Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ De Apostel vermaent den Corintheren tot duechden, ende leert datmen metten ongheloouighen gheen vreemt Iock trecken en sal, maer wt het midden van haer gaen moet, salmen Godt behaghen.

1

⁺ VVy vermanen v als medehulpers, dat ghy de^* ghenade Gods niet te vergheefs en ontfangt.

+ A vers 1

* Hebr. 12.c.15.

2

Want hy spreect:^† Ick heb v inden aengenamen tijt verhoort, ende heb v inden dach der salicheyt gheholpen. Siet, nv is de aenghename tijt, nv is de dach der salicheyt.

† Esai. 49.b.8.

3

Maer en laet ons niemant^‡ erghens een erghernis gheuen, op dat onse Ampt niet gelastert en worde.

‡ 2.Machab. 6.d.24. Rom. 14.c.13. 1.Cor. 10.d.32.

4

Maer in allen dinghen laet ons bewijsen, als de^* dienaers Gods. In grooter verduldicheyt, in droeffenisse, in nooden, in ancxsten,

* 1.Cor. 4.a.1 2.Cor. 3.a.6. 11.d.25.

5

In slaghen, in gheuanckenissen, in oproeren, in arbeyden, in waken, in vasten,

6

In cuysheyt: in kennissen, in lancmoedicheyt, in vriendelijcheyt, inden heyligen geest, in ongeueysde liefde,

7

⁺ Inden woorde der waerheyt, inder cracht Gods door wapenen der gerechticheyt, ter rechter ende ter slincker hant:

+ B vers 7

8

Door eere ende schande,^† door quaet gherucht ende goet gherucht: Als de verleyders, ende nochtans waerachtich:

† Ioan. 7.a.12.

9

Als de onbekende, ende nochtans bekent:^‡ Als de steruende, ende siet, wy leuen: Als de ghecastijdde, ende nochtans niet ghedoodet:

‡ Esa. 26.c.19. Sapien. 3.a.2 2.Cor. 4.b.10

10

Als de truerighen, maer altijt vrolijck: Als de Armen, maer die nochtans vele rijck maken: Als die niet en hebben, ende nochtans alle dinck hebben.

11

O ghy Corintheren, onse mont heeft hem tot v open ghedaen, onse herte is vrolijck.

12

Van onsen tweghen en derft ghy v niet becommeren, Maer dat ghy v becommert, dat doet ghy wt hertgrondelijcker meyninghe.

13

Ick spreeck met v, als met mijnen kinderen, dat ghy v oock alsoo teghen my stellet, ende zijt oock vrolijck.

14

^+* En treckt niet aent vreemde Iock met den ongheloouighen. Want wat gheniet heeft de gherechticheyt met de ongherechticheyt? Wat ghemeynschap heeft dat licht met der duysternis?

+ C vers 14

* Deut. 7.a.2. Eccli. 13.a.1. 1.Cor. 5.b.8.

15

^† Hoe coemt Christus dan ouer een met Belial? Oft wat deel heeft de gheloouighe met den ongheloouighen?

† Matt. 8.d.29

16

Wat ghelijckenisse heeft de Tempel Gods met den Afgoden?^‡ Maer ghy zijt de Tempel des leuenden Gods, ghelijck als Godt spreect:^* Ick wil in haer woonen, ende in haer wandelen, ende wil haer Godt zijn, ende sy sullen mijn volck zijn.

‡ 1.Cor. 3.b.16. 6.c.19.

* Leu. 26.b.12 Eze. 37.d.27.

17

^† Daerom, gaet wt van haer, ende scheyt v af, spreect de Heere, ende en roert niet onreyns aen, soo wil ick v aennemen,

† Esai. 52.b.11.

18

^‡ Ende uwe Vader zijn, ende ghy sult mijn sonen ende dochteren zijn, spreeckt de Almachtighe Heere.

‡ Ierem. 31.a.9.