Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ De Apostel recommandeert hem seluen, ende dat door secreten vander Godtlijckheyt procederende, ende stelt hemseluen boeten teghen der sonden van hooueerdicheyt, hem niet aentreckende de duechden die den Corinthen ghedaen ende ghebuert zijn.

1

⁺ DAt roemen en is my ymmers geen nut, doch wil ick comen op de ghesichten, ende openbaringhen des Heeren.

+ A vers 1

2

^* Ick ken eenen mensche in Christo, voor veerthien iaren, Is hy in den lichaem gheweest, soo en weet ickt niet, oft is hy wt den lichaem gheweest, soo en weet ickt oock niet: Godt wetet. Die selue werdt ontruckt tot in den derden Hemel.

* Acto. 22.b.17. 1.Cor. 15.a.8.

3

Ende ick ken den seluen mensche wel, oft hy int lichaem oft wt den lichaem gheweest sy, dat en weet ick niet: Godt wetet. Hy werdt ontruckt int Paradijs,

4

Ende hoorde onwtsprekelijcke woorden, die gheen mensch geseggen en can.

5

Daer wil ick my af beroemen, maer van my seluen en wil ick my niet beroemen, dan mijnder swacheyt.

6

Ende al woude ick my beroemen, so en dede ic daerom niet dwaselijck, want ic woude de waerheyt segghen: Maer ic onthoude my dies, op dat my niemant hoogher en achte, dan hy aen my siet, ofte van my hoort.

7

^† Ende op dat ick my der hooger openbaringen niet en verhieue, so is my gegeuen^* een pael int vleesch, namelijc, des Satans Engel, die my met vuysten slaet, op dat ick my niet en verhieue.

† Iob. 1.b.12.

* Eenen prickel.

8

Daer ick den Heere driemael om ghesmeect heb, dat hy van my weke.

9

Ende hy heeft tot my gheseyt:^‡ Laet v genoeghen aen mijnder ghenade: Want mijn cracht is inden swacken machtich. Daerom wil ic my opt alder liefste, beroemen mijnre swacheyt, op dat de cracht Christi by my woone.

‡ Deut. 3.d.26.

10

⁺ Daerom ben ick goets moets in swacheden, in versmaetheden, in nooden, in veruolghinghen, in angsten, om Christus wille. Want als ic swack ben, soo ben ick sterck.

+ B vers 10

11

Ick ben een dwaes geworden met het beroemen, daer hebt ghy my toe gedwongen. Want ic soude van v gelouet worden,^‡ Aengesien dat ic niet minder en ben, dan de hooghe Apostelen en zijn, hoe wel dat ic niet en ben.

‡ 1.Cor. 15.b.10.

12

^* Want daer zijn ymmers eens Apostels teekenen onder v geschiet, met alle verduldicheyt, met teeckenen, ende met wonderen, ende met daden.

* 1.Cor. 9.a.2.

13

Wat ist, daer ghy cleynder in zijt, dan de andere ghemeynten?^† Behaluen alleen, dat ic v selue niet en heb beswaert. Vergheeft my dese sonde.

† 1.Cor. 9.b.12. 2.Cor. 11.b.11.

14

Siet, ic ben bereyt ten derden mael, tot v te comen, ende en wil v niet beswaren.^‡ Want ic en soeck niet dat uwe, maer v. Want de kinderen en sullen den Ouders gheen schatten vergaderen, maer de Ouders den kinderen.

‡ Acto. 20.e.33.

15

Maer ic wil my geheel geerne henen geuen, ende henen gegeuen worden voor uwe sielen: Hoe wel dat ic v gansch seer lief heb, ende nochtans weynich lief ghehadt worde.

16

⁺ Maer latet also zijn, dat ick v niet en heb beswaert, Mer dewijle dat ic listich was, heb ic v met listicheyt gheuangen.

+ C vers 16

17

Heb ic ooc yemant verongelijct, door yemandt van dien die ick tot v gheseynt heb?

18

Ick heb Titum vermaent, ende met hem geseynt eenen broeder. Heeft v Titus ooc verongelijct? Hebben wy niet in eenen gheest ghewandelt? Hebben wy

[p. 77v]

niet eenderley voetstappen ghegaen?

19

Laet ghy v wederom duncken, dat wy ons verantwoorden? Wy spreken in Christo voor Gode. Maer dat alle geschiet v mijn liefste, tot beteringhe.

20

Want ick vreese, wanneer ic come, dat ic v niet en vinde, als ic wil, ende dat ghy my ooc niet vinden en sult, als ghy wilt, datter geen twist,^‡ benijdinge, toornicheyt, kijuinge, achter clap, oorblasinghe, opgeblasenheyt ende oproer en zijn:

‡ Galat. 5.c.15.

21

Dat ic niet wederom en come, ende mi God verootmoedige bi v, ende moete rouwe dragen ouer vele, die te voren gesondicht ende geen boete ghedaen en hebben, voor de onreynicheyt, ende hoererije, ende dertelheyt die si bedreuen hebben.