Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel verhaelt, hoe hy te Ierusalem by de ander Apostelen quam, Ende vertelt hoe hy Petrum te Antiochien wederstont, Ende bewijst dat de gherechticheyt niet wt de wercken des Wets, maer alleen doort ghelooue in Christum coemt.

1

⁺ DAer na ouer^† veerthien iaren tooch ick weder op nae Ierusalem met Barnaba, ende nam Titum ooc met my.

+ A vers 1

† Acto. 15.a.2.

2

^* Maer ick tooch op wt een openbaringhe, ende besprac my met haer ouer den Euangelio, dat ic predike onder den Heydenen, maer besonders met den genen, die dat aensien hadden, op dat ick niet te vergheefs en liepe, oft gheloopen en hadde.

* Acto. 19.d.21.

3

^‡ Ende Titus en wert oock niet ghedwonghen hem te besnijden, die met my was, hoe wel hy een Grieck was,

‡ Acto. 16.a.3. 1.Cor. 9.c.20.

4

^* Wandt doen haer sommighe valsche broederen mede inghedronghen hadden, ende beneuen ingheslopen waren, om te verspieden onse vrijheydt, die wy hebben in Christo Iesu, op dat si ons gheuangen namen,

* Acto. 15.d.24.

5

En weken wy den seluen niet een vre, onderdanich te zijn, op dat de waerheydt des Euangeliums, by v bestonde.

6

Van den ghenen die dat aensien hadden, wat si wel eer gheweest zijn, daer en leyt mi niet aen.^† Want God en acht dat aensien der menscen niet. Mer my en hebben die, die dat aensien hadden, niet anders gheleert:

† Deut. 10.d.17 Acto. 10.d.34 Roma. 2.b.11. Ephes. 6.a.9.

7

Maer wederom, doen si saghen, dat my toe betrout was dat Euangelium aen de voorhuyt:⁺ Ghelijck als Petro dat Euangelium aen de besnidinge,

+ B vers 7

8

(Want die met Petro crachtich is gheweest tot den Apostel Ampt onder de besnijdinge,^* die is met my ooc crachtich gheweest onder de Heydenen) ende si bekenden de ghenade die my ghegeuen was,

* Acto. 9.c.15. 13.a.2. Galat. 1.c.16. Ephesi. 3.b.8.

9

Iacobus ende Cephas ende Iohannes, die voor colomnen aenghesien waren, gauen si my ende Barnaba de rechterhant, ende werden met ons eens, dat wi onder de Heydenen, ende si onder de besnijdinge predicten:

10

Alleen dat wy der armen gedachten:^† Daer ick ooc vlijtich in geweest ben, dat te doen.

† Acto. 11.c.29 Rom. 15.d.25. 2.Cor. 9.a.1.

11

Mer doen Petrus tot Antiochien quam, wederstont ick hem onder ooghen, wandt daer was clacht ouer hem gecomen.

12

Want te voren, eer sommighe van Iacobo quamen, adt hy met den Heydenen. Maer doen si quamen, ontooch hy hem, ende scheyde hem van haer af, daerom dat hy die van der besnijdinge vreesde.

13

Ende de ander Ioden huychelden met hem, alsoo, dat oock Barnabas verleydt werdt met haer te huychelen.

14

Maer doen ick sach, dat sy niet recht en wandelden nae der waerheyt des Euangelij, sprack ick tot Petro voor allen openbaerlijck: Ist dat ghy die daer een Iode zijt,^* Heydensch leeft, ende niet Iodisch, waerom dwingt ghy dan de Heydenen Iootschelijck te leuen?

* Actor. 10.c.28.

15

^† Hoe wel wy van natuere Ioden, ende gheen sondaren wt den Heyden en zijn,

† Philip. 3.a.3.

16

^+‡ Nochtans dewijle dat wy weten, dat de mensch door de wercken des wets, niet rechtueerdich en wordt, maer door den ghelooue aen Iesum Christum, soo gheloouen wy ooc aen Iesum Christum, op dat wy rechtueerdich worden door den ghelooue aen Christum, ende niet door de wercken des wets.

+ C vers 16

‡ Actor. 13.d.38. Roma. 3.b.28 8.a.3. Hebr. 7.c.18.

17

^* Wandt door de wercken des wets en wort geen vleesch rechtueerdich.

* Roma. 3.b.20 Galat. 3.b.11.

18

Maer souden wy, die daer soecken door Christum rechtueerdich te worden, oock noch selue sondaren beuonden worden, soo waer Christus een sonden dienaer. Dat sy verre.

19

Maer ist dat ic wederom timmer, dat ic gebroken heb, soo maeck ick my seluen tot eenen Ouertreder.

20

^† Maer ick ben door de wet de wet ghestoruen,^‡ op dat ick Gode leue. Ick ben met Christo ghecruyst,

† Rom. 7.a.4.

‡ rom. 14.b.7 2.Cor. 5.c.15.

21

Maer ick leue, nochtans nv niet ick, maer Christus leeft in my. Wandt wat ick nv leue in den vleessche, dat leef ic in den ghelooue des soons Gods,^* die my lief gehadt heeft, ende hem seluen voor my ouerghegeuen.

* Galat. 1.a.4. Ephesi. 5.a.2. Titum. 2.d.14.

22

Ick en werpe de ghenade Godts niet wech.^† Wandt ist dat door de wet de gherechticheyt coemt, soo is Christus te vergheefs ghestoruen.

† Heb. 7.b.11.