hy van tween, eenen nieuwen mensche in hemseluen schepte, ende vrede maecte,

15

Ende dat hy alle beyde versoende, met Gode in eenen Lichaem, door dat Cruyce, ende heeft de Viantschap gedoodet door hemseluen,

16

Ende is ghecomen^* ende heeft vercondicht inden Euangelio den vrede, v, ghy die verre waert, ende den ghenen, die nae waren.

* Esai. 57.c.17. Luce. 2.b.14.

17

^† Want door hem hebben wy den toeganck alle beyde, in eenen gheest, tot den Vader.

† Dani. 10.b.9. Roma. 5.a.2. Ephe. 3.b.12. Heb. 10.c.19.

18

Soo en zijt ghy nv niet meer Gasten, ende vreemdelingen, maer Borgeren met den Heyligen, ende Gods huysghenooten,

19

Getimmert op den^‡ gront der Apostelen ende Propheten^* daer Iesus Christus de hoecsteen is.

‡ 1.Corin. 3.b.9.

* 1.Pet. 2.a.4

20

^† Op welcken de gantsche timmeringhe in een ander gheuoecht, wascht, tot eenen heylighen Tempel, inden Heere,

† eph. 4.b.16.

21

Op welcken ghy oock mede ghetimmert wort, tot eender^† behuysinghe Gods, inden geest.

† Woonstede.