Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ De Apostel hemseluen prijsende, stelt de sake waerom hy van de Corinthen geenen loon genomen en hadde.

1

⁺ MAer wie hem beroemt,^* die beroeme hem des Heeren.

+ A vers 1

* Esa. 65.c.15. Ierem. 9.d.23. 1.Cor. 1.d.30.

2

Want daerom en is een niet duechdelijc,^† dat hy hemseluen louet, maer dat hem de Heere loeft.

† Pro. 27.a.8.

3

Och oft ghy my een weynich dwaesheyts int goede af naemt, doch ghi houdet my wel te goede.

4

Want ic ijuere ouer v, met godlijcken ijuer. Want ick heb v^† vertrout eenen man, op dat ic een reyne^‡ Maecht Christo toebracht.

† Toegeuoecht.

‡ Leui. 21.c.13.

5

Mer ick sorge, dat^* gelijc als de slange Euam verleydde met haerder schalckheyt, alsoo oock uwe sinnen niet verdoruen en worden, van der eenuoudicheyt in Christo.

* Gene. 3.a.6. Sap. 2.d.24. Ioan. 8.d.44.

6

^† Want waert dat die gene, die tot v coemt, eenen anderen Iesum predicte, dien wy niet gepredict en hebben, oft dat ghy eenen anderen gheest ontfingt, dien ghy niet ontfangen en hebt, ofte een ander Euangelium, dat ghy niet aenghenomen en hebt, soo verdroecht ghyse billicx.

† Galat. 1.b.8.

7

Want ick houde, ick en sy niet minder dan de hooge Apostelen zijn.

8

Ende hoe wel ick slecht ben met spreken, so en ben ic nochtans niet slecht inder kennisse. Doch ick ben v ouer al wel bekent.

9

Ofte heb ick gesondicht, dat ick my vernedert heb, op dat ghy verheuen werdet?^+* Want ic heb v dat Euangelium om niet vercondicht,

+ B vers 9

* 1.Cor. 9.b.12.

10

Ende heb andere gemeynten berooft, ende soudye van haer genomen, dat ick v predicte.

11

^† Ende doen ick by v was tegenwoordich, ende gebrec hadde, en was ic niemant lastich.^‡ Want mijn nootdruft veruulden de broederen, die van Macedonia quamen, ende ick heb my v in allen stucken onlastich ghehouden, ende wil my oock noch also voortaen houden.

† Acto. 20.e.33. 2.Cor. 12.c.13. 1.Tessa. 2.b.9

‡ Phil. 4.c.15.

12

So gewisselijc als de waerheyt Christi in my is, so en sal my dese roem in den landen Achaia niet verstopt worden.

13

Waer om dat? Dat ick v niet en soude liefhebben? Godt weet het.

14

Maer wat ic doe, ende doen wil, dat doe ick daerom, op dat ic afhouwe de oorsaec, den genen die oorsaec soecken, dat sy haer beroemen mochten, dat sy zijn als wy.

15

Want sulcke valsce Apostelen, ende bedriegelijcke arbeyders, veranderen haer tot Christus Apostelen.

16

Ende dat en is oock gheen wonder. Want Satan self, verandert hem tot eenen Engel des lichts.

17

Daerom en ist geen groot dinck, oft haer oock

[p. 77r]

zijn dienaers veranderen tot Predickers van der gherechticheyt,^* welcker eynde zijn sal, na hare wercken.

* 2.Pet. 2.a.9.

18

⁺ Ick seg noch een mael, op dat daer niemant en meyne, dat ick dwaes sy. Oft anders, soo neemt my aen als eenen dwaes, dat ick oock my een weynich beroeme.

+ C vers 18

19

Wat ick nv spreecke, dat en spreeck ick niet als in den Heere, maer als in der dwaesheyt,

20

Dewijle dat wy int beroemen ghecomen zijn.^† Aenghesien datter veel haer beroemen na den vleessche so wil ick my oock beroemen.

† Iob. 29.b.8.

21

Want ghy verdraecht geerne de dwasen, de wijle dat ghy cloec zijt.

22

Ghy verdraecht het, ist dat v yemandt tot knechten maeckt, ist dat v yemant scheynt, ist dat v yemant neemt, ist dat yemant met v pocht, ist dat v yemant in dat aenghesicht slaet.

23

Dat seg ick nae der oneere, als waren wy swack geworden. Waer nv yemant coen op is (ic spreeck in dwaesheydt) daer ben ick oock coen op.

24

^‡ Sy zijn Hebreer, ick oock. Sy zijn Israeliten, ic ooc. Sy zijn Abrahams saet, ic oock.

‡ Acto. 22.a.3. Philip. 3.a.4

25

^* Sy zijn dienaers Christi, Ick spreeck dwaselijck, ick ben wel meer,^‡ Ick heb meer ghearbeyt, Ick heb meer slaghen gheleden, Ick ben dicwilder gheuanghen, dickwils in doots nooden gheweest.

* 2.Cor. 3.a.6.

‡ 1.Cor. 15.b.10

26

^† Van den Ioden heb ick vijfmael ontfanghen, veertich slaghen een min.

† Deut. 25.a.1.

27

^‡ Ick ben drie mael ghegheesselt.^* Eenmael ghesteenicht.^† Driemael heb ic Schipbrekinghe gheleden.⁺ Dach ende nacht heb ick toeghebracht in der diepte der See.

‡ Act. 16.d.23.

* Act. 14.c.18.

† Act. 27.a.2.e.41.

+ D vers 27

28

Ick heb dickwils ghereyst. Ick ben in periculen gheweest te water, in perijckel onder de Moordenaers, in perijckel onder den Ioden, in perijckel onder den Heydenen, in perijckel in de Steden, in perijckel in der woestijnen, in perijckel op de See, in perijckel onder den valschen broederen,

29

In moeyte ende arbeyt, in veel waken, in hongher ende dorst, in veel vasten, in coude ende naecktheyt.

30

Behaluen wat sus noch toeualt, Namelijck, dat ick daghelijcks ouerloopen worde, ende sorge draghe voor alle ghemeynten.

31

^* Wie is swack, ende ick en worde niet swack? Wie wort geargert, ende ick en berne niet?

* 1.Cor. 8.b.13.

32

Ist dat ick my beroemen moet, soo wil ick my mijnder swacheyt beroemen.

33

^† Godt ende de Vader onses Heeren Iesu Christi, die daer ghelouet sy in eewicheyt, weet, dat ick niet en lieghe.

† Roma. 1.a.9. Galat. 1.c.20.

34

^‡ Te Damasco de Lantvoocht des Conincx Areta, bewaerde de stadt der Damasceren, ende woude my grijpen.

‡ Acto. 9.d.24.

35

Ende ick werdt in eenen corf ter venster wt door de muere neder ghelaten, ende ontquam wt zijn handen.