Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ De Apostel vermaent hier vander aelmoesen die daer ghegeuen zijn binnen Ierusalem, ende heeft gheroepen de ghene die dese aelmoesen vergadert hebben.

1

⁺ ICk doe v cont lieue Broeders, de ghenade Gods, die inden ghemeynten in Macedonia ghegheuen is.

+ A vers 1

2

Want haer vruechde was doen oueruloedich, doen sy door veel droeffenisse beproeft werden. Ende hoe wel dat sy gansch arm waren, so hebben sy doch rijckelijck gegeuen in aller eenuoudicheyt.

3

Want na allen vermogen (dat ghetuyge ick) ende bouen vermoghen, waren sy selue willich,

4

Ende smeecten ons met veel vermanens, dat wy aennamen de weldaet ende gemeynschap der^* hantreyckinge, die daer geschiet den Heyligen.

* Acto. 11.c.29. Rom. 15.d.26 1.Cor. 16.a.2. 2.Cor. 9.a.1.

5

Ende niet als wy hoepten, maer si begauen haerseluen, ten eersten den Heere, ende daer nae ons, door den wille Gods,

6

Dat wy moesten Titum vermanen, op dat hy, gelijc als hy te voren hadde begonnen, also oock onder v, sulcke weldaet wtrichtede.

7

Maer ghelijc als ghy in allen stucken rijc zijt, int gelooue ende int woort, ende inder bekennisse, ende in alderley neersticheyt, ende in uwer liefde tot ons, also beschict, dat ghy ooc in deser weldaet rijc zijt,

8

Niet en seg ick, dat ick yet ghebiede, maer dewijle dat de anderen soo neerstich zijn, so beproeue ick oock uwe liefde oft sy [van] rechter Aert sy.

9

⁺ Want ghy weet de genade onses Heeren Iesu Christi, dat, hoe wel dat hy rijck is^* wert hy nochtans arm om uwen twille, op dat ghy door zijn armoede rijck werdet.

+ B vers 9

* Luce. 9.f.58.

10

Ende mijn welmeyninge geue ick hier in: Want sulcx is v nuttelijc, ghy die begonnen hebt vant voorleden Iaer af, niet alleen dat doen, maer oock dat willen.

11

Maer nv volbrengt oock dat doen, op dat, ghelijck als daer is een geneycht ghemoet te willen, daer oock alsoo sy een gheneycht ghemoet te doene,^* vant ghene dat ghy hebt.

* Prouer. 3.b.9 1.Pet. 4.b.10

12

Want^‡ ist dat yemant willich is, soo is hy aenghenaem na dien dat hy heeft, niet na dien dat hy niet en heeft.

‡ Luce. 21.a.3.

13

Niet en gheschiet dat tot der meyninghe, op dat de anderen rust hebben, ende ghy droeffenis:

14

Maer op dattet ghelijck sy. Soo diene uwe oueruloedicheyt hare behoefticheyt, dese [diere] tijt lanck: Op dat oock haer oueruloedicheyt, daer na diene uwer behoefticheyt, ende geschie dat, dat ghelijck is,

15

Alsser geschreuen staet:^* Die veel vergaderde, en hadde niet ouer, ende die weynich vergaderde, die en had geen gebrec.

* Exod. 16.d.18.

16

Ende Gode sy danck, die sulcke neersticheyt aen v ghegeuen heeft, in dat herte Titi.

17

Want hy nam, tis waer, de vermaninge aen, Maer dewijle dat hy so gansch neerstich was, is hy van hemseluen tot v gereyst.

18

⁺ Ende wy hebben eenen Broeder met hem ghesonden, die dat Lof heeft aent Euangelio, door alle ghemeynten:

+ C vers 18

19

Ende niet alleen dat, mer hy is oock gheordineert vanden gemeynten, tot onse wandelbroeder, in deser weldaet, die door ons wtghericht wort, den Heere tot eere, ende ten prijse uwes goeden wils:

20

Ende bewaren dat, dat ons niemandt wat quaets na segghen en can, van sulcker rijcker hantreyckinghe, die door ons wtghericht wordt:

21

Ende sien daer op, dattet redelijcken toegae, niet alleen voor den Heere, maer oock voor den menschen.

22

Oock hebben wy met hem ghesonden onsen Broeder, dien wy dickwils ghespuert hebben in veel stucken, dat hy neerstich sy, maer nv veel neerstigher. Ende wy zijn in grooter betrouwen tot v,

23

Het sy van Titus weghen (welcke mijn gheselle ende Hulper onder v is) oft onser Broederen weghen (die welcke Apostelen zijn der ghemeynten, ende een eere Christi)

24

Betoont nv de bewijsinghe uwer liefden, ende onser beroeminghe van v, aen desen, oock opentlijck voor den ghemeynten.