Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ De Apostel vermaent ons tot Liefde, tot saechtmoedicheyt, waer mede men de swacke ondercomen sal. Hoemen goet doen sal, Ende dat de besnijdenisse noch voorhuyt niet en ghelt, maer een nieuwe Creature.

1

⁺ ISt dat wy in den Gheest leuen, soo laet ons oock in den Gheest wandelen.

+ A vers 1

2

Laet ons niet ijdeler eeren gierich zijn, ons onder malcanderen te vertoornen, ende te haten.

3

^* Lieue Broeders, waert dat een Mensche van eenighen misualle ouerhaest werde, so helpt hem weder te recht, met saechtmoedigen Gheeste, ghy die gheestelijck zijt. Ende siet op v seluen, dat ghy oock niet getemteert en wordt.

* Rom. 15.a.1. 1.Cor. 9.d.22. 2.Tim. 2.d.25.

4

De^* eene draghe des anders lasten, so sult ghy de Wet Christi veruullen.

* Ioan. 13.b.14 Roma. 15.a.1.

5

Maer ist dat hem yemant laet duncken, hy sy wat, daer hy

[p. 79v]

doch niet en is, die bedriecht hem seluen.

6

Maer een yeghelijck proeue zijn eygen werck, ende als dan sal hy aen hem seluen Roem hebben, ende niet aen eenen anderen.

7

^* Want een yeghelijck sal zijn eyghen pack draghen.

* Psal. 62.b.13. Ro. 14.b.12. 1.Cor. 3.b.8.

8

^‡ Maer die onderwesen wordt met den woorde, die deyle mede alderley goet den ghenen, die hem onderwijst.

‡ Ro. 15.d.27. 1.Cor. 9.b.11.

9

En dwaelt niet, Godt en laet hem niet bespotten.^‡ Want wat de mensche saeyt, dat sal hy oogsten.

‡ Luce. 16.d.25

10

Wie op dat vleesch saeyt, die sal van den vleesche de verderffenis oogsten. Maer wie op den gheest saeyt, die sal van den gheest dat eewighe leuen oogsten.

11

Laet ons goet doen, ende niet moede worden, want tot zijnder tijt, sullen wy ooc oogsten sonder ophouden.

12

⁺ Als wy dan nv de tijt hebben, so laet ons goet doen aen alleman:^* Maer aldermeest aen des gheloofs ghenooten.

+ B vers 12

* 1.Tim. 5.a.8.

13

Siet, met hoe veel woorden ick v geschreuen hebbe met eyghender hant.

14

Die haer seluen willen aenghenaem maken na den vleesche, die dwinghen v te besnijden, alleen dat sy met den cruyce Christi niet veruolcht en worden.

15

Want oock sy selue, die haer laten besnijden, en houden de Wet niet, maer sy willen, dat ghy v laet besnijden, op dat sy haer van uwen vleesche beroemen moghen.

16

^* Maer het sy verre van my, te roemen, dan alleen van den cruyce onses Heeren Iesu Christi, door welcken my de Werelt ghecruyst is, ende ick der Werelt.

* Roma. 5.a.3.

17

^† Want in Christo Iesu, en ghelt noch besnijdinghe, noch voorhuyt yet,^‡ maer een nieuwe Creature.

† Galat. 5.a.6.

‡ 2.Cor. 5.c.16.

18

^* Ende soo vele alsser na desen Regel wandelen ouer die sy vrede ende bermherticheyt, ende ouer den Israel Gods.

* Psa. 125.a.5

19

Voort aen en maecke my niemandt meer moeyte,^† Want ick drage de licteeckenen des Heeren Iesu, aen mijnen Lijue.

† 2.Cor. 4.b.10

20

De ghenade onses Heeren Iesu Christi, sy met uwen geest lieue broeders. Amen.

Tot den Galateren. ¶ Ghesonden van Romen.