Den Bibel, Inhoudende dat Oude ende Nieuwe Testament (Biestkensbijbel)

De Epistel S. Pauli aen den Galateren.

¶ Dat .I. Capittel.

¶ Paulus straft de Galaten, dat sy haer seer lichtelijck vant Euangelio hadden laten af weynden. Vertelt voort zijnen roep, Ende dat hy het Euangelium niet van menschen, mer van Gode ontfanghen hadde.

1

⁺ PAulus een Apostel, niet van Menscen, oock niet door een Mensch, maer door Iesum Christum, ende Godt den Vader, die hem op verwect heeft van den dooden,

+ A vers 1

2

Ende alle Broederen die by my zijn. Den gemeynten in Galatia.

3

^* Ghenade sy met v, ende vrede van Gode den Vader, ende onsen Heere Iesu Christo,

* Roma. 1.a.7. 2.Corin. 1.a.2. Ephesi. 1.a.2. 2.Petri. 1.a.2.

4

^† Die hem seluen voor onse sonden ghegeuen heeft, op dat hy ons verloste van deser tegenwoordigher argher Werelt, na den wille Gods onses Vaders,

† mat. 20.d.28 Galat. 2.c.21. Ephesi. 5.a.2. Titum. 2.b.14.

5

Welcken sy eere, van eewicheyt tot eewicheyt, Amen.

6

My verwondert, dat ghy v soo haest laet af weynden, van den ghenen, die v gheroepen heeft in de ghenade Christi, op een ander Euangelium:

7

Hoe wel daer gheen ander en is, Dan dat daer sommige zijn, die v^‡ verwerren, ende willen dat Euangelium Christi verkeeren.

‡ Acto. 15.a.2.

8

^+* Maer al waert oock dat wy, oft een Enghel vanden Hemel, v een ander Euangelium predicte, dan dat wy v gepredict hebben, die sy veruloeckt.

+ B vers 8

* 2.Cor. 11.a.6.

9

Als wy nv geseyt hebben, so seggen wy oock noch eenmael: Ist dat v yemant een ander Euangelium predict, dan dat ghy ontfangen hebt, die sy veruloect.

10

^† Predike ick dan nv den menschen, oft Gode te dienst? Oft gedenck ick den menschen behaechlijc te zijn?^* Waert dat ic den menschen noch behaechlijc ware, so en ware ick Christus knecht niet.

† 1.Tessa. 2.a.4

* Ioan. 15.b.19. Iaco. 4.a.4. 1.Ioan. 2.c.15.

11

Maer ic^† doe v condt, lieue Broeders, dat dat Euangelium dat van my ghepredickt is, niet menschelijck en is,

† 1.Cor. 15.a.1.

12

^‡ Want ick en hebt van gheenen mensche ontfanghen, noch gheleert, maer door de openbaringe Iesu Christi.

‡ Ephesi. 3.a.3.

13

Want ghy hebt ymmers wel gehoort mijn wesen eertijts in der Iootschap,^* hoe dat ick bouen maten de ghemeynte Gods veruolchde, ende verstoorde haer.

* Actor. 8.a.3. 9.a.1. 22.a.4. Philip. 3.a.6. 1.Tim. 1.c.13.

14

Ende nam toe in der Iootschap, bouen vele mijns gelijcken, in mijn gheslachte, ende ijuerde bouen maten om de vaderlijcke Wet.

15

⁺ Maer doent Gode behaechde,^† die my van mijner moeder lichaem heeft wtgescheyden, ende geroepen door zijn ghenade, dat hy sinen Soon in

+ C vers 15

† Acto. 9.b.15. 13.a.2. 22.b.14

[p. 78r]

my openbaerde,

16

Dat ick hem door dat Euangelium vercondighen soude onder den Heydenen, Van stonden aen voer ick toe, ende en besprack my daer niet ouer,^* met vleesch ende bloet,

* Mat. 16.c.17.

17

Ick en quam ooc niet tot Ierusalem tot dien, die voor my Apostelen waren, maer tooch henen in Arabiam, ende quam wederom tot Damascum.

18

Daer na ouer drie Iaer quam ick tot Ierusalem, om Petrum te sien, ende bleef vijfthien daghen by hem.

19

Maer der anderen Apostelen en sach ick geen, dan Iacobum des Heeren broeder.

20

Ende soo wat ick v schrijue, Siet,^† Godt wetet, ic en lieghe niet.

† Roma. 1.a.9. 9.a.1. 2.Cor. 2.a.1. 11.d.33. 1.Tessa. 2.a.5.

21

Daer na quam ick in de Landen Syrie ende Cilicie:

22

Maer ick was ombekent van aenghesicht, den Christelijcken Ghemeynten in Iudea.

23

Sy hadden alleen ghehoort, dat, die ons te voren veruolchde, die predickt nv dat ghelooue, welcke hy te voren verstoorde. Ende presen Godt ouer my.