Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ De Apostel voorseyt hier een profijtelijcke vermaninghe, ende daer nae worden die van Corinthen ghepresen van haer voorleden goet.

1

⁺ DEwijle wy nv sulcke beloften hebben mijn liefste, soo laet ons van aller beuleckinghe des vleeschs ende des gheests ons reynighen, ende voort varen met der heylighinghe inder vreese Gods.

+ A vers 1

2

Vatet ons, wy en hebben niemant leet ghedaen, wy en hebben niemant bedroghen, wy en hebben niemant beschadicht.

3

Sulcx en seg ick niet, om v te verdoemen. Want ick heb te voren gheseyt, dat ghy in onser herten zijt, om mede te steruen, ende mede te leuen.

4

Ick spreke met grooter coenheyt tot v, ick beroem veel van v, ick ben veruult met troost,^* ick ben oueruloedich in vruechden, in alle onse droeffenis.

* Matt. 5.b.12. Actor. 5.e.42.

5

^† Want doen wy in Macedoniam quamen, en had onse vleesch gheen rust, maer ouer al waren wy in droefnis, wtwendichlijck strijt, inwendichlijc vreese.

† Act. 16.b.19

6

^‡ Maer Godt die de cleynen troost, die troostede ons door de toecoemst Titi.

‡ 2.Cor. 1.a.4.

7

⁺ Ende niet alleen door zijn toecoemst, maer oock door den troost, daer hy mede ghetroost was aen v, ende vercondichde ons uwe verlanghen, uwe weenen, uwen ijuer om my, also, dat ick my noch meer verblijdde.

+ B vers 7

8

Want dat ick v door den Brief truerich ghemaeckt heb, dat en berout my niet. Ende oft my alschoon beroudde, dewijle dat ick sie, dat de Brief v misschien een wijle bedroeft heeft,

9

Soo verblijde ick my doch nv, niet daer af, dat ghy zijt bedroeft geworden, maer dat ghy bedroeft zijt gheworden tot berouwe. Want ghy zijt godlijck bedroeft geworden, dat ghy van ons ymmer gheen schade erghens in en ledet.

10

^‡ Want de godlijcke truericheyt werct ter salicheyt eenen rouwe, die niemant en berout.^† Maer de truericheyt der werelt wercket den doot.

‡ 1.Petr. 2.c.19.

† Eccli. 30.c.25. 38.c.22. 1.Mac. 6.b.8.

11

Siet, dat selue dat ghy godlijck zijt bedroeft geworden, welcken neersticheyt heeft het in v ghewrocht, daer toe verantwoordinghe, toorn, vreese, verlanghen, ijuer, wraecke. Ghy hebt v bewesen in allen stucken, dat ghy reyn zijt aender daet.

12

⁺ Daerom al ist dat ick v gheschreuen heb, so en ist doch niet gheschiet, om des wille, die leet ghedaen heeft, ooc niet om deswille, dien leet ghedaen is, maer om des wille, dat uwe neersticheyt teghen ons openbaer werde by v, voor Gode.

+ C vers 12

13

Daerom zijn wy ghetroost gheworden, dat ghy ghetroost zijt. Maer oueruloedigher hebben wy ons noch meer verblijt, van de blijschap Titi. Want zijn geest is vermaect aen v allen.

14

Want wat ick voor hem van v beroemt heb, daer en ben ick niet in te schanden gheworden, maer ghelijck alst altemael waer is, dat ick met v ghesproken heb, alsoo is oock onse beroeminghe by Tito waer geworden.

15

Ende hem is wter maten van herten wel tot v, wanneer hy ghedenct aen uwer alder

[p. 76r]

ghehoorsaemheyt, hoe ghy hem met vreesen ende beuen hebt ontfanghen.

16

Ick verblije my, dat ick my alles goets, tot v betrouwen mach.