Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ De Apostel excuseert hem van de valscheyt diemen hem aengedaen heeft, door den grooten haet ende nijt, ende dat met Redene ende Exempelen.

1

⁺ ICk Paulus vermane v, door de saechtmoedicheyt ende goedertierenheydt Christi, ick die teghenwoordich onder v cleyn ben, maer int af wesen ben ick stout teghen v.

+ A vers 1

2

Ick bid, dattet my niet van nooden en si, teghenwoordich koenlijck te handelen, ende der koenheyt te gebruycken, diemen my opleyt, teghen sommige, die ons achten, als wandelden wy na vleeschelijcker wijse.

3

Want al ist dat wy in den vleesche wandelen, soo en strijden wy nochtans niet na vleeschlijcker wijse.

4

Want de^‡ wapenen onser Ridderschap, en zijn niet vleesschelijck, maer machtich voor Gode, te verstooren de beuestinghen, daer wy mede verstooren de aenslagen,

‡ Ephe. 6.b.13.

5

Ende alle hoocheyt die haer verheft, teghen de kennisse Godts, ende nemen gheuanghen alle verstant onder de gehoorsaemheit Christi,

6

Sijn bereyt, te wreken alle ongehoorsaemheyt wanneer uwe ghehoorsaemheyt veruult is.

7

⁺ Ordeelt ghy na den aensien? Verlaet hem yemant daer op, dat hy Christo toebehoore, die dencke sulcx by hemseluen, dat, ghelijck als hy Christo toebehoort, wy also oock Christo toebehooren.

+ B vers 7

8

Ende oft ick my oock wat meer beroemde, van onser macht,^† welcke ons de Heere ghegeuen heeft, v te beteren, ende niet te verderuen, soo en woude ick doch niet te schanden worden.

† 2.Cor. 13.b.10.

9

(Dat seg ick) op dat ghi v niet en laet duncken als hadde ick v willen verscricken met brieuen.

10

Want de brieuen (seggen sy) zijn swaer ende sterck, maer de tegenwoordicheyt des Lichaems is swack, ende de Redene verachtelijck.

11

Wie een soodanich is, die dencke, dat, ghelijc als wy zijn met woorden in de brieuen, int afwesen, wy oock so met der daet tegenwoordich doruen zijn.

12

^+‡ Want wy en doruen ons onder die niet rekenen ofte tellen, die haer seluen louen. Maer dewijle dat sy haer by haerseluen meten, ende houden alleen wat van haerseluen, so en verstaen si niet.

+ C vers 12

‡ 2.Corin. 3.a.1. 5.b.12.

13

Maer wy en beroemen ons niet ouer de screue, maer alleen na de screue des re-gels, daer ons Godt de mate mede af gemeten, heeft, te reycken ooc aen v.

14

Want wy en varen niet te wijt, recht als en hadden wy niet gereyct tot aen v: Want wy zijn ymmer oock tot v toe ghecomen met den Euangelio Christi,

15

Ende en beroemen ons niet ouer de mate in vreemden arbeyt. Ende hebben een hope, wanneer nv uwe gelooue in v wascht, dat wy na onsen regel, willen wijder comen,

16

Ende dat Euangelium oock prediken den ghenen, die op gene sijde van v woonen, ende ons niet beroemen in tghene, dat met vreemder reghel bereyt is.